ເນື່ອງໃນໂອກາດວັນສ້າງຕັ້ງວັນກຳມະກອນສາກົນ ຄົບຮອບ 138 ປີ (1 ພຶດສະພາ 1886-1 ພຶດສະພາ 2024) ທີ່ຈະມາເຖິງນີ້ , ສະຫາຍ ພັນໂທ ໄຊຊະນະ ທຳມະສອນ ຮອງຫົວໜ້າຫ້ອງການກຳມະບານກອງທັບ ໃຫ້ສຳພາດວ່າ: ໂດຍປະຕິບັດຕາມແຈ້ງການຂອງສູນກາງສະຫະພັນກຳມະບານລາວ ສະບັບເລກທີ 377/ສກລ, ລົງວັນທີ 02 ເມສາ 2024 ວ່າດ້ວຍການສະເຫລີມສະຫລອງວັນກໍາມະກອນສາກົນ ຄົບຮອບ 138 ປີ ໃຫ້ເປັນຂະບວນຟົດຟື້ນກວ້າງຂວາງ, ຫ້ອງການກຳມະບານກອງທັບ ກໍໄດ້ສ້າງແຜນການກະກຽມຈັດຕັ້ງສະເຫລີມສະຫລອງວັນສຳຄັນດັ່ງກ່າວ. ໃນນີ້, ໄດ້ອອກແຈ້ງການເຖິງບັນດາສະຫະພັນກຳມະບານ, ກຳມະບານຮາກຖານ, ບັນດາບໍລິສັດ, ລັດວິສາຫະກິດ, ໂຮງຈັກ, ໂຮງງານ, ກົມກອງຜະລິດ ແລະ ບໍລິການທີ່ຂຶ້ນກັບກອງທັບ ໃຫ້ຈັດຕັ້ງປາຖະກະຖາລະນຶກຫວນຄືນມູນເຊື້ອປະຫວັດຄວາມເປັນມາຂອງວັນກຳມະກອນສາກົນຕາມເງື່ອນໄຂ ແລະ ຄວາມສາມາດຕົວຈິງ, ຈັດຕັ້ງຂະບວນການແຂ່ງຂັນກິລາ, ສິລະປະວັນນະຄະດີ ແລະ ຂະບວນການອອກແຮງງານລວມ ຕາມເງື່ອນໄຂຕົວຈິງຂອງແຕ່ລະກົມກອງກຳມະບານຮາກຖານ. ພິເສດໃນວັນທີ 1 ພຶດສະພາ 2024 ຈະໄດ້ເຕົ້າໂຮມເອົາບັນດາສະມາຊິກກຳມະບານກົມກອງຮາກຖານເຂດໃຈກາງເຂົ້າຮ່ວມຍ່າງເພື່ອສຸຂະພາບ ທີ່ສູນກາງສະຫະພັນກຳມະບານ ຈັດຂຶ້ນຢູ່ທີ່ສວນປະຕູໄຊ ຄາດວ່າຈະມີຈໍານວນພົນເຂົ້າຮ່ວມ 500 ກວ່າສະຫາຍ.
ສະຫາຍຮອງຫົວໜ້າຫ້ອງການກຳມະບານກອງທັບ ຍັງໃຫ້ຮູ້ຕື່ມວ່າ: ໄປພ້ອມກັນນັ້ນ, ສະຫະພັນກຳມະບານ, ກຳມະບານຮາກຖານແຕ່ລະຂັ້ນໃນກອງທັບ ຍັງໄດ້ຍົກສູງຄວາມສາມາດໃນການຈັດຕັ້ງນໍາພາ ແລະ ການເປັນແບບຢ່າງຂອງກຳມະບານແຕ່ລະຂັ້ນ; ຂະຫຍາຍການຈັດຕັ້ງກຳມະບານຢູ່ຕາມຮາກຖານ ແລະ ຫົວໜ່ວຍແຮງງານໃນກອງທັບໃຫ້ທົ່ວເຖິງ ເພື່ອເພີ່ມກໍາລັງແຮງຂອງອົງການຈັດຕັ້ງກຳມະບານໃນກອງທັບ ໃຫ້ຮັບປະກັນທາງດ້ານປະລິມານ ແລະ ຄຸນນະພາບ ສາມາດເປັນຕົວແທນການປົກປ້ອງສິດຜົນປະໂຫຍດ ອັນຊອບທຳຂອງສະມາຊິກກຳມະບານ, ກຳມະກອນ ແລະ ຜູ້ອອກແຮງງານໃຫ້ໄປສູ່ຄຸນນະພາບໃໝ່, ຮັບປະກັນ ຄວາມສະເໝີພາບ ແລະ ຍຸຕິທໍາ ໃນການຊົມໃຊ້ໝາກຜົນຂອງການອອກແຮງງານ.
ພາລະກຳປະຫວັດສາດຂອງຊົນຊັ້ນກຳມະກອນ ໄດ້ຊີ້ໃຫ້ພວກເຮົາເຫັນຢ່າງຈະແຈ້ງວ່າ: ຊົນຊັ້ນກຳມະກອນ ແມ່ນຊົນຊັ້ນນໍາໜ້າຂອງຍຸກສະໄໝຕິດພັນກັບພື້ນຖານການຜະລິດ, ມີລະບຽບວິໄນ, ເປັນຜູ້ມີຫົວຄິດປະດິດສ້າງ, ມີຄວາມສາມາດພຽງພໍໃນການສ້າງສັງຄົມໃໝ່ ທີ່ກ້າວໜ້າສີວິໄລ ແລະ ຍຸຕິທໍາໃຕ້ການນຳພາຂອງພັກ.
ສະນັ້ນ, ໃນໂອກາດວັນສ້າງຕັ້ງວັນກໍາມະກອນສາກົນ ຄົບຮອບ 138 ປີ ສະຫາຍ ພັນໂທ ໄຊຊະນະ ທໍາມະສອນ ຍັງໄດ້ຕາງໜ້າຄະນະນໍາອົງການຈັດຕັ້ງກໍາມະບານກອງທັບ ກໍຄື ພະນັກງານ, ສະມາຊິກກຳມະບານ, ກຳມະກອນ, ຜູ້ອອກແຮງງານທົ່ວກອງທັບ ອວຍພອນໄຊອັນປະເສີດແດ່ບັນດາການນໍາພັກ-ລັດ, ການນໍາກະຊວງປ້ອງກັນປະເທດ, ການນໍາສູນກາງສະຫະພັນກຳມະບານລາວ ຈົ່ງມີສຸຂະພາບເຂັ້ມແຂງ, ມີຄວາມຜາສຸກໃນຊີວິດສ່ວນຕົວ-ຄອບຄົວ ແລະ ສືບຕໍ່ໃຫ້ການນໍາພາ-ຊີ້ນໍາອົງການຈັດຕັ້ງກຳມະບານລາວ ເວົ້າລວມ, ເວົ້າສະເພາະອົງການຈັດຕັ້ງກຳມະບານກອງທັບປະຊາຊົນລາວ ໃຫ້ມີຄວາມໜັກແໜ້ນເຂັ້ມແຂງ, ເຕີບໃຫຍ່ຂະຫຍາຍຕົວ ກ້າວຂຶ້ນຢ່າງບໍ່ຢຸດຢັ້ງ, ອວຍພອນໃຫ້ບັນດາສະຫາຍພະນັກງານ, ສະມາຊິກກຳມະບານ, ກຳມະກອນ, ຜູ້ອອກແຮງງານລາວ ທຸກທົ່ວໜ້າ ຈົ່ງມີສຸຂະພາບແຂງແຮງ ແລະ ມີຜົນງານໃໝ່ໃຫຍ່ຫລວງກວ່າເກົ່າ.
ຂ່າວ: ບິກໄຊ ສົມພູ
