ON AIR

ຟັງວິທະຍຸ FM103.7Mhz ອອນລາຍ
Listen to Radio FM103.7Mhz Online

ກິດຈະກຳຫຼັກເພື່ອສະເຫຼີມສະຫຼອງປີທ່ອງທ່ຽວລາວ 2018 ແລະ ເທດສະການດື່ມນໍ້າຊາ ແຂວງ ຜົ້ງສາລີ ຈັດຂຶ້ນໃນຕອນເຊົ້າວັນທີ 9 ພະຈິກ 2018

ງານ ກິດຈະກຳຫຼັກເພື່ອສະເຫຼີມສະຫຼອງປີທ່ອງທ່ຽວລາວ 2018 ແລະ ເທດສະການດື່ມນໍ້າຊາ ແຂວງ ຜົ້ງສາລີ ຈັດຂຶ້ນໃນວັນທີ 9 ພະຈິກ 2018 ທີ່ສະໜາມກິລາແຂວງຜົ້ງສາລີ ໂດຍການເປັນກຽດເຂົ້າຮ່ວມ ຂອງທ່ານ ສອນໄຊ ສີພັນດອນ ກຳມະການກົມການເມືອງ ສູນກາງພັກ, ຮອງນາຍົກລັດຖະມົນຕີ, ທ່ານ ຄຳເຈນ ວົງໂພສີ ເຈົ້າແຂວງແຂວງຜົ້ງສາລີ, ທ່ານ ອຸ່ນທວງ ຂາວພັນ ຮອງລັດຖະມົນຕີ ກະຊວງຖະແຫຼງຂ່າວວັດທະນະທຳ ແລະທ່ອງທ່ຽວ ພ້ອມດ້ວຍແຂກທັງພາຍໃນແລະຕ່າງປະເທດ.

ງານ ໄດ້ເລີ່ມຂຶ້ນດ້ວຍການ ສວນສະໜາມ ຂອງກ້ອນກຳລັງ​ ​ຊາວ​ໝຸ່ມ, ເຍົາວະ​ຊົນ, ​ນັກຮຽນ​ຮູ້-ນັກ​ສຶກສາປັນຍາ​ຊົນ, ກ້ອນກໍາລັງສຽງແຄນລາວ ກັບ ຂະບວນແຫ່ຕົ້ນຊາ ແລະ ກ້ອນ​ກຳລັງຊົນເຜົ່າຈໍານວນ​ 15 ຊົນ​ເຜົ່າທີ່​ມາຈາກ 07 ​ເມືອງ ທົ່ວແຂວງ. ໂອກາດຂຶ້ນລາຍການ ການກະກຽມ ຈັດກິດຈະກຳຫຼັກເພື່ອສະເຫຼີມສະຫຼອງປີທ່ອງທ່ຽວລາວ 2018 ແລະ ເທດສະການດື່ມນໍ້າຊາ ແຂວງ ຜົ້ງສາລີ ທ່ານ ທອງສີເສົາສຸລິພົມ, ຮອງເຈົ້າແຂວງຜົ້ງສາລີ, ປະທານຈັດງານ ໄດ້ໃຫ້ຮູ້ວ່າ: ການຫ້າງຫາກະກຽມໄດ້ເລີ່ມມາແຕ່ທ້າຍເດືອນ ຕຸລາ 2017  ໂດຍເຈົ້າ​ແຂວງ-ແຂວງຜົ້ງ ສາລີ ​ໄດ້​ອອກ​ຂໍ້​ຕົກລົງ​ແຕ່ງຕັ້ງຄະນະ​ຮັບຜິດຊອບຊີ້​ນຳ​ລວມ ​ແລະ ບັນດາ​ອະນຸ​ກຳມະການກະກຽມຈັດງານ​ປີ​ທ່ອງ​ທ່ຽວ 2018 ຂອງ​ແຂວງ​ຜົ້ງສາລີ     ພ້ອມ​ທັງ​ໄດ້​ຈັດ​ກອງ​ປະຊຸມ​ປຶກສາ​ຫາລື​​ແບ່ງ​ຄວາມ​ຮັດ​ຜິດ​ຊອບ​ ໃຫ້​ແຕ່​ລະ​ອະນຸ​ກຳມະການຢ່າງຈະ​ແຈ້ງ, ຮັບຮອງ​ເອົາ​ລາຍການ​​ກິດຈະກຳ ​ຕ່າງໆ ຂອງ​ບັນດາ​ເມືອງ ​ແລະ ຂອງ ແຂວງ, ສ້າງ​ແຜນການ​ເຄື່ອນ​ໄຫວແຕ່ປີ 2017 ຫາ 2018, ວຽກ​ງານ​ ​ແຕ່​ລະ​ດ້ານ ສ່ວນ​ໃຫຍ່​ແມ່ນ​ປະຕິບັດ​ຕາມ​ແຜນການ ແລະ ຄາດໝາຍ​ທີ່​ກຳນົດໄວ້. ບັນດາ​ ການ​ນຳ​ພັກ-ລັດ, ອົງການ​ຈັດຕັ້ງສັງຄົມ ​ແລະ ມວນ​ຊົນ​ຊາວ​ແຂວງ​ຜົ້ງສາລີ  ​ໄດ້​ໃຫ້ຄວາມ​ສຳຄັນ ​ແລະ ສະໜັບສະໜູນ​ການ​ກະກຽມ​ຈັດ​ງານ​ ​ເປັນ​ຢ່າງ​ດີ.  ມາ​ຮອດ​ວັນ​ທີ 23 ກຸມພາ  2018 ​ໄດ້ຈັດ​ພິທີ​ຖະ​ແຫຼ​ງຂ່າວ​ຕໍ່​ ສື່​ມວນ​ຊົນ  ທີ່​ຫໍ​ວັດທະນະທຳ​ແຂວງ ເພື່ອ​ປຸກລະດົມ​ທົ່ວ​ປວງ​ຊົນ​ຊາວ​ແຂວງ​ຜົ້ງສາລີ​ໃຫ້ເຂົ້າມາ​ມີ​ສ່ວນ​ຮ່ວມ​ ​ສ້າງ​ຂະ​ບວນການໃນຄັ້ງນີ້. ພ້ອມ ​ນັ້ນ​ຢູ່​ບັນດາ​ເມືອງ ໄດ້​ກຳນົດສ້າງ​ແຜນ​ກິດຈະກຳງານ​ບຸນຕ່າງໆ  ​ເພື່ອ ​ສ້າງ​ຂະ​ບວນການ​ຕ້ອນຮັບ​ປີທ່ອງ​ທ່ຽວລາວ 2018  ໄດ້ສໍາເລັດການຈັດງານ ປີທ່ອງທ່ຽວລາວ 2018 ແລະ ຕິດພັນກັບກິດຈະກໍາຂອງ​ແຕ່ລະ​ເມືອງ​ແລ້ວ. ການຈັດ ກິດຈະກຳຫຼັກເພື່ອສະເຫຼີມສະຫຼອງປີທ່ອງທ່ຽວລາວ 2018 ແລະ ເທດສະການດື່ມນໍ້າຊາ ແຂວງ ຜົ້ງສາລີ ໄດ້ເລີ່ມຈັດຕັ້ງສະເຫຼີມສະຫຼອງ ມາແຕ່ວັນທີ 7 ພະຈິກ 2018 ປະກອບມີ ​ເທດສະການ​ດື່ມນ້ຳຊາ ຈໍານວນ 07 ຮ້ານ ມາຈາກບັນດາໂຮງງານປຸງແຕ່ງຊາຂອງແຂວງ, ງານ​ຕະຫຼາດນັດ, ​ວາງສະ​ແດງ​ສິນ​ຄ້າ ​ແລະ ຜະລິດ​ຕະພັນ​ຊົນ​ເຜົ່າ ເປັນ​ຕົ້ນ​ແມ່ນສິນ​ຄ້າ​ກະ​ສີກຳອຸດ​ສະຫະ​ກຳ ​ແລະ ​ເຄື່ອງ​ຫັດຖະກຳ ທີ່​ເປັນ​ເອກະລັກ​ຂອງ​ປະຊາຊົນ​ບັນດາ​ເຜົ່າທີ່​ນຳ​ມາ​ຈາກ​ບັນດາ​ເມືອງພາຍໃນ​ແຂວງ ແລະ ສິນ​ຄ້າ​ຈາກ​ລາຊະອານາຈັກ​ໄທ, ຫວຽດນາມ ​ແລະ ຈີນຈຳນວນ 60 ກວ່າ​ຮ້ານ ລວມທັງສູນ ຂໍ້​ມູນ​ຂ່າວສານ​ການທ່ອງທ່ຽວຂອງແຂວງຜົ້ງສາລີ. ​ໃນ​ນີ້ ສິນ​ຄ້າ​ໜຶ່ງ​ເມືອງ​​ໜຶ່ງ​ຜະລິດ​ຕະພັນ  ຫຼື(ODOP) ຂອງ​ເມືອງ​ຜົ້ງສາລີມີ ​ເຫຼົ້າ​ຂຽວ, ຊາບັ້ງ, ຊາ​ຂຽວ ​ແລະ ​ຊາ​ພະຍາ​ສີ. ເມືອງຍອດອູມີ ຫັດຖະກຳ​ຈັກສານໄມ້ປ່ອງ,  ເມືອງບຸນ​ໃຕ້ມີ ​​​ເຄື່ອງ​ຫັດຖະກຳ​ຕໍ່າ​ທູ​ກທໍໄໜ. ເມືອງ​ຂວາມີ ນ້ຳ​ເຜີ້ງ, ໝັງ​ຍຳ, ​ໄຄ​ແຜ່ນ ​ແລະ ຊາ​ປ່າ, ເມືອງ​ໃໜ່ມີ ​ເຄື່ອງ​ຫັດຖະກຳ​ຕໍ່າ​ຫູກທໍໄໜ ​ແລະ ນ້ຳ​ເຜີ້ງ.  ລວມ​ ​ມູນ​ຄ່າ​ຂອງ​ສິນ​ຄ້າ​ທັງ​ໝົດ​ໃນ​ງານ​ນີ້ ​ປະມານ 1 ຕື້ກ່ວາກີບ, ຄາດຄະ​ເນ​ຜູ້​ເຂົ້າ​ຮ່ວມ ​ແລະ ຊົມ​ງານ ​ຄັ້ງ​ນີ້​ມີ​ປະມານ 2.000 ກ່ວາ​ຄົນ. ກິດຈະກຳ ສະ​ແດງ​ສິລະ​ປະ​ວັນນະຄະດີ​ຂອງ​ຊົນ​ເຜົ່າ ສ່ອງແສງໃຫ້ເຫັນຄວາມ​ແຕກ​ຕ່າງ ທາງ​ດ້ານ​ວິທີ​ການ​ດຳ ລົງ​ຊີວິດ ແລະ ຮີດຄອງ​ປະ​ເພ​ນີອັນ​ດີ​ງາມ​ຂອງ​ແຕ່ລະ​ເຜົ່າ ທີ່​ມາ​ຈາກບັນດາ​ເມືອງມີ 30 ລາຍການ ຈາກ 15 ຊົນເຜົ່າ, ​ສີລະປະກອນຂອງແຂວງ ມີ 04 ລາຍການ, ລວມຫວັງ​ໝົດ 34 ລາຍການ.

ທ່ານ ຄຳເຈນ ວົງໂພສີ ເຈົ້າແຂວງແຂວງຜົ້ງສາລີ ໄດ້ມີຄວາມເຫັນໄຂງານ ວ່າ: ຜົ້ງສາລີ ເປັນແຂວງໜຶ່ງທີ່ມີຄວາມອຸດົມສົມບູນທາງດ້ານທຳມະຊາດ ແລະ ວັດທະນະທຳສັງຄົມ ເປັນແຂວງວິລະຊົນໃນສະໄໝຕໍ່ສູ້ປົດປ່ອຍຊາດ. ມື້ນີ້ຊາວແຂວງຜົ້ງສາລີ ສຸດທີ່ມີຄວາມພາກພູມໃຈ ແລະ ເອກອ້າງທະນົງໃຈຕໍ່ຜົນງານ ແລະ ໄຊຊະນະແຫ່ງກ້ອນກໍາລັງມະຫາສາມັກຄີ ອັນເປັນປຶກແຜ່ນແໜ້ນໜາຂອງທົ່ວປວງຊົນ ໃນພາລະກິດແຫ່ງການປົກປັກຮັກສາ ແລະ ສ້າງສາພັດປະເທດຊາດ ກໍຄືແຂວງຜົ້ງສາລີ ໃຫ້ຮັ່ງມີເຂັ້ມແຂງ ຕໍ່ເນື່ອງ

ຈາກນັ້ນ ທ່ານ ສອນໄຊ ສີພັນດອນຮອງນາຍົກລັດຖະມົນຕີ ພ້ອມດ້ວຍ ທ່ານ ຄຳເຈນ ວົງໂພສີ ແລະແຂກຮັບເຊີນ ໄດ້ ລັ່ນຄ້ອງ 9 ບາດ ແລະ ປ່ອຍປຸ້ມເປົ້າ ເພື່ອເປັນສັນລັກ ການເປີດງານໃນຄັ້ງນີ້. ຈາກນັ້ນ ທ່ານ ສອນໄຊສີພັນດອນ ພ້ອມດ້ວຍຄະນະຍັງໄດ້ ໄປທ່ຽວຊົມການວາງສະແດງສິນຄ້າ ແລະ ຊີມ ​ອາຫານ​ພື້ນ​ເມືອງຂອງ ບັນດາ​ເຜົ່າຈຳນວນ 30 ລາຍການ, ພ້ອມທັງ ໄດ້ທ່ຽວ​ຊົມງານ​ຕະຫຼາດນັດ, ​ວາງສະ​ແດງຂາຍ​ສິນ​ຄ້າ ​ແລະ ຜະລິດ​ຕະພັນ​ຊົນ​ເຜົ່າ ລວມທັງສິນ​ຄ້າກະ​ສິກຳ​, ອຸດ​ສາຫະ​ກຳ, ​ຫັດຖະກຳຕໍ່າຫູກທໍໄໜ ທີ່​ເປັນ​ເອກະລັກ​ ຂອງ​ປະຊາຊົນ​ບັນດາ​ເຜົ່າທີ່​ນຳ​ມາ​ຈາກ 07 ​ເມືອງ ພາຍໃນ​ແຂວງນຳ​ອີກ.