ວັນທີ 19 ມີນາ 2024, ອົງການປົກຄອງແຂວງຄຳມ່ວນ ຮ່ວມ ກັບສະມາຄົມຂີ່ລົດຖີບແຂວງຄໍາມ່ວນ ຈັດກິດຈະກໍາຂີ່ລົດຖີບເພື່ອສຸຂະພາບ ເພື່ອລະ ນຶກເຖິງວັນວັນເສຍອົງຄະ ແລະ ເສຍສະຫລະຊີວິດເພື່ອປະເທດ ຊາດ ຄົບຮອບ 78 ປີ ພາຍໃຕ້ຫົວຂໍ້ “ຖີບເພື່ອລຸງ” ທີ່ຫໍຈາລຶກປະຫວັດສາດ 21 ມີນາ 1946 ບ້ານທ່າແຂກກາງ, ເມືອງທ່າແຂກ.
ການຂີ່ລົດຖີບຄັ້ງນີ້ ມີໄລຍະທາງ 15 ກິໂລແມັດ ໂດຍເລີ່ມຕົ້ນອອກຈາກຫໍຈາລຶກປະຫວັດສາດ 21 ມີນາ 1946 ບ້ານທ່າແຂກກາງ ໄປຕາມຖະໜົນກຸວໍລະວົງຮອດວົງວຽນຫລັກ 2 ແລ້ວລ້ຽວຂວາໄປຮອດເສັ້ນທາງສາມແຍກຫລັກ 5 ບ້ານຄໍາບອນ ໄປຮອດອານຸສອນສະຖານປະທານສຸພານຸວົງ ແລ້ວຖີບກັບຄືນຮອດ 3 ແຍກອະນຸສາວະລີ ປະທານໄກສອນ ພົມວິຫານ ເພື່ອກັບໄປຫາຫໍຈາລຶກປະຫວັດສາດ 21 ມີນາ 1946.
ໃນໂອກາດດຽວກັນນີ້ ຍັງມີການມອບເສື້ອ ທີ່ມີສັນຍາລັກຫໍຈາລຶກປະຫວັດສາດ 21 ມີນາ 1946 ໃຫ້ສະຫະພັນແມ່ຍິງແຂວງຈໍານວນ 25 ໂຕ ແລະ ນັກຮຽນທີ່ເຂົ້າຮ່ວມກິດຈະກໍາຈໍານວນ 28 ໂຕ, ເຊິ່ງຕາງໜ້າມອບໂດຍທ່ານ ເດດສັກດາ ມະນີຄໍາ ຫົວໜ້າພະແນກແຜນການ-ການລົງທຶນ ແຂວງຄໍາມ່ວນ.
ຂ່າວ-ພາບ: ແດງສະຫວັດ ແສນພານິດ
