ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

   ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຕົວຈິງ

ກຸ່ມບໍລິສັດ ພົງຊັບທະວີ ປະກອບສ່ວນ 1 ລ້ານໂດລາສະຫະລັດ ເຂົ້າໃນກອງທຶນປ້ອງກັນ ແລະ ສະກັດກັ້ນໂຄວິດ-19 ຂອງຫວຽດນາມ

ຕາມນັກຂ່າວສໍານັກຂ່າວສານ ຫວຽດນາມ ປະຈໍາລາວ, ໃນຕອນເຊົ້າຂອງວັນທີ 10 ມິຖຸນາ 2021, ທ່ານ ພົງສະຫວັດ ເສນາພວນ ປະທານກຸ່ມບໍລິສັດພົງຊັບທະວີ ໄດ້ເດີນທາງໄປຍັງສະຖານທູດຫວຽດນາມ ປະຈໍາລາວ ທີ່ນະຄອນຫຼວງວຽງຈັນ ເພື່ອມອບເງິນ ແລະ ອຸປະກອນການແພດລວມມູນຄ່າ 1 ລ້ານໂດລາສະຫະລັດ ໃຫ້ແກ່ກອງທຶນປ້ອງກັນ ແລະ ສະກັດກັ້ນພະຍາດໂຄວິດ-19 ຂອງ ຫວຽດນາມ.
ໃນພິທີມອບ-ຮັບ, ທ່ານ ພົງສະຫວັດ ໃຫ້ຮູ້ວ່າ ຕັ້ງແຕ່ຄາວຍັງນ້ອຍທ່ານກໍ່ໄດ້ຟັງ ໄດ້ຮຽນກ່ຽວກັບສາຍພົວພັນມິດຕະພາບລາວ – ຫວຽດນາມ ຢູ່ສະເໝີ, ສະນັ້ນ ທ່ານໄດ້ຕິດຕາມຂໍ້ມູນຂ່າວສານກ່ຽວກັບສະພາບການຂອງຫວຽດນາມ ເປັນປະຈໍາ.
ເມື່ອຮູ້ຂ່າວວ່າ ຫວຽດນາມ ກໍາລັງປະເຊີນໜ້າກັບການແຜ່ລະບາດຂອງພະຍາດ ໂຄວິດ-19 ຄັ້ງທີ 4, ທ່ານກໍ່ໄດ້ປຶກສາຫາລືກັບຄະນະນໍາກຸ່ມບໍລິສັດ ແລະ ໄດ້ຕົກລົງປະກອບສ່ວນເຂົ້າໃນກອງທຶນປ້ອງກັນ ແລະ ສະກັດກັ້ນພະຍາດໂຄວິດ-19 ຂອງ ຫວຽດນາມ ເປັນຈໍານວນເງິນສົດ 5 ແສນໂດລາສະຫະລັດ ແລະ ອຸປະກອນການແພດລວມມີ ຜ້າປິດປາກ, ເຈວລ້າງມື, ຕຽງນອນຄົນເຈັບ ແລະ ຊຸດປ້ອງກັນ ລວມມູນຄ່າ 5 ແສນໂດລາສະຫະລັດ.
ທ່ານ ພົງສະຫວັດ ຢັ້ງຢືນວ່ານີ້ແມ່ນນໍ້າໃຈອັນຈິງໃຈຂອງພະນັກງານທັງໝົດຂອງກຸ່ມບໍລິສັດພົງຊັບທະວີ ທີ່ປາຖະໜາຢາກປະກອບສ່ວນຮ່ວມແຮງຮ່ວມໃຈກັບພັກ, ລັດ ແລະ ປະຊາຊົນຫວຽດນາມ ໃນການຕໍ່ສູ້ຕ້ານພະຍາດໂຄວິດ-19.
ກຸ່ມບໍລິສັດພົງຊັບທະວີ ຫວັງວ່າ ຫວຽດນາມຈະສາມາດຄວບຄຸມ ແລະ ຕີຖອຍພະຍາດໂຄວິດ -19 ເພື່ອໃຫ້ປະຊາຊົນສາມາດກັບມາໃຊ້ຊີວິດຕາມປົກກະຕິໂດຍໄວ.
ໃນພິທີກ່າວຮັບ, ທ່ານ ຫງວຽນ ບ໋າ ຮຸ່ງ ເອກອັກຄະລັດຖະທູດ ຫວຽດນາມ ປະຈໍາລາວ ສະແດງຄວາມຂອບໃຈຕໍ່ນໍ້າໃຈອັນສູງສົ່ງພະນັກງານຂອງກຸ່ມບໍລິສັດ ພົງຊັບທະວີ.
ທ່ານເອກອັກຄະລັດຖະທູດ ໃຫ້ຮູ້ວ່າເຖິງແມ່ນວ່າປະຊາຊົນ ແລະ ປະເທດລາວຍັງພົບກັບຄວາມຫຍຸ້ງຍາກ, ແຕ່ໃນຊຸມວັນຜ່ານມາ ມີຫຼາຍສໍານັກງານ, ອົງການ ແລະ ວິສາຫະກິດຂອງລາວ ໄດ້ປະກອບສ່ວນເຂົ້າໃນການຕໍ່ສູ້ຕ້ານພະຍາດ ໂຄວິດ -19 ຂອງລັດຖະບານ ແລະ ປະຊາຊົນ ຫວຽດນາມ. ນີ້ແມ່ນສິ່ງຢັ້ງຢືນຈະແຈ້ງກ່ຽວກັບສາຍພົວພັນມິດຕະພາບທີ່ຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ຫວຽດນາມ – ລາວ, ຍາມໃດກໍ່ສຸດອົກສຸດໃຈນໍາກັນ, ຍາມໃດກໍ່ຢູ່ຄຽງຂ້າງກັນໃນຍາມພົບຄວາມຫຍຸ້ງຍາກ, ລໍາບາກບົນຈິດໃຈ “ເຂົ້າເມັດຫັກຜັກເສັ້ນກໍ່ແບ່ງກັນ”
ຕາງໜ້າໃຫ້ພັກ, ລັດ ແລະ ປະຊາຊົນ ຫວຽດນາມ, ທ່ານ ຫງວຽນ ບ໋າ ຮຸ່ງ ສະແດງຄວາມຂອບໃຈຢ່າງຈິງໃຈ ຕໍ່ນໍ້າໃຂຈອງທ່ານພົງສະຫວັດ ແລະ ພະນັກງານທັງໝົດຂອງກຸ່ມບໍລິສັດ ພົງຊັບທະວີ ແລະ ຢັ້ງຢືນວ່າຈະຈັດສົ່ງຈໍານວນເງິນ ແລະ ອຸປະກອນການແພດທີ່ໄດ້ຮັບມອບຄັ້ງນີ້ ກັບໄປຫວຽດນາມໂດຍໄວ.
ທ່ານທູດໃຫ້ຮູ້ວ່າ ໃນໄລະທີ່ຜ່ານມາ, ຫຼາຍທ້ອງຖິ່ນ, ປະຊາຊົນ ແລະ ວິສາຫະກິດ ຫວຽດນາມ, ໃນນັ້ນມີຊາວ ຫວຽດນາມທີ່ດໍາລົງຊີວິດຢູ່ລາວ ໄດ້ປະກອບສ່ວນຢ່າງຫຼວງຫຼາຍເຂົ້າໃນການຕ່ສູ້ຕ້ານ ໂຄວິດ -19 ຂອງພັກ, ລັດຖະບານ ແລະ ປະຊາຊົນລາວ. ຊາວຫວຽດນາມ ດໍາລົງຊີວິດຢູ່ລາວ ຍັງກໍາລັງສືບຕໍ່ລະດົມການປະກອບສ່ວນ ແລະ ຈະສືບຕໍ່ຊ່ວຍເຫຼືອປະເທດລາວອ້າຍນ້ອງ ໃນການຕໍ່ສູ້ຕ້ານພະຍາດລະບາດ./.
May be an image of one or more people, people standing and text that says 'TÂP ĐOÀN PHONGSUBTHAVY Ủng Họ Chính Phủ Và Nhân Dân Việt Nam Phòng Chống Dịch Covid-19 500 000S à5 Thiết Tế TỐNG TRỊ GIÁ 1.000.000$ PHONGSUPTHA P PHONGSUPTHAVY'