ກາເຟ ຖືເປັນຜົນຜະລິດກະສິກໍາທີ່ສໍາຄັນ ໃນຕ່ອງໂສ້ມູນຄ່າການຜະລິດອຸດສາຫະກໍາປຸງແຕ່ງອາ ຫານ ແລະ ເຄື່ອງດື່ມ ທີ່ມີການຊື້-ຂາຍ, ການສົ່ງອອກ ແລະ ການບໍລິໂພກທີ່ກວ້າງຂວາງໃນທົ່ວ ໂລກ. ເຊີ່ງຈະສັງເກດເຫັນໄດ້ການເພີ່ມຂື້ນຂອງຮ້ານກາເຟ ຢູ່ພາຍໃນປະເທດ ມີການຂະຫຍາຍເພີ່ມຂື້ນຢ່າງຫຼວງຫຼາຍ.ນີ້ແມ່ນຄຳເຫັນ ຂອງທ່ານ ບຸນເຖິງ ດວງສະ ຫວັນ ຮອງລັດຖະມົນຕີກະຊວງອຸດສະຫະກຳ ແລະ ການຄ້າ ຕໍ່ພິທີເປີດງານບຸນມະໂຫລານກາເຟພູພຽງບໍລະເວນປະຈຳປີ 2022 ທີ່ແຂວງຈຳປາສັກ ໃນວັນທີ 17 – 19 ກຸມພາ 2022 ຊຶ່ງທ່ານ ກ່າວອີກວ່າ:
ງານບຸນກາເຟ ຖືເປັນອີກພາກ ສ່ວນໜຶ່ງທີ່ສໍາຄັນ ໃນການຈັດຕັ້ງປະຕິບັດແຜນການສົ່ງອອກກາເຟລາວ ຫຼື Lao Coffee Export Road Map 2021-2025, ເປັນການເຕົ້າໂຮມເຕົ້າໂຮມເອົາທຸກຫົວໜ່ວຍທຸລະກິດ ທີ່ຕິດພັນກັບຂະແໜງກາເຟ ໄດ້ມາຮ່ວມກັນ ບໍ່ວ່າຈະເປັນ ຜູ້ຜະລິດ, ຜູ້ເກັບຊື້, ຜູ້ປຸງແຕ່ງ, ຮ້ານກາເຟ ( Barista ), ຜູ້ສົ່ງອອກ ແລະ ຄູ່ຮ່ວມພັດທະ ນາ ໄດ້ມາຮອດຖອນບົດຮຽນ, ແລກປ່ຽນບົດຮຽນການພັດທະ ນາຜະລິດຕະພັນ, ຈັບຄູ່ທຸລະກິດ ແລະ ແຜນການຂະຫຍາຍ-ການຕະຫຼາດກັບຄູ່ຮ່ວມພັດທະນາ. ຂ້າພະເຈົ້າເຊື່ອວ່າ ເວທີແຫ່ງນີ້ ຈະເຮັດໃຫ້ທຸກຄົນພວກເຮົາສາມາດຮຽນຮູ້ ແລະ ໄດ້ຮັບຂໍ້ມູນຂ່າວສານຢ່າງຮອບດ້ານ.
ໃນຄະນະປະຈຸບັນນີ້, ການສົ່ງອອກກາເຟ ໃນທົ່ວໂລກ ແມ່ນໄດ້ເພີ່ມຂື້ນ.
ສໍາລັບ ກະຊວງອຸດສາຫະກໍາ ແລະ ການຄ້າ ໃນບົດບາດການສົ່ງເສີມການສົ່ງອອກ, ໄລຍະຜ່ານມາ ພວກເຮົາໄດ້ນໍາພາຫົວໜ່ວຍທຸລະກິດກາເຟ ເຂົ້າຮ່ວມງານວາງສະແດງຢູ່ຕ່າງປະເທດ ເພື່ອຊຸກຍູ້ສົ່ງເສີມການສົ່ງອອກ, ການຊອກຕະຫຼາດ, ການຈັບຄູ່ທຸລະກິດ, ນອກຈາກນັ້ນ ພວກເຮົາກໍ່ໄດ້ດຶງການຊ່ວຍເຫຼືອ ຈາກອົງການຈັດ ຕັ້ງສາກົນ ພັດທະນາ, ສ້າງແຜນພັດທະນາສົ່ງເສີມ ການສົ່ງອອກກາເຟ ທີ່ຮູ້ກັນແມ່ນ Lao Coffee Export Road Map, ພວກເຮົາເຊື່ອໝັ້ນວ່າ ແຜນງານພັດທະນາການສົ່ງອອກກາເຟ ຈະຊ່ວຍສ້າງໃຫ້ ກາເຟລາວ ສາມາດສົ່ງອອກເພີ່ມຂື້ນ ແລະ ເຮັດໃຫ້ກາເຟລາວກາຍເປັນທີ່ຮູ້ຈັກຂອງຕະຫຼາດຕ່າງປະເທດ. ນອກນັ້ນ ການນໍາກາເຟລາວເຂົ້າເປັນສະມາ ຊິກຂອງອົງການກາເຟສາກົນ ຫຼື ICO ກໍເປັນເປົ້າໝາຍທີ່ຄາດໃວ້.
ໃນໂອກາດທີ່ທຸກອົງການຈັດຕັ້ງພາກລັດ, ອົງການສາກົນ ແລະ ພາກເອກະຊົນ ໄດ້ມາຮ່ວມງານຄັ້ງນີ້ ພວກເຮົາເຊື່ອໝັ້ນວ່າ ບັນ ດາອົງການສາກົນຈະສືບຕໍ່ຮ່ວມມືເຊີ່ງກັນ ແລະ ກັນ ປະ ສານແລກ ປ່ຽນບົດຮຽນ ຈັດຕັ້ງປະຕິບັດໂຄງການສົ່ງເສີມກາເຟລາວ ໃຫ້ໄປຕາມແລວທາງອັນດຽວກັນ ແລະ ສ້າງໃຫ້ກາເຟລາວເປັນທີ່ຍອມຮັບຂອງຜູ້ຊົມໃຊ້ ທັງພາຍ ໃນ ແລະ ຕ່າງປະເທດ. ກະຊວງອຸດສາຫະກໍາ ແລະ ການຄ້າ ຈະສູ້ຊົນສຸດຂີດ ໃນການສົ່ງເສີມການສົ່ງອອກກາເຟລາວ ໃຫ້ບັນລຸຕາມເປົ້າໝາຍທີ່ວາງໃວ້.
ເນັ້ນໃຫ້ສະມາຄົມກາເຟລາວ ເປັນຈຸດໃຈກາງເຕົ້າລວມເອົາຫົວ ໜ່ວຍທຸລະກິດກາເຟ, ກຸ່ມການຜະລິດ ເພື່ອກໍານົດແຜນງານ, ໂຄງການຊຸກຍູ້ສົ່ງເສີມ ແລະ ຜັນຂະຫຍາຍໃຫ້ສາມາດຈັດຕັ້ງປະຕິບັດໄດ້ຈີງ, ໂດຍນໍາໃຊ້ທ່າແຮງທີ່ມີ ເພື່ອສ້າງຄວາມເຂັ້ມແຂງ. ໃນນັ້ນ, ບັນດາໂຄງການຊຸກຍູ້ສົ່ງເສີມສ້າງຄວາມເຂັ້ມແຂງໃຫ້ແກ່ສະມາຄົມກາເຟລາວ ໄດ້ກໍານົດຢ່າງລະອຽດແລ້ວ ຈີ່ງຮຽກຮ້ອງມາຍັງສະມາຄົມກາເຟລາວ ເຮັດບົດບາດການນໍາພາຂອງຕົນ ໃຫ້ເປັນທີ່ຍອມຮັບຂອງສະມາຊິກພາຍໃນສະມາຄົມ. ຄຽງຄູ່ກັນນັ້ນ, ກະຊວງອຸດສາຫະກໍາ ແລະ ການຄ້າ ໄດ້ເຮັດໜ້າທີ່ໃນການເຈລະຈາ-ສ້າງເງື່ອນໄຂການເຂົ້າເຖີງຕະຫຼາດ, ອັດຕາພາສີ ການສົ່ງອອກປະເທດເປົ້າໝາຍ.
ເກດສະໜາ ແກ້ວສຸວັນນະແສງ
Loading...