ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ສະຖາບັນເລືອດແຫ່ງຊາດ ອົງການກາແດງແຫ່ງຊາດລາວ ຮ່ວມກັບ ສູນການຄ້າວຽງຈັນເຊັນເຕີ ຈັດກິດຈະກຳບໍລິຈາກເລືອດເພື່ອຕໍ່ຍອດໃຫ້ແກ່ອີກຫຼາຍຊີວິດ ເນື່ອງໃນໂອກາດສະເຫຼີມສະຫຼອງວັນກາແດງ ແລະ ຊີກວົງເດືອນແດງສາກົນ ຄົບຮອບ 161 ປີ (8/5/1863-8/5/2024) ຂຶ້ນທີ່ສູນການຄ້າວຽງຈັນເຊັນເຕີ ໂດຍມີ ທ່ານ ຈັນທະລາ ສຸກສາຄອນ ຫົວໜ້າສະຖາບັນເລືອດແຫ່ງຊາດ ພ້ອມດ້ວຍບັນດາພະນັກງານກ່ຽວຂ້ອງ ແລະ ມີບັນດາມວນຊົນ ທັງນັກຮຽນ-ນັກສຶກສາ ເຂົ້າຮ່ວມຢ່າງຫຼວງຫຼາຍ.
ທ່ານ ຈັນທະລາ ສຸກສາຄອນ ກ່າວວ່າ: ໃນນາມກອງເລຂາຄະນະກຳມະການສົ່ງເສີມການບໍລິຈາກເລືອດ-ສົ່ງເລືອດແຫ່ງຊາດ ສະຖາບັນເລືອດ ຮ່ວມກັບສູນການຄ້າວຽງຈັນເຊັນເຕີ ຈັດກິດຈະກຳນີ້ຂຶ້ນ ເພື່ອສະເຫຼີມສະຫຼອງວັນກາແດງ ແລະ ຊີກວົງເດືອນແດງສາກົນ ຄົບຮອບ 161 ປີ ພາຍໃຕ້ຫົວຂໍ້ “ຮັກສາຫຼັກມະນຸດສະທໍາໃຫ້ຄົງຢູ່” ຫຼື “Keeping Humanity” ຊຶ່ງມີຈຸດປະສົງເພື່ອແກ້ໄຂການຂາດເລືອດທີ່ມີຢູ່ໃນສະພາບປັດຈຸບັນ ແລະ ເພື່ອເປັນການຢໍ້າເຕືອນເຖິງສັດຕະຍາບັນອັນຍືນຍົງຂອງຂະບວນການກາແດງ ແລະ ຊີກວົງເດືອນແດງສາກົນ ທີ່ຕ້ອງການຮັກສາກຽດສັກສີຂອງມະນຸດ, ບັນເທົາຄວາມທຸກ ແລະ ຂະຫຍາຍການຊ່ວຍເຫຼືອປະຊາຊົນທີ່ກຳລັງປະເຊີນກັບສະຖານະການຮ້າຍແຮງ ໂດຍສະເພາະແມ່ນປະຊາຊົນຢູ່ເຂດຫ່າງໄກສອກຫຼີກ ແລະ ເຂົ້າເຖິງຫຍຸ້ງຍາກ.
ປີນີ້ ກໍເໝືອນດັ່ງທຸກໆປີ ທີ່ຄະນະກຳມະການກາແດງສາກົນ (ICRC), ສະຫະພັນກາແດງ ແລະ ຊີກວົງເດືອນແດງສາກົນ (IFRC) ຮ່ວມກັບ ບັນດາສະພາ, ອົງການກາແດງ ແລະ ຊີກວົງເດືອນແດງ ຫຼາຍ 190 ກວ່າປະເທດທົ່ວໂລກ ຮ່ວມກັນສະເຫຼີມສະຫຼອງ ເພື່ອຢັ້ງຢືນເຖິງຄວາມມຸ່ງໝັ້ນອັນໜັກແໜ້ນຂອງຂະບວນການກາແດງ ແລະ ຊີກວົງເດືອນແດງສາກົນ ຕໍ່ມວນມະນຸດຊາດ ພ້ອມທັງສະທ້ອນເຖິງ ຫຼກການພື້ນຖານກາແດງ ແລະ ຊີກວົງເດືອນແດງຂອງພວກເຮົາ ປະກອບມີ: ມະນຸດສະທຳ (Humanity); ທ່ຽງທຳ (Impartiality); ເປັນກາງ (Neutrality); ເອກະລາດ (Independence); ສະໝັກໃຈ (Voluntary Service); ເອກະພາບ (Unity); ນໍ້າໃຈສາກົນ (Universality).
ສຳລັບກິດຈະກຳບໍລິຈາກເລືອດ ເພື່ອຕໍ່ຍອດໃຫ້ແກ່ອີກຫຼາຍຊີວິດ ທີ່ຈັດຂຶ້ນຄັ້ງນີ້, ຄາດວ່າຈະໄດ້ຮັບເລືອດຫຼາຍກວ່າ 300 ຖົງ.
(ຂ່າວ-ພາບ: ສຸກສະຫວັນ)