ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ກົງສຸນໃຫຍ່ລາວປະຈຳຄຸນໝິງ ມອບເງິນບໍລິຈາກ 36 ລ້ານກີບ ຊ່ວຍເຫຼືອຜູ້ໄດ້ຮັບຜົນກະທົບ ຈາກການແຜ່ລະບາດຂອງ ໂຄວິດ-19

ໃນຕອນບ່າຍຂອງວັນທີ 19 ມີນາ 2020, ທ່ານ ຄຳພອນ ວົງສັນຕິ, ຫົວໜ້າກົງສຸນໃຫຍ່ແຫ່ງ ສປປ ລາວ ປະຈຳນະຄອນຄຸນໝິງ, ສປ ຈີນ ໄດ້ຕາງໜ້າໃຫ້ຜູ້ບໍລິຈາກຊາວລາວປະມານ 600 ທ່ານ ມອບເງີນຊ່ວຍເຫລືອຈຳນວນ 28.000 ຢວນ (ຫຼື ປະມານ 36.400.000 ກີບ) ໃຫ້ແກ່ປະຊາຊົນແຂວງຢຸນນານ, ສປ ຈີນ ທີ່ໄດ້ຮັບຜົນກະທົບຈາກການແຜ່ລະບາດຂອງເຊື້ອພະຍາດໂຄວິດ-19, ທີ່ຫ້ອງການໆຕ່າງປະເທດແຂວງຢູນນານ, ສປ ຈີນ.

ໃນໂອກາດນີ້, ທ່ານ ຄຳພອນ ວົງສັນຕິ, ຫົວໜ້າກົງສຸນໃຫຍ່ແຫ່ງ ສປປ ລາວ ປະຈຳນະຄອນຄຸນໝິງ, ສປ ຈີນ ໄດ້ແຈ້ງໃຫ້ຊາບວ່າ: ໃນວັນທີ 07 ກຸມພາຜ່ານມາ, ໜ່ວຍຊາວໜຸ່ມສະຖານກົງສຸນໃຫຍ່ແຫ່ງ ສປປ ລາວ ທີ່ນະຄອນຄຸນໝິງ, ສປ ຈີນ ໄດ້ເປັນເຈົ້າການຈັດການລະດົມເງີນເພື່ອຊ່ວຍເຫລືອປະຊາຊົນແຂວງຢູນນານ, ສປ ຈີນ ທີ່ໄດ້ຮັບຜົນກະທົບຈາກການແຜ່ລະບາດຂອງເຊື້ອພະຍາດໂຄວິດ-19 ເຊິ່ງໄດ້ຮັບການສະໜັບສະໜູນຈາກຫລາຍພາກສ່ວນຢ່າງເປັນຂະບວນຄຶກຄື້ນດີ ເຊັ່ນ: ພະນັກງານກົງສຸນໃຫຍ່ທີ່ຄຸນໝິງ ພ້ອມດ້ວຍຄອບຄົວ ແລະ ຫມູ່ເພື່ອນ, 3 ອົງການຈັດຕັ້ງມະຫາຊົນ, ນັກສຶກສາລາວທີ່ແຂວງຢຸນນານ, ປະທານບໍລິສັດ Zhe Jiang Long Sheng Aquatic Products Co.,Ltd, ປະທານບໍລິສັດ ໂຊລິນ ຂາເຂົ້າ – ຂາອອກ ຈໍາກັດຜູ້ດຽວ, ແລະ ພາກສ່ວນອື່ນໆອີກ ເກືອບ 600 ທ່ານ. ນອກຈາກນັ້ນ, ໜ່ວຍຊ່ວຍໜຸ່ມສະຖານກົງສຸນໃຫຍ່ແຫ່ງ ສປປ ລາວ ທີ່ນະຄອນຄຸນໝິງ, ສປ ຈີນ ຍັງໄດ້ຖືໂອກາດດຽວກັນນີ້, ຂົນຂວາຍຮັບບໍລິຈາກເຄື່ອງນຸ່ງຮົ່ມ ຈຳນວນ 512 ໂຕ ຄິດເປັນມູນຄ່າ 15 ລ້ານກວ່າກີບ ເພື່ອມອບໃຫ້ແກ່ປະຊາຊົນທີ່ໄດ້ຮັບຜົນກະທົບຈາກໄພນໍ້າຖ້ວມ ທີ່ເມືອງສະໜາມໄຊ, ແຂວງອັດຕະປື ໃນປີ 2018 ແລະ ເພື່ອຈັດກິດຈະກຳລະດົມເງີນຊ່ວຍເຫລືອ ປະຊາຊົນລາວ ທີ່ໄດ້ຮັບຜົນກະທົບຈາກໄພນໍ້າຖ້ວມໃນປີ 2019 ຈຳນວນ 12 ລ້ານກວ່າກີບ. ຈຸດປະສົງຫຼັກຂອງການເຄື່ອນໄຫວກິດຈະກຳໃນຄັ້ງນີ້ ແມ່ນເພື່ອຍົກສູງນຳ້ໃຈຮັກເຊື້ອແພງຊາດ, ສ້າງຄວາມສາມັກຄີພາຍໃນ ແລະ ພາຍນອກ ແລະ ນໍ້າໃຈຊ່ວຍເຫລືອສັງຄົມ ໃນຖັນແຖວ ຊາວໜຸ່ມ ແລະ ໄວໜຸ່ມນັກສຶກສາລາວ, ພ້ອມທັງເພື່ອສົ່ງເສີມມິດຕະພາບ, ຄວາມສາມັກຄີ ແລະ ສາຍພົວພັນອັນເປັນມູນເຊື້ອ ລາວ-ຈີນ ແລະ ຈີນ-ລາວ.