ພິທີ ເຊັນສັນຍາສຳປະທານ ໂຄງການພັດທະນາແຫຼ່ງທ່ອງທ່ຽວປະຫັວດສາດ, ສັນພູໝອກ, ພູຕະການ ແລະ ຕິດພັນກັບການກະສິກຳຄົບວົງຈອນ ຢູ່ເມືອງລ້ອງແຈ້ງ ແຂວງໄຊສົມບູນ ລະຫວ່າງອົງການປົກຄອງ ແຂວງໄຊສົມບູນ ກັບ ກຸ່ມບໍລິ ສັດ ລອງແຈ້ງພັດທະນາ ຈຳກັດ ໄດ້ຈັດຂຶ້ນໃນຕອນບ່າຍຂອງວັນທີ 8 ພະຈິກ ຜ່ານມານີ້ ທີ່ຫ້ອງປະຊຸມຫ້ອງວ່າການແຂວງ ໂດຍການເຂົ້າຮ່ວມຂອງທ່ານ ພອຍຄຳ ຮຸ່ງບຸນຍວງ ເຈົ້າແຂວງໄຊສົມບູນ, ມີການນຳແຂວງ, ການນຳເມືອງລ້ອງແຈ້ງ ແລະ ທ່ານ ຖາວອນ ອາດສະໝຸດ ປະທານກຸ່ມບໍລິສັດ ລອງແຈ້ງພັດທະນາ ຈຳກັດ ພ້ອມດ້ວຍ ພາກສ່ວນທີ່ກ່ຽວຂ້ອງ ເຂົ້າຮ່ວມ.
ໃນພິທີ ທ່ານ ສີອຳພອນ ໄຊສະຫວັດ ຫົວໜ້າຂະແໜງສົ່ງເສີມການລົງທຶນ ພະແນກແຜນການ ແລະ ການລົງທຶນ ແຂວງໄຊສົມບູນ ໄດ້ລາຍງານຫຍໍ້ກ່ຽວ ກັບໂຄງການ ຊຶ່ງໂຄງການພັດທະນາແຫຼ່ງທ່ອງທ່ຽວປະຫັວດສາດ, ສັນພູໝອກ, ພູຕະການ ແລະ ຕິດພັນກັບການກະສິກຳຄົບວົງຈອນ ຢູ່ເມືອງລ້ອງແຈ້ງ ມີອາຍຸສັນຍາ 50 ປີ, ມີນື້ອທີ່ທັງໝົດ 14 ຮັກຕາ ໃນນັ້ນ ໄດ້ແບ່ງອອກເປັນສອງໄລຍະ ຄື: ໄລຍະທີໜຶ່ງ ແຕ່ປີ 2023-2033 ເວລາໃນການກໍ່ສ້າງ 3 ປີ ໃຫ້ສຳເລັດໃນທຸກໆກິດຈະກຳ, ຕ້ອງລົງມືປະຕິບັດໃນ 3 ເດືອນ ພາຍຫຼັເຊັນສັນຍາ ແລະ ດຳເນີນກິດຈະກຳ 7 ປີ ຊຶ່ງກິດຈະກຳ ເຂດສັນພູໝອກ ແລະ ພູຕະການ ປະກອບມີ : ສວນດອກໄມ້, ເຮືອນຊົນເຜົ່າ, ເສັ້ນທາງທ່ຽວຊົມທຳມະຊາດ, ປະຫວັດສາດ ແລະ ທຳມະຊາດ, ອາຄານຕ້ອນຮັບ ແລະ ອາຄານບໍລິຫານ, ຈຸດຊົມວິວ, ປ້ອມຍາມທາງເຂົ້າ, ຈຸດຊົມວິວເມືອງລ້ອງແຈ້ງ ແລະ ອ່າງນໍ້າງື່ມ 3 , ສະໝາມກິລາ, ຕະ ຫຼາດກາງຄືນ ອາຄານສູນກາງ, ໂຮງໝໍໂຄງການ, ຕະຫຼາດຂາຍເຄື່ອງທີ່ລະນຶກ, ໂຮງແຮມ ແລະ ເດີ່ນຈອດລົດ. ສຳລັບໄລຍະທີ່ 2 ແຕ່ປີ 2033-2043 ເປັນໄລຍະການຂະຫຍາຍໂຄງການ ຊຶ່ງທາງບໍລິສັດຕ້ອງວາງເງິນຄຳ້ປະກັນໂຄງການຈຳນວນ 30 ພັນໂດລາສະຫະລັດ ແລະ ມອບພັນທະຕ່າງໆໃຫ້ ແຂວງໄຊສົມບູນ ຈຳນວນ 60 ລ້ານກີບຕໍ່ປີ, ປະກອບທຶນພັດທະນາສັງຄົມ ໃຫ້ແຂວງ ຈຳນວນ 10 ລ້ານກີບຕໍ່ປີ, ທຶນພັດທະນາທ້ອງຖິ່ນ ໃຫ້ເມືອງລ້ອງແຈ້ງ ຈຳນວນ 10 ລ້ານກີບຕໍ່ປີ, ງົບປະມານຕິດຕາມ ແລະ ຄຸ້ມຄອງໂຄງການ ຈຳນວນ10 ລ້ານກີບຕໍ່ປີ, ງົບປະມານຕິດຕາມແຮງງານ ໃຫ້ພະແນກແຮງງານ ແລະ ສະຫວັດດີການສັງຄົມ ແລະ ກອງບັນຊາການປ້ອງກັນຄວາມສະຫງົບ 10 ລ້ານກີບຕໍ່ປີ ພ້ອມນີ້ ກໍຕ້ອງປະກອບເງິນຕິດຕາມດ້ານວິຊາການຂອງພະແນກຖະແຫຼງຂ່າວ, ວັດ ທະນະທຳແລະ ທ່ອງທ່ຽວ ແຂວງໄຊສົມບູນ ຕື່ມອີກ.
ໂອກາດນີ້ ທ່ານ ພອຍຄຳ ຮຸ່ງບຸນຍວງ ໄດ້ມີຄຳເຫັນໂອ້ລົມ ຊຶ່ງທ່ານໄດ້ສະແດງຄວາມຍ້ອງຍໍຊົມເຊີຍຕໍ່ກຸ່ມບໍລິສັດ ລ້ອງແຈ້ງພັດທະນາ ຈຳກັດ ທີ່ໄດ້ປະກອບສ່ວນອັນສຳຄັນ ເຂົ້າໃນການສ້າງສາພັດ ທະນາ ແຂວງໄຊສົມບູນ ຊຶ່ງມັນໄດ້ເປັນການພັດທະນາຊີວິດການເປັນຢູ່ຂອງປະຊາຊົນໃຫ້ດີຂຶ້ນ ແລະ ກາຍເປັນສະ ຖານທີ່ທ່ອງທ່ຽວທີ່ສຳຄັນຂອງແຂວງ ໃນຕໍ່ໜ້າ ພ້ອມນີ້ ທ່ານຍັງຮຽກຮ້ອງໃຫ້ຝ່າຍບໍລິສັດ ຈົ່ງຍົກສູງຄວາມຮັບຜິດຊອບ ໃນການຈັດຕັ້ງປະຕິບັດສັນຍາສະບັບນີ້ ແລະ ໃຫ້ທຸກພາກສວ່ນທີ່ກ່ຽວຂ້ອງ ຈົ່ງເປັນເຈົ້າການໃນການຕິດຕາມກວດກາການຈັດຕັ້ງປະຕິບັດໂຄງການຢ່າງໃກ້ສິດ ເພື່ອຮັບປະກັນໃຫ້ແກ່ການດຳເນີນໂຄງການມີຜົນສຳ ເລັດຕາມແຜນການທີ່ວາງໄວ້.
ຈາກນັ້ນ ທັງສອງຝ່າຍກໍໄດ້ລົງນາມເຊັນສັນຍາຮ່ວມກັນ ຕາງໜ້າອົງການປົກຄອງແຂວງ ໂດຍ ທ່ານ ໄຊຍະເດດ ວົງສາຣະວັນ ພ້ອມດ້ວຍພາກສວ່ນທີ່ກ່ຽວຂ້ອງຂອງແຂວງ ແລະ ການນຳເມືອງລ້ອງແຈ້ງ ສ່ວນຝ່າຍບໍລິສັດ ແມ່ນທ່ານ ຖາວອນ ອາດສະໝຸດ ປະທານກຸ່ມບໍລິສັດ ລອງແຈ້ງພັດທະນາ ຈຳກັດ ໂດຍຊ່ອງໜ້າການນຳແຂວງ ແລະ ພາກສ່ວນທີ່ກ່ຽວຂ້ອງ ເຂົ້າຮ່ວມເປັນສັກຂີພີຍານ.
ພາບ-ຂ່າວ: ພຸດທະສອນ ເວດສະວົງ
