ກຸ່ມນໍ້າໃຈລາວ ແລະ ບໍລິສັດ ແອວ&ເອັນ (L&N) ອະສັງຫາລິມະຊັບ ແລະ ວິສະວະກໍາກໍ່ສ້າງ ຕະຫຼອດຮອດບຸກຄົນ ແລະ ນິຕິບຸກຄົນ ໄດ້ຮ່ວມໃຈກັນລະດົມທຶນຈັດຊື້ອຸປະກອນກິລາ, ເຂົ້າສານ, ປື້ມອ່ານ, ເຄື່ອງປຣີນເຕີ ແລະ ພັດລົມ ພ້ອມເງິນສົດລວມມູນຄ່າ 15 ລ້ານກວ່າກີບໄປມອບໃຫ້ແກ່ໂຮງຮຽນ 2 ແຫ່ງ ຢູ່ເມືອງຫາດຊາຍຟອງ, ນະ ຄອນຫຼວງວຽງຈັນ ຄື ໂຮງຮຽນປະຖົມສຶກສາສົມບູນ ບ້ານນາໄຫ ແລະ ໂຮງຮຽນປະຖົມສຶກສາສົມບູນ ບ້ານໜອງພົງ.
ພິທີມອບ-ຮັບເຄື່ອງເຄື່ອງຊ່ວຍເຫລືອດັ່ງກ່າວ ໄດ້ຈັດຂຶ້ນໃນວັນທີ 10 ພະຈິກ 2023 ທີ່ໂຮງຮຽນປະຖົມສຶກສາສົມບູນ ບ້ານໜອງພົງ ໂດຍກ່າວຂອງ ທ່ານ ອາລີ ວິພົງໄຊ ປະທານບໍລິສັດ ແອວ&ເອັນ (L&N) ອະສັງຫາລິມະຊັບ ແລະ ວິສະວະກໍາກໍ່ສ້າງ, ທັງເປັນປະທານ ກຸ່ມນໍ້າໃຈລາວ ແລະ ຕາງໜ້າກ່າວຮັບແມ່ນ ທ່ານ ລົມ ສົມຈິດ ຜູ້ອຳນວຍການໂຮງຮຽນປະຖົມສຶກສາສົມບູນ ບ້ານໜອງພົງ, ມີຕາງໜ້າຈາກອົງການປົກຄອງເມືອງ, ບ້ານ, ຄູ ແລະ ນັກ ຮຽນທີ່ກ່ຽວຂ້ອງເຂົ້າຮ່ວມ.
ໂອກາດນີ້, ທ່ານ ອາລີ ວິພົງໄຊ ໄດ້ກ່າວວ່າ: ໃນນາມເປັນປະທານກຸ່ມນໍ້າໃຈລາວ ພ້ອມດ້ວຍຄະນະ ມີຄວາມຮູ້ສຶກພາກພູມໃຈ ແລະ ປື້ມປິຕິຊົມຊື່ນເປັນຢ່າງຍິ່ງທີ່ໄດ້ປະກອບສ່ວນເຄື່ອງຕ່າງໆ ນຳມາມອບໃຫ້ແກ່ບ້ານໜອງພົງ ຫວັງຢ່າງຍິ່ງວ່າ ໂອ ກາດໜ້າພວກເຮົາຈະໄດ້ລະດົມກັນມາມອບໃຫ້ອີກ. ກຸ່ມນໍ້າໃຈລາວ ຫຼື ກຸ່ມ ຮາດ ຣ໋ອກ ເອັບຊີ ໄດ້ສ້າງຕັ້ງຂຶ້ນມາແຕ່ ປີ 2015 ນັບມາຮອດປັດຈຸບັນ ແມ່ນຄົບຮອບ 8 ປີ ຕະຫຼອດໄລຍະ 8 ປີ ຜ່ານອ້າຍນ້ອງຂອງກຸ່ມນໍ້າໃຈລາວ ໄດ້ມີການເຄື່ອນໄຫວຫຼາຍກິດຈະກຳ ໂດຍສະເພາະ ປີທຳອິດ ໄດ້ນຳເອົາເຄື່ອງນຸ່ງຮົ່ມຕ່າງໆ, ອຸປະກອນການສຶກສາ ແລະ ອຸປະກອນກິລາ, ເງິນສົດ ແລະ ອື່ນໆ ໄປຊ່ວຍເຫຼຶອໃຫ້ປະຊາຊົນຊາວ ເມືອງປາກອູ່ ແຂວງຫຼວງພະບາງ ຈາກນັ້ນ ໄດ້ສືບຕໍ່ນຳເອົາບັນດາເຄື່ອງຕ່າງໆ ໄປຊ່ວຍເຫຼືອອົງການປົກຄອງເມືອງໂພນທອງ ແຂວງຈຳປາສັກ, ຊ່ວຍເຫຼຶອເມືອງເຟືອງ ແຂວງວຽງຈັນ ແລະ ໄປຊ່ວຍເຫຼືອເມືອງທ່າແຂກ ແຂວງຄຳມ່ວນ ແລະ ໃນຄັ້ງນີ້ ເປັນອີກວາລະສຳຄັນ ທີ່ ໄດ້ພ້ອມໃຈກັນຮ່ວມນໍ້າໃຈກັນ ນຳເອົາເຄື່ອງຕ່າງໆ ມາມອບໃຫ້ ຫວັງຢ່າງຍິ່ງວ່າບັນດາເຄື່ອງເຫຼົ່ານີ້ ຈະສ້າງປະໂຫຍດໃຫ້ແກ່ບ້ານ ກໍຄື ເມືອງຫາດຊາຍຟອງ.
ສຳລັບເຄື່ອງທີ່ນຳມາມອບຢູ່ໂຮງຮຽນປະຖົມສຶກສາສົມບູນ ໜອງພົງ ໃນຄັ້ງນີ້ ສາມາດລະດົມໄດ້ຈາກກຸ່ມ ນໍ້າໃຈລາວ ແລະ ບໍລິສັດ ແອວ&ເອັນ (L&N) ອະສັງຫາລິມະຊັບ ແລະ ວິສະວະກໍາກໍ່ສ້າງ ຈັດຊື້ອຸປະກອນກິລາ ຊຶ່ງມີບານເຕະ, ບານສົ່ງ ພ້ອມຕາໜ່າງ, ກະຕໍ້ ພ້ອມຕາໜ່າງ, ນໍ້າດື່ມ 10 ແພັກ, ເຄື່ອງປຣີນເຕີ ແລະ ພັດລົມ ລວມມູນຄ່າ 6 ລ້ານກວ່າກີບ. ນອກຈາກນັ້ນ, ທ່ານ ພັນໂທ ຄຳໃບ ມອບເສື້ອໂປໂລ 30 ຜືນ ແລະ ເຂົ້າສານ 1 ເປົາ ລວມມູນຄ່າ ເກືອບ 4 ລ້ານກີບ ກ່ອນຈະມອບເຄື່ອງໃຫ້ໂຮງຮຽນດັ່ງກ່າວ ທາງບໍລິສັດ ແອວ&ເອັນ (L&N) ອະສັງຫາລິມະຊັບ ແລະ ວິສະວະກໍາກໍ່ສ້າງ ກໍຍັງມອບເງິນສົດ ຈຳນວນ 5 ລ້ານກີບໃຫ້ຫ້ອງການບ້ານນາໄຫ ເພື່ອນຳໄປປັບປຸງກໍ່ສ້າງ ກຳແພງໂຮງຮຽນປະຖົມສຶກສາສົມບູນ ບ້ານນາໄຫ ອີກດ້ວຍ.
ຂ່າວໂດຍ ສົງການ ພັນແພງດີ
