ການແຂ່ງຂັນຊົກມວຍລາວລະດັບຊາດ 3 ຮຸ່ນ ຄື: ຮຸ່ນ 51 ກິໂລ, 57 ກິໂລ ແລະ 65 ກິໂລ ຊີງແຊ໋ມສາຍແອວກຽດຕິຄຸນ ຂອງທ່ານນາຍົກລັດຖະມົນຕີ ແຫ່ງ ສປປ ລາວ ເພື່ອເປັນການຄັດເລືອກເອົານັກກິລາມວຍດາວເດັ່ນໜຶ່ງດຽວຂອງ ສປປ ລາວ ໃນແຕ່ລະຮຸ່ນ ກຽມສົ່ງເຂົ້າຮ່ວມແຂ່ງຂັນໃນລະດັບພາກພື້ນ ແລະ ສາກົນໃນຕໍ່ໜ້າ, ເປັນການສ້າງຂະບວນການສະເຫຼີມສະຫຼອງວັນສ້າງຕັ້ງກອງທັບປະຊາຊົນລາວ ວັນທີ 20 ມັງກອນ ຄົບຮອບ 75 ປີ ແລະ ຕ້ອນຮັບປີທ່ອງທ່ຽວລາວ 2024 ໄດ້ເປີດການແຂ່ງ ຂັນຢ່າງເປັນທາງການ ໃນຕອນຄໍ່າຂອງວັນທີ 20 ມັງກອນ 2024 ທີ່ເວທີມວຍຊົ່ວຄາວ ເດີ່ນສູນການຄ້າພາກຊັນ, ນະຄອນ ຫຼວງວຽງຈັນ; ໂດຍການເຂົ້າຮ່ວມຂອງ ທ່ານ ສະເຫຼີມໄຊ ກົມມະສິດ ກໍາມະການກົມການເມືອງສູນກາງພັກ ຮອງນາຍົກລັດຖະມົນ ຕີ, ລັດຖະມົນຕີກະຊວງການຕ່າງປະເທດ, ທ່ານ ເອກະພັນ ພະພິ ທັກ ປະທານສະຫະພັນມວຍລາວແຫ່ງຊາດ ແລະ ທ່ານ ພຶດສະ ພາ ພູມມະສັກ ປະທານບໍລິສັດ ເອເຊຍລົງທຶນພັດທະນາ ແລະ ກໍ່ສ້າງ ຈຳກັດຜູ້ດຽວ ທັງເປັນຮອງປະທານສະຫະພັນມວຍລາວ ພ້ອມດ້ວຍຄະນະບໍລິຫານງານສະຫະພັນກິລາມວຍລາວແຫ່ງ ຊາດ, ແຂກຖືກເຊີນ, ບັນດານັກທຸລະກິດ ຕະຫຼອດຮອດແຟນມວຍລາວພັນແທ້ທົ່ວນະຄອນຫຼວງວຽງຈັນ ຮ່ວມຊົມແບບເຊິ່ງໜ້າ ກໍຄືແຟນມວຍລາວທົ່ວປະເທດ ຮ່ວມຊົມຜ່ານທາງອອນລາຍ.
ສໍາລັບການແຂ່ງຂັນມວຍລາວ ໃນຄັ້ງນີ້ ແມ່ນເປັນການແຂ່ງ ຂັນຮອບທຳອິດ ຫຼັງຈາກນັ້ນຈະຄັດເລືອກຜູ້ຊະນະເລີດພຽງໜຶ່ງດຽວໃນ 3 ຮຸ່ນ ຄື: ຮຸ່ນ 51 ກິໂລ, 57 ກິໂລ ແລະ 65 ກິໂລ ເພື່ອຄວ້າສາຍແອວກຽດຕິຄຸນ ຂອງທ່ານນາຍົກລັດຖະມົນຕີ ແຫ່ງ ສປປ ລາວ, ໂດຍໄດ້ມີການຂຶ້ນສັງວຽນກັນທັງໝົດ 14 ຄູ່. ໃນນີ້, ເປັນມວຍຮອບ 10 ຄູ່ ແລະ ມວຍປະກອບລາຍການ 4 ຄູ່. ການແຂ່ງຂັນມວຍລາວລະດັບຊາດຄັ້ງນີ້ ເພື່ອເປັນການຊອກຫານັກກິລາດາວເດັ່ນໜຶ່ງດຽວຂອງ ສປປ ລາວ ໃນຮຸ່ນນ້ຳໜັກ 51 ກິໂລ, ຮຸ່ນ 57 ກິໂລ ແລະ ຮຸ່ນ 65 ກິໂລ ແນໃສ່ເປັນການຄັດເລືອກເອົານັກກິລາທີ່ມີຄວາມສາມາດ ແລະ ເກັ່ງໆລະດັບຕົ້ນໆຂອງປະເທດ ເພື່ອຕິດທີມຊາດ ກຽມສົ່ງເຂົ້າຮ່ວມແຂ່ງຂັນລາຍການຕ່າງໆ ທັງພາຍໃນ ແລະ ຕ່າງປະເທດ ເວົ້າລວມ, ເວົ້າສະເພາະແມ່ນກຽມຄວາມພ້ອມໃຫ້ແກ່ງານມະຫະກຳກິລາຊີເກມ ຄັ້ງທີ 33 ທີ່ປະເທດໄທ ເປັນເຈົ້າພາບ ໃນປີ 2025.
ສ່ວນປະເພດເງິນລາງວັນ ຮຸ່ນນ້ຳໜັກ 57 ກິໂລ ແລະ ຮຸ່ນ 65 ກິໂລ ຊະນະເລີດ ໄດ້ຮັບສາຍແອວກຽດຕິຄຸນ ຂອງທ່ານນາຍົກ ລັດຖະມົນຕີ ແຫ່ງ ສປປ ລາວ ພ້ອມເງິນລາງວັນ 100 ລ້ານກີບ ແລະ ຮອງຊະນະເລີດ ໄດ້ຮັບເງິນລາງວັນ 50 ລ້ານກີບ; ສ່ວນຮຸ່ນນ້ຳໜັກ 51 ກິໂລ ໄດ້ຮັບສາຍແອວ ພ້ອມເງິນລາງວັນ 60 ລ້ານກີບ ແລະ ຮອງຊະນະເລີດ ໄດ້ຮັບເງິນລາງວັນ 30 ລ້ານກີບ.
ພາບ: ທະນູທອງ
