ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ກຸ່ມອາສາສະໝັກອະນຸດຕະຣະທໍາ ສ່ວນລວມ ແຂວງວຽງຈັນ ມອບວັດຖຸປັດໃຈມູນຄ່າ 173 ລ້ານກີບໃຫ້ກະຊວງປ້ອງກັນປະເທດໂອກາດວັນທີ 20 ມັງກອນ

ເນື່ອງໃນໂອກາດວັນສ້າງຕັ້ງກອງທັບປະຊາຊົນລາວ ວັນທີ 20 ມັງກອນ ຄົບຮອບ 71 ປີ, ໃນຕອນເຊົ້າວັນທີ 27 ມັງກອນ 2020, ທີ່ນະຄອນຫຼວງວຽງຈັນ, ກຸ່ມອາສາສະໝັກອະນຸດຕະຣະທໍາ ສ່ວນລວມ ແຂວງວຽງຈັນ ໄດ້ນໍາເອົາວັດຖຸປັດໃຈ ແລະ ຂອງຂວັນລວມມູນຄ່າທັງໝົດ 72 ລ້ານກີບ ໄປມອບໃຫ້ກົມໃຫ່ຍພາລາທິການ ກະຊວງປ້ອງກັນປະເທດ. ກ່າວມອບເຄື່ອງໃນຄັ້ງນີ້ ແມ່ນ ແມ່ພູວີ ພິມມະຈັນລໍ, ປະທານກຸ່ມອາສາສະໝັກອະນຸດຕະຣະທໍາ ສ່ວນລວມ ແຂວງວຽງຈັນ, ແລະ ກ່າວຮັບໂດຍ ທ່ານພົນຈັດຕະວາ ບົວສິງ ອິນທະວົງ, ຫົວໜ້າກົມເສນາຮັກ, ກົມໃຫ່ຍພາລາທິການກອງທັບ ກະຊວງປ້ອງກັນປະເທດ, ໂດຍເຄື່ອງທີ່ນໍາມາມອບປະກອບມີແຈ່ວບອງໂປຼຕິນ, ຢານວດ ແລະ ຢາລ້າງສານພິດ ເຊິ່ງແມ່ນຢາສະໝຸນໄພທີ່ກຸ່ມຜະລິດຂຶ້ນເອງ, ເປັນສິນຄ້າໂອດ໋ອບຂອງເມືອງວຽງຄໍາ, ແຂວງວຽງຈັນ ທີ່ໄດ້ຮັບການຢັ້ງຢືນຄຸນນະພາບ ຫລື ອຢ ຈາກກະຊວງສາທາລະນະສຸກ ແລ້ວ. ໃນໂອກາດນີ້, ແມ່ພູວີ ພິມມະຈັນລໍ ກ່າວວ່າ ເພື່ອເປັນການລະນຶກເຖິງບຸນຄຸນ ແລະ ຄຸນງາມຄວາມດີຂອງບັນພະບຸລຸດ ກໍ່ຄື ການນໍາພັກ-ລັດ ທີ່ໄດ້ເສຍສະຫລະຊີວິດເລືອດເນື້ອ-ອຸທິດຕົນໃຫ້ແກ່ພາລະກິດປະຕິວັດ ເພື່ອເຮັດໃຫ້ປະເທດຊາດ ມີຄວາມສະຫງົບສຸກ ແລະ ຄວາມຈະເລີນຮຸ່ງເຮືອງໃນປະຈຸບັນ ພ້ອມທັງ ເພື່ອເປັນການສົ່ງແຮງກຳລັງໃຈເຖິງບັນດາອ້າຍນ້ອງນັກຮົບທີ່ພວມປະຕິບັດໜ້າທີ່ປ້ອງກັນຊາດຢູ່ເຂດຫ່າງໄກສອກຫລີກ, ທິມງານດັ່ງກ່າວຈຶ່ງໄດ້ຈັດສັນຂອງຂວັນເຫລົ່ານີ້ມາມອບໃຫ້ກອງທັບປະຊາຊົນລາວດ້ວຍຈິດໃຈສັດທາທີ່ບໍລິສຸດ.
ໃນໂອກາດດຽວກັນນີ້, ທ່ານພົນຈັດຕະວາບົວສິງ ອິນທະວົງ, ຫົວໜ້າກົມເສນາຮັກ, ກົມໃຫ່ຍພາລາທິການກອງທັບ ກະຊວງປ້ອງກັນປະເທດ ໄດ້ກ່າວສະແດງຄວາມຂອບໃຈຕໍ່ກຸ່ມອາສາສະໝັກອະນຸດຕະຣະທໍາ ສ່ວນລວມ ແຂວງວຽງຈັນ ເຊິ່ງຍາມໃດກໍ່ຍັງມີຄວາມເປັນຫ່ວງເປັນໃຍຕໍ່ສະພາບຊີວິດການເປັນຢູ່ຂອງອ້າຍນ້ອງນັກຮົບ ທີ່ຢູ່ເຂດຫ່າງໄກສອກຫລີກ ແລະ ພວມເອົາໃຈໃສ່ປະຕິບັດໜ້າທີ່ເປັນຮົ້ວຂອງປະເທດຊາດຢ່າງອົງອາດກ້າຫານ. ທ່ານໄດ້ມີຄໍາເຫັນຕື່ມອີກວ່າ ນີ້ແມ່ນຄັ້ງທໍາອິດທີ່ກໍາລັງປ້ອງກັນຊາດ ໄດ້ຮັບຂອງຂວັນທີ່ມີຄວາມຈໍາເປັນ ແລະ ເປັນທີ່ຕ້ອງການຂອງອ້າຍນ້ອງທະຫານທີ່ພວມປະຕິບັດໜ້າທີ່ຢູ່ເຂດທຸລະກັນດານ ແລະ ພ້ອມຈະນໍາເອົາວັດຖຸປັດໃຈເຫລົ່ານີ້ ສົ່ງໄປເຖິງອ້າຍນ້ອງ ນາຍ ແລະ ພົນທະຫານທີ່ພວມປະຕິບັດໜ້າທີ່ຢູ່ແຫ່ງຕ່າງໆຕາມຈຸດປະສົງຂອງກຸ່ມອາສາສະໝັກ.


ໃນຕອນບ່າຍມື້ດຽວກັນ, ຄະນະກຸ່ມອາສາສະໝັກອະນຸດຕະຣະທໍາ ສ່ວນລວມ ແຂວງວຽງຈັນ ຍັງໄດ້ນໍາເອົາຂອງຂັວນວັດຖຸປັດໃຈມູນຄ່າທັງໝົດ 59 ລ້ານກີບ ໄປມອບໃຫ້ກະຊວງປ້ອງກັນຄວາມສະຫງົບ ໃນໂອກາດວັນສ້າງຕັ້ງກໍາລັງປ້ອງກັນຄວາມສະຫງົບ ວັນທີ 5 ເມສາ ຄົບຮອບ 59 ປີ ໂດຍກ່າວຮັບ ແມ່ນທ່ານພັນເອກ ອານຸເດດ ຄູນຄໍາ, ຮອງຫົວໜ້າຫ້ອງວ່າການກະຊວງປ້ອງກັນຄວາມສະຫງົບ.
ກ່ອນໜ້ານີ້ ໃນວັນທີ 24 ມັງກອນ 2020, ຄະນະກຸ່ມອາສາສະໝັກອະນຸດຕະຣະທໍາ ສ່ວນລວມ ແຂວງວຽງຈັນ ກໍ່ໄດ້ນໍາເອົາວັດຖຸປັດໃຈຈໍານວນໜຶ່ງ ມູນຄ່າ 21.300.000 ກີບ ໄປມອບໃຫ້ ກອງບັນຊາການທະຫານແຂວງວຽງຈັນ, ແລະວັດຖຸປັດໃຈຈໍານວນໜຶ່ງ ມູນຄ່າ 20.400.000 ກີບ ໃຫ້ກອງບັນຊາການ ປກສ ແຂວງວຽງຈັນ ຕື່ມອີກດ້ວຍ.
ສະເພາະປີ 2020 ປີນີ້, ກຸ່ມອາສາສະໝັກອະນຸດຕະຣະທໍາ ສ່ວນລວມ ແຂວງວຽງຈັນ ໄດ້ຮີບໂຮມວັດຖຸປັດໃຈຕ່າງໆ ໄປມອບໃຫ້ກໍາລັງປ້ອງກັນຊາດ, ປ້ອງກັນຄວາມສະຫງົບ ຢູ່ແຫ່ງຕ່າງໆ ໄດ້ມູນຄ່າລວມທັງໝົດ 173.300.000 ກີບ.