ໃນວັນທີ 25 ພຶດສະພາ 2024 ຜ່ານມາ, ສູນວັດທະນະທຳຈີນ ປະຈຳລາວ ຈັດກິດຈະກຳ ຊາສູ່ຄວາມປອງດອງ ເພື່ອພົບປະແລກປ່ຽນວັດທະນະທຳ ນາມມະທຳ ຜູເອີ ຄັ້ງທີ 2 ເຊິ່ງປີນີ້ໄດ້ເຊື້ອເຊີນສຳມະນາກອນ ຈາກຊຸດຝຶກອົບຮົມການປົກປັກຮັກສາມໍລະດົກວັດທະນະທຳ ນາມມະທຳ ສໍາລັບປະເທດລາວ ທີ່ຫາກໍ່ສຳເລັດການຝຶກອັບຮົມ ຢູ່ນະຄອນຜູເອີ ປະເທດຈີນ ມາເປັນຜູ້ເຂົ້າຮ່ວມຫລັກໃນກິດຈະກຳໃນຄັ້ງນີ້ ເພື່ອແລກປ່ຽນປະສົບການ ແລະ ຄວາມຮູ້ສຶກກ່ຽວກັບວຽກງານການປົກປັກຮັກສາ ມໍລະດົກວັດທະນະທຳ ນາມມະທຳ ລະຫວ່າງ ລາວ-ຈີນ, ສຳຜັດ ແລະ ຖອດຖອນບົດຮຽນກັບວັດທະນະທຳຊາຂອງຈີນ ທີ່ມີມາແຕ່ບູຮານນະການ ແລະ ໂອ້ລົມກ່ຽວກັບມິດຕະພາບອັນເລິກເຊິ່ງທີ່ມີຕັ້ງແຕ່ອະດີດລະຫວ່າງສອງຊາດ ລາວ-ຈີນ.
ໃນໂອກາດນີ້, ທ່ານ ນາງ ຫລີ ຢີ່ຜິງ ຫົວໜ້າສູນວັດທະນະທຳຈີນ ປະຈຳ ສປປ ລາວ ໄດ້ສະແດງຄວາມຂອບໃຈມາຍັງ ກະຊວງຖະແຫລງຂ່າວ ວັດທະນະທຳ ແລະ ທ່ອງທ່ຽວ ແຫ່ງ ສປປ ລາວ ແລະ ສູນຝຶກອົບຮົມສາກົນດ້ານມໍລະດົກວັດທະນະທຳ ນາມມະທຳ ຂົງເຂດອາຊີປາຊີຟິກ ຂອງອົງການ ອຸຍແນັສໂກ(UNESCO) ທີ່ໄດ້ໃຫ້ຄວາມສຳຄັນ ຕໍ່ກິດຈະກຳໃນຄັ້ງນີ້. ໃນມໍ່ໆມານີ້, ໄດ້ສຳເລັດການຝຶກອົບຮົມໃຫ້ພະນັກງານ ກະຊວງຖະແຫລງຂ່າວ ວັດທະນະທຳ ແລະ ທ່ອງທ່ຽວ ທີ່ປະເທດຈີນ ແນໃສ່ແລກປ່ຽນວັດທະນະທຳ ແລະ ທ່ອງທ່ຽວ ລາວ-ຈີນ ທີ່ຈະຕ້ອງສົ່ງເສີມການແລກປ່ຽນຮ່ວມມືລາວ-ຈີນ ໃຫ້ກ້າວສູ່ລະດັບໃໝ່.
ທ່ານ ນາງ ບົວໄຂ ເພັງພະຈັນ ຫົວໜ້າກົມສິລະປະວັດທະນະ ທຳ ໄດ້ກ່າວວ່າ: ການຢື່ນຄຳຮ້ອງກ່ຽວກັບມໍລະດົກ ວັດທະນະທຳ ນາມມະທຳ ເປັນວຽກງານໜຶ່ງທີ່ມີຄວາມຫຍຸ້ງຍາກຫລາຍ, ປະເທດຈີນ ເປັນປະເທດທີ່ມີມໍລະດົກວັດທະນະທຳ ນາມມະທຳຫລວງຫລາຍ, ມີວິທີການປົກປັກຮັກສາ ແລະ ປະສົບການການຢື່ນຄຳຮ້ອງຊັບພະຍາກອນດ້ານມໍລະດົກ ວັດທະນະທຳ ນາມມະທຳ ທີ່ອຸດົມສົມບູນ, ຫວັງຢ່າງຍິ່ງວ່າ ໃນອະນາຄົດຈະຍັງສືບຕໍ່ຈັດຝຶກອົບຮົມທີ່ດີແບບນີ້ ໃຫ້ແກ່ປະເທດລາວຕໍ່ໄປ ເພື່ອຍົກສູງລະດັບໃຫ້ກັບການປະຕິບັດວຽກງານ ປົກປັກຮັກສາມໍລະດົກວັດທະນະທຳ ນາມມະທຳ ຂອງ ສປປ ລາວ.
ຂ່າວ-ພາບ: ສູນວັດທະນະທຳຈີນປະຈຳລາວ
