ເມື່ອບໍ່ດົນມານີ້, ກຸ່ມທຸລະກິດຈາກແຂວງສະຫວັນນະເຂດ ໄດ້ເຂົ້າຮ່ວມງານສຳມະນາ, ເຈລະຈາ ແລະ ຈັບຄູ່ທຸລະກິດ ກັບກຸ່ມທຸລະກິດໂອທັອບ ພາກອີສານ (ISAN Business Matching) ຣາຊະອານາຈັກໄທ ຊຶ່ງພິທີດັ່ງກ່າວ ໄດ້ຈັດຂຶ້ນທີ່ຈັງຫວັດນະຄອນພະນົມ ຣາຊະອານາຈັກໄທ ໂດຍການນຳໜ້າພາທາງຂອງທ່ານ ໄຊຍະເດດ ຜຸຍຍະວົງ ຮອງຫົວໜ້າພະແນກອຸດສາຫະກຳ-ການຄ້າແຂວງສະຫວັນນະເຂດ, ມີທ່ານພານິດ ຕາງໜ້າຈັງຫວັດນະຄອນພະນົມ ແລະ ຈັງຫວັດມຸກດາຫານ ຮ່ວມເປັນປະທານໃນຄັ້ງນີ້, ພ້ອມມີບັນດາຜູ້ປະກອບການ, ຫົວໜ່ວຍທຸລະກິດ ຈາກແຂວງສະຫວັນນະເຂດ, ແຂວງຄຳມ່ວນ ແລະ ອີກ 20 ຈັງຫວັດຂອງຣາຊະອານາຈັກໄທ ເຂົ້າຮ່ວມ.
ທ່ານ ໄຊຍະເດດ ຜຸຍຍະວົງ ໄດ້ຍົກໃຫ້ເຫັນວ່າ: ການນຳພາຜູ້ປະກອບການ ກໍຄືນັກທຸລະກິດເຂົ້າຮ່ວມງານໃນຄັ້ງນີ້, ຖືວ່າເປັນໂອກາດດີໃນການເຈລະຈາ ຈັບຄູ່ທຸລະກິດ, ເພື່ອຈະໄດ້ແລກປ່ຽນບົດຮຽນ ແລະ ນຳເອົາຜະລິດຕະພັນ ໃນການຕໍ່ຍອດ ສ້າງໃຫ້ເປັນສິນຄ້າໜຶ່ງເມືອງໜຶ່ງຜະລິດຕະພັນ (ໂອດັອບ) ໃຫ້ມີຄວາມເຂັ້ມແຂງ, ມີຊ່ອງທາງດ້ານການຕະຫຼາດທີ່ກວ້າງໄກ, ໃນການຮ່ວມມືດ້ານທຸລະກິດໃນກຸ່ມພາກອີສານ ຂອງຣາຊະອານາຈັກໄທ ຊຶ່ງຢູ່ແຂວງສະຫວັນນະເຂດພວກເຮົາ ຍັງມີວັດຖຸດິບທີ່ພ້ອມຈະແປຮູບ ໃຫ້ກາຍເປັນສິນຄ້າໂອດັອບ ເພື່ອສ້າງລາຍຮັບໃຫ້ແກ່ຊຸມຊົນໄດ້.
ໃນງານຄັ້ງນີ້ ຍັງໄດ້ມີການສຳມະນາ ພາຍໃຕ້ຫົວຂໍ້ ການພັດທະນາໃນເຄືອຂ່າຍການຄ້າເພື່ອການສົ່ງອອກ ຊຶ່ງຕາງໜ້າຜູ້ປະກອບການຈາກແຂວງສະຫວັນນະເຂດ ໂດຍທ່ານ ສຸລິໄຊ ສີລາວັນ ຜູ້ອຳນວຍການບໍລິສັດ ປາພະສອນການຄ້າ ຈຳກັດ ຊຶ່ງຍົກໃຫ້ເຫັນເຖິງ ຍຸດທະສາດຫຼັກຂອງແຂວງສະຫວັນນະເຂດ ໂດຍສະເພາະການພັດທະນາ ໃຫ້ກາຍເປັນແຂວງທີ່ມີການຂະຫຍາຍຕົວ ດ້ານການຜະລິດກະສິກຳ, ການບໍລິການ ແລະ ການຫັນເປັນອຸດສາຫະກຳທັນສະໄໝ ຕາມທິດສ້າງເສດຖະກິດ ໄປກັບການປົກປັກຮັກສາສິ່ງແວດລ້ອມ ແລະ ລະບົບນິເວດໃຫ້ສົມບູນ ແລະ ຍືນຍົງ, ຮັບປະກັນສະຖຽນລະພາບທາງດ້ານການເມືອງ ໃຫ້ທົ່ວແຂວງມີຄວາມສະຫງົບ, ປອດໄພຮອບດ້ານ, ຂຸດຄົ້ນທ່າແຮງບົ່ມຊ້ອນ ເຂົ້າໃນການພັດທະນາແຂວງ ຄຽງຄູ່ກັບການສຸມໃສ່ລຶບລ້າງຄວາມທຸກຍາກ ໃຫ້ໄດ້ໂດຍພື້ນຖານ, ເພີ່ມທະວີສາຍພົວພັນ ຮ່ວມມືກັບບັນດາປະເທດ, ແຂວງ ທີ່ເປັນເພື່ອນມິດ, ຄູ່ຮ່ວມຍຸດທະສາດ, ຮ່ວມຊາຕາກຳເພື່ອນມິດສາກົນ ແລະ ຄູ່ຮ່ວມພັດທະນາ; ໃນການຈັດງານຄັ້ງນີ້ ຍັງໄດ້ມີການວາງສະແດງສິນຄ້າໂອທັອບ ຂອງບັນດາຈັງຫວັດພາກອີສານຂອງຣາຊະອານາຈັກໄທ ແລະ ໄດ້ມີການເຊັນ MOU ຂອງຄູ່ຮ່ວມທຸລະກິດຕື່ມອີກ.
ຂ່າວ: ສະຫວັນນະເຂດ.
