ວັນທີ 14 ພຶດສະພາ ຢຸູຫ້ອງປະຊຸມຊັ້ນ III ຫ້ອງວ່າການແຂວງ ໄດ້ຈັດກອງປະຊຸມວຽກງານການເມືອງ-ແນວຄິດ ແລະ ຕິດຕາມ, ເກັບກໍາສະພາບແນວຄິດທົ່ວແຂວງບໍລິຄຳໄຊ ໂດຍການເປັນປະທານຂອງ ທ່ານ ດວງຕາ ມໍລະຄາສູກ ກຳມະການປະຈຳພັກແຂວງ ປະທານກວດກາພັກ-ລັດ ແຂວງບໍລິຄໍາໄຊ.
ຄະນະໂຄສະນາອົບຮົມແຂວງ ໄດ້ລາຍງານສະພາບການຈັດຕັ້ງປະຕິບັດວຽກງານການເມືອງ-ແນວຄິດ ແລະ ຕິດຕາມ, ເກັບກໍາສະພາບແນວຄິດຫາງສຽງສັງຄົມປະຈຳປີ 2023, ເຊິ່ງທົ່ວແຂວງ ໄດ້ຮັບຫາງສຽງຈາກສັງຄົມທັງໝົດ 119 ບັນຫາ ສາມາດແກ້ໄຂໄດ້ 98 ບັນຫາ, ໃນນີ້ ຂັ້ນແຂວງແກ້ໄຂໄດ້ 14 ບັນຫາ, ຂັ້ນເມືອງ 84 ບັນຫາ.
ໃນນັ້ນມີ ບັນຫາການກໍ່ສ້າງໂຮງຮຽນ ມ ຕົ້ນ ສິນໄຊ ທີ່ບໍ່ຖືກກັບໂຄງສ້າງ ແລະ ຮູບແບບທີ່ວາງໄວ້ (ແກ້ໄຂສໍາເລັດແລ້ວ), ບັນຫາເງິນກອງທຶນນຸເຄາະຂອງສະຫະພັນນັກຮົບເກົ່າເມືອງປາກຊັນ ແລະ ກອງທຶນບ້ານໂພນໂຮມ ເມືອງປາກຊັນ (ຍັງສືບຕໍ່ແກ້ໄຂຕາມຂັ້ນຕອນ), ບັນຫາບຸກຄົນບໍ່ຫວັງດີໄດ້ລັກລອບຕັດສາຍໄຍແກ້ວ ຢູ່ບ້ານວັງຫີນ ເມືອງວຽງທອງ ໃນໄລຍະທີ່ມີກິດຈະກໍາສໍາຄັນຂອງຊາດຈັດຕັ້ງຂຶ້ນ (ແກ້ໄຂສໍາເລັດແລ້ວ), ບັນຫາຂໍ້ຂັດແຍ້ງທີ່ດິນທີ່ດໍາເນີນໂຄງການຢູ່ບໍລິເວນວົງວຽນໄປຂົວຂ້າມແມ່ນໍ້າຂອງ (ແກ້ໄຂແລ້ວ), ບັນຫາຫຍໍ້ທໍ້ທີ່ເກີດຂຶ້ນຢູ່ໃນຕະຫຼາດປາກຊັນໃໝ່ (ໄດ້ແກ້ໄຂສໍາເລັດ ແລະ ປະຈຸບັນເຫັນວ່າສະຫງົບລົງແລ້ວ), ບັນຫາຈາກຮູບຄະດີກາຍເປັນຫາງສຽງຄື: ຄະດີອຸປະຕິເຫດ ລະຫວ່າງ ລົດອາບູລັງນໍາສົ່ງຄົນເຈັບຂອງໂຮງໝໍເມືອງວຽງທອງ ຕໍາກັບລົດຂົນສົ່ງສິນຄ້າ ຢູ່ເຂດເມືອງປາກກະດິງ ໃນເດືອນພຶດສະພາ 2019 ຜ່ານມາ (ພາກສ່ວນກ່ຽວຂ້ອງຍັງເອົາໃຈໃສ່ສືບຕໍ່ແກ້ໄຂຢ່າງເປັນຈຸດສຸມ) ແລະ ບັນຫາສະເໜີຂັ້ນສູນກາງແກ້ໄຂ ເຊັ່ນບັນຫາຮ້ານແລກປ່ຽນເງິນຕາຕົວແທນທະນາຄານ ແລະ ບັນຫາຂ່າວສຽດສີ-ວິຈານ ແລະ ບິດເບືອນຈາກບົດເພງ “ເມຍຂາຍຫອຍ ຜົວຂາຍຄວາຍ”.
Cr: ຄຳຟອງ
