ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ຈັດກິດຈະກໍາລ້າງມື ເນື່ອງໃນວັນລ້າງມືສາກົນ ວັນທີ 5 ພຶດສະພາ

ອົງການອະນາໄມໂລກຮ່ວມກັບກົມອະນາໄມ ແລະ ສົ່ງເສີມສຸຂະພາບກະຊວງສາທາລະນະສຸກຈັດກິດຈະກໍາລ້າງມື ເນື່ອງໃນວັນລ້າງມືສາກົນ ວັນທີ 5 ພຶດສະພາໃນຕອນເຊົ້າມື້ນີ້( 4 ພຶດສະພາ ) ທີ່ກະຊວງສາທາລະນະສຸກ ນະຄອນຫລວງວຽງຈັນ ມີຮອງສາດສະດາຈານ ດຣ ພູທອນ ເມືອງປາກ ຮອງລັດຖະມົນຕີກະຊວງສາທາລະນະສຸກ, ດຣ ໂຮໂຟດ ໂສເບວ ຕາງໜ້າອົງການອະນາໄມໂລກປະຈໍາລາວ, ດຣ ພອນປະເສີດ ອຸນາພົມ ຫົວໜ້າກົມອະນາໄມ ແລະ ສົ່ງເສີມສຸຂະພາບ ພ້ອມດ້ວຍຕາງໜ້າຂະແໜງການທີ່ກ່ຽວຂ້ອງອ້ອມຂ້າງກະຊວງສາທາລະນະສຸກເຂົ້າຮ່ວມ

ຮອງສາດສະດາຈານ ດຣ ພູທອນ ເມືອງປາກ ຮອງລັດຖະມົນຕີກະຊວງສາ ທາລະນະສຸກມີຄໍາເຫັນວ່າ: ນັບຕັ້ງແຕ່ປີ 2009 ເປັນຕົ້ນມາ, ອົງການອະນາໄມໂລກໄດ້ກໍານົດເອົາວັນທີ 5 ພຶດສະພາຂອງທຸກໆປີເປັນວັນລ້າງມືສາກົນ, ສໍາລັບປີນີ້ພາຍໃຕ້ຄໍາຂວັນວ່າ: ຊີວິດປອດໄພ ໃສ່ໃຈລ້າງມືເລື້ອຍໆ ເຊຶ່ງມີຄວາມສອດຄ່ອງ ແລະ ເປັນຂອດສໍາຄັນທີ່ສຸດໃນການຕັດຕ່ອງໂສ້ການແຜ່ລະບາດຂອງພະຍາດໂຄວິດ 19 ທີ່ລັດຖະບານລາວພ້ອມກັບປະຊາຊາດທົ່ວໂລກກໍາລັງໂຄສະນາ, ປຸກລະດົມ, ຂົນຂວາຍມວນມະນຸດທົ່ວໂລກປະຕິບັດຢ່າງແຂງແຮງ ເພື່ອຕອບໂຕ້, ສະກັດກັ້ນ ແລະ ແກ້ໄຂການລະບາດຂອງພະຍາດໂຄວິດ 19 ທີ່ພວມລະບາດຢູ່ທົ່ວໂລກໃນປັດຈຸບັນ. ການລ້າງມືດ້ວຍນໍ້າສະອາດໃສ່ສະບູ ແມ່ນວິທີທີ່ດີທີ່ສຸດ, ປະຫຍັດທີ່ສຸດ ໃນການປ້ອງກັນການຕິດເຊື້ອພະຍາດ ຈາກການຄົ້ນຄວ້າທາງດ້ານວິທະຍາສາດຢັ້ງຢືນວ່າ ພຽງແຕ່ເຮົາລ້າງມືໃຫ້ສະອາດຢູ່ເລື້ອຍໆແມ່ນສາມາດປ້ອງກັນການເຈັບເປັນໄດ້ 50 ສ່ວນຮ້ອຍ

ຮອງສາດສະດາຈານ ດຣ ພູທອນ ເມືອງປາກຍັງເຊີນຊວນ ພະນັກງານລັດຖະກອນ, ທະຫານ ຕໍາຫລວດ ຕະຫລອດຮອດປະຊາຊົນລາວບັນດາເຜົ່າທຸກຊັ້ນຄົນ, ທຸກເພດໄວຈົ່ງຮ່ວມໃຈກັນລ້າງມືເລື້ອຍໆ ເຮັດໃຫ້ກາຍເປັນຄວາມຊິ້ນເຄີຍໃນການດໍາລົງຊີວິດປົກກະຕິ ໝັ່ນລ້າງມືດ້ວຍນໍ້າສະອາດ ໃສ່ສະບູ ຫລື ເຈວລ້າງມື ກໍເພື່ອໃຫ້ສອດຄ່ອງກັບຄໍາຂວັນວັນຄົບຮອບການລ້າງມືໂລກໃນປີນີ້ຄື: ຊີວິດປອດໄພ ໃສ່ໃຈລ້າງມືເລື້ອຍໆ.

 

ຂ່າວ: ບຸນຍັງ ພຸດສະຫວັດ