ງານບຸນປະເພນີອອກພັນສາປະວໍລະນາ ແລະ ການແຂ່ງຂັນຊ່ວງເຮືອປະຈຳປີ 2023 ຢູ່ທີ່ເມືອງທ່າແຂກ ແຂວງຄຳມ່ວນໄດ້ຈັດຂຶ້ນໃນລະຫວ່າງວັນທີ 27 – 29 ຕຸລາ 2023 ສໍາລັບມື້ສຸດທ້າຍຂອງການຈັດງານໂດຍການເປັນກຽດເຂົ້າຮ່ວມຂອງ ທ່ານ ວັນໄຊ ພອງສະຫວັນ ເຈົ້າແຂວງຄຳມ່ວນ, ທ່ານ ຄໍາໄຫຼ ສີປະເສີດ ຮອງປະທານສູນກາງແນວລາວສ້າງຊາດ, ມີບັນດາການນຳຂອງແຂວງ, ພະແນກການ, ຕາງໜ້າບໍລິສັດ, ລັດວິສາຫະກິດ, ຫົວໜ່ວຍທຸລະກິດ, ຜູ້ປະກອບການອ້ອມຂ້າງແຂວງ, ຕະຫຼອດເຖິງອານຸກໍາມະການ, ບັນດາສີພາຍເຮືອຊ່ວງຈາກພາຍໃນແຂວງ, ຕ່າງແຂວງ ແລະ ແຂກຖືກເຊີນເຂົ້າຮ່ວມ.
ສຳລັບການແຂ່ງຂັນຊ່ວງເຮືອໃນງານບຸນອອກພັນສາຢູ່ເມືອງທ່າແຂກ ແຂວງຄຳມ່ວນໃນປີນີ້ແມ່ນມີເຮືອຊ່ວງທີ່ມາຈາກບັນດາບ້ານ, ເມືອງ ແລະ ແຂວງຕ່າງໆ ທັງພາຍໃນ ແລະ ຕ່າງປະເທດມີທັງໝົດຈໍານວນ 21 ລໍາ. ໃນນີ້ ເຮືອຊ່ວງປະເພດ 50-55 ສີພາຍມີ 8 ລໍາ, ປະເພດ 30-35 ສີພາຍມີ 9 ລໍາ ແລະ ເຮືອຊ່ວງມິດຕະພາບທີ່ມາຈາກແຂວງນະຄອນພະນົມ ( ຣາຊອານາຈັກໄທ ) ປະເພດ 30- 35 ສີພາຍມີ 4 ລໍາ.
ຜົນການແຂ່ງຂັນເຮືອປະເພນີໃນປະເພດ 50-55 ສີພາຍອັນດັບທີ 1 ໄດ້ແກ່ເຮືອຂຸນດາວເຮືອງ ( ບ້ານປາກເປັ່ງ, ເມືອງທ່າແຂກ ) ໄດ້ຮັບລາງວັນຂັນ 1 ໜ່ວຍ ພ້ອມເງິນສົດ 23 ລ້ານກີບ ; ອັນດັບທີ 2 ເຮືອມັງກອນຄາຍຢວນ ( ປກຊ ) ບ້ານນາເມືອງ, ເມືອງທ່າແຂກໄດ້ຮັບເງິນສົດ 18 ລ້ານກີບ ; ອັນດັບທີ 3 ເຈົ້າແມ່ດອກຟ້າ ( ບ້ານປຸ່ງເໜືອ ເມືອງຫີນບູນ ) ໄດ້ຮັບເງິນສົດ 15 ລ້ານກີບ ແລະ ອັນດັບທີ 4 ເຮືອເພັດມຸງຄຸນໄຊ ( ບ້ານຫາດຊາຍສູງ, ເມືອງໄຊບູລີ, ແຂວງສະຫວັນນະເຂດ ) ໄດ້ຮັບເງິນສົດ 12 ລ້ານກີບ, ເປັນກຽດມອບຂັນ ແລະ ລາງວັນ ໂດຍ ທ່ານ ວັນໄຊ ພອງສະຫວັນ ເຈົ້າແຂວງຄໍາມ່ວນ.
ປະເພດເຮືອ 30-35 ສີພາຍອັນດັບທີ 1 ໄດ້ແກ່ເຮືອນາງຄໍາໄຫຼ ( ທະນາຄານພັດທະນາລາວ LDB ບ້ານນາເມືອງ ເມືອງທ່າແຂກ ) ໄດ້ຮັບຂັນ 1 ໜ່ວຍພ້ອມກັບເງິນສົດຈໍານວນ 15 ລ້ານກີບ ; ອັນດັບທີ 2 ເຮືອເທບທິລາດ ( ບ້ານປາກເປັ່ງ ເມືອງທ່າແຂກ ) ໄດ້ຮັບເງິນສົດ 12 ລ້ານກີບ; ອັນດັບທີ 3 ເຮືອລູກດອກຟ້າ (ບ້ານປຸ່ງ ເໜືອ ເມືອງຫີນບູນ ) ໄດ້ຮັບເງິນສົດ 9 ລ້ານກີບ; ອັນດັບທີ 4 ເຮືອພອນພຣະອິນປົງ ( ບ້ານຫາດຊາຍສູງ ເມືອງໄຊບູລີ ແຂວງສະຫວັນນະເຂດ ) ໄດ້ຮັບເງິນສົດ 7 ລ້ານກີບ. ເປັນກຽດມອບຂັນ ແລະ ລາງວັນ ໂດຍ ທ່ານ ຮອງປະທານສູນກາງແນວລາວສ້າງຊາດ.
ຜົນການແຂ່ງຂັນຊ່ວງເຮືອມິດຕະພາບລະຫວ່າງແຂວງຄໍາມ່ວນ ( ສປປ ລາວ ) – ແຂວງ ນະຄອນພະນົມ ( ຣາຊອານາ ຈັກໄທ ) ອັນດັບທີ 1 ໄດ້ແກ່ເຮືອນາງຄໍາໄຫຼ (LDB) ບ້ານນາເມືອງ ເມືອງທ່າແຂກ ໄດ້ຮັບລາງວັນເງິນສົດ 12 ລ້ານກີບພ້ອມຂັນ 1 ໜ່ວຍ ; ອັນດັບທີ 2 ເຮືອຍອດບົວຫຼວງ (ຈາກແຂວງນະຄອນພະນົມ ) ໄດ້ຮັບເງິນສົດ 10 ລ້ານກີບ ; ອັນດັບທີ 3 ເຮືອແກ້ວໄຫຼລິນ (ບ້ານນໍ້າພຸ, ເມືອງໜອງບົກ ) ແລະ ອັນດັບທີ 4 ເຮືອເທບທິລາດ ( ບ້ານປາກເປັ່ງ, ເມືອງທ່າແຂກ )ໄດ້ຮັບເງິນສົດ 6 ລ້ານກີບ. ເປັນກຽດມອບຂັນ ແລະ ລາງວັນ ໂດຍ ທ່ານ ແກ້ວອຸດອນ ບຸດສິງຂອນ ຮອງເຈົ້າແຂວງຄໍາມ່ວນ, ປະທານຈັດງານບຸນປະເພນີອອກພັນສາປະວໍລະນາ ແລະ ການແຂ່ງຂັນຊ່ວງເຮືອປະຈຳປີ 2023.
ຕະຫຼອດໄລຍະການດໍາເນີນງານບຸນແມ່ນໄດ້ຮັບຄວາມຮ່ວມມືຈາກທຸກພາກສ່ວນໃນການຮັກສາຄວາມສະຫງົບ ແລະ ຄວາມເປັນລະບຽບຮຽບຮ້ອຍເປັນຢ່າງດີ, ເຊິ່ງທາງຄະນະກຳມະການຮັບຜິດຊອບໄດ້ສົມທົບກັບກຳລັງ ປກຊ-ປກສ ຂັ້ນຕ່າງໆ ເຮັດໜ້າທີ່ດ້ວຍຄວາມຮັບຜິດຊອບສູງ, ທີ່ສໍາຄັນແມ່ນໄດ້ຮັບການປະກອບສ່ວນອຸປະຖຳຈາກບັນດາພາກສ່ວນບໍລິສັດ, ຫົວໜ່ວຍທຸລະກິດ ແລະ ຫ້າງຮ້ານທັງພາກລັດ ແລະ ເອກະຊົນໄດ້ທັງໝົດ 1,6 ຕື້ກວ່າກີບ, ພ້ອມນີ້ພາຍໃນງານຍັງມີການວາງຂາຍສິນຄ້າຂອງພໍ່ແມ່ປະຊາຊົນທີ່ມາຈາກບັນດາບ້ານ, ເມືອງ, ແຂວງ ແລະ ຕ່າງປະເທດຈຳນວນ 200 ກວ່າຮ້ານ ເພື່ອເປັນການແລກປ່ຽນຊື້-ຂາຍຮ່ວມກັນ ໃນງານບຸນຄັ້ງນີ້ຢ່າງເປັນຂະບວນຟົດຟື້ນ ແລະ ຄັບຄາໜາແໜ້ນ. ຄຽງຄູ່ກັບກິດຈະກຳແຂ່ງຂັນຊ່ວງເຮືອ ໃນຍາມຄໍ່າຄືນຂອງວັນທີ 29 ຕຸລາ 2023 ຍັງມີການລອຍກະໂທງ, ໄຫຼເຮືອໄຟ ແລະ ຊົມການສະແດງສີລະປະຈາກສູນ ສ.ວ.ດ ເພື່ອເປັນການອະນຸລັກຮັກສາຮີດຄອງປະເພນີ, ມູນເຊື້ອວັດທະນະທໍາອັນດີງາມຂອງຊາດໄວ້ໃຫ້ຄົນຮຸ້ນຫຼັງໄດ້ສຶກສາຮຽນຮູ້ ແລະ ສືບທອດຕໍ່ໄປ.
