ການດໍາເນີນກອງປະຊຸມສະໄໝສາມັນ ເທື່ອທີ 7 ຂອງສະພາແຫ່ງຊາດ ຊຸດທີ IX ໃນວັນທີ 19 ມິຖຸນາ 2024 ນີ້. ທ່ານ ລິນຄໍາ ດວງສະຫວັນ ລັດຖະມົນຕີກະຊວງກະສິກໍາ ແລະ ປ່າໄມ້ ໄດ້ສະເໜີຮ່າງກົດໝາຍວ່າດ້ວຍສະຫະກອນ (ສ້າງໃໝ່) ເພື່ອໃຫ້ສະມາຊິກສະພາແຫ່ງຊາດໄດ້ຄົ້ນຄ້ວາປະກອບຄໍາເຫັນ ແລະ ຮັບຮອງ.
ທ່ານໄດ້ຍົກໃຫ້ເຫັນເຫດຜົນ ແລະ ຄວາມຈຳເປັນ ໃນການສ້າງກົດໝາຍສະບັບນີ້ ຍ້ອນນະໂຍບາຍສົ່ງເສີມສະຫະກອນ ຍັງມີລັກສະນະລວມໆ, ສະຫະກອນກັບວິສາຫະກິດບໍ່ມີຫຍັງແຕກຕ່າງກັນ ເຮັດໃຫ້ປະຊາຊົນບໍ່ຢາກເຂົ້າຮ່ວມການຈັດຕັ້ງສະຫະກອນ ເນື່ອງຈາກຕ້ອງໄດ້ແບກຫາບພັນທະຄືກັບວິສາຫະກິດ; ບັນດາມາດຕະການ, ຫລັກການ, ວິທີການ, ຂັ້ນຕອນ ແລະ ເງື່ອນໄຂ ໃນການສ້າງຕັ້ງສະຫະກອນ ກໍຍັງບໍ່ທັນຊັດເຈນ, ຈະແຈ້ງ ແລະ ບໍ່ມີຄວາມເປັນເອກະພາບ ໃນຂອບເຂດທົ່ວປະເທດ ເຮັດພໍໃຜພໍລາວຕາມຂະແໜງການ, ທັດສະນະຄວາມຮັບຮູ້ ແລະ ຄວາມເຂົ້າໃຈ ຕໍ່ກັບວຽກສະຫະກອນໃນໄລຍະໃໝ່ຂອງພະນັກງານ ກໍຄື ປະຊາຊົນ ຍັງບໍ່ທັນມີຄວາມເປັນເອກະພາບ, ຈໍານວນໜຶ່ງຍັງຢ້ານເປັນສະຫະກອນແບບເກົ່າ.
ນອກຈາກນີ້, ການແບ່ງຄວາມຮັບຜິດຊອບໃນການ ຄຸ້ມຄອງ, ຕິດຕາມ, ກວດກາ ຢູ່ຂັ້ນສູນກາງ ແລະ ທ້ອງຖິ່ນບໍ່ທັນຈະແຈ້ງ; ສະພາບການແຂ່ງຂັນ ການຜະລິດສິນຄ້າ ແລະ ການບໍລິການ ມີການແກ້ງແຍ້ງແຂ່ງຂັນສູງຂຶ້ນ; ຜູ້ບໍລິໂພກ ຫລື ປະເທດຄູ່ຄ້າ ມີຄວາມຕ້ອງການສິນຄ້າເພີ່ມຂຶ້ນທາງດ້ານປະລິມານ ແລະ ຄຸນນະພາບ ແລະ ໄດ້ກຳນົດເປັນມາດຕະຖານຕ່າງໆ ເຊິ່ງຈໍາເປັນຕ້ອງມີການຈັດຕັ້ງການຜະລິດ ເພື່ອເຕົ້າໂຮມເອົາບັນດາຜູ້ຜະລິດຂະໜາດນ້ອຍ, ເອກະເທດ ກະແຈກກະຈາຍ ເຮັດພໍໃຜພໍລາວເຂົ້າການຈັດຕັ້ງ; ສ້າງ ແລະ ປັບປຸງ ກໍາລັງການຜະລິດ ຢູ່ຊົນນະບົດໃຫ້ມີຄວາມເຂັ້ມແຂງ ເພື່ອຜະລິດສິນຄ້າ ແລະ ບໍລິການໃຫ້ຮັບປະກັນທາງດ້ານປະລິມານ ແລະ ຄວບຄຸມຄຸນນະພາບໄດ້ຕາມຕະຫລາດຕ້ອງການ, ສາມາດແກ້ງແຍ້ງແຂ່ງຂັນ.
ສໍາລັບໂຄງປະກອບ ແລະ ເນື້ອໃນຂອງຮ່າງກົດໝາຍວ່າດ້ວຍສະຫະກອນ ປະກອບມີ 12 ພາກ, 8 ໝວດ, 77 ມາດຕາ. ຄາດວ່າພາຍຫລັງໄດ້ຖືກຮັບຮອງ ແລະ ປະກາດໃຊ້ແລ້ວ ຈະເຮັດໃຫ້ການຄຸ້ມຄອງວຽກງານສະຫະກອນລວມສູນ ແລະ ມີການຈັດຕັ້ງຮັບຜິດຊອບຢ່າງຈະແຈ້ງ ແລະ ຫັນເຂົ້າສູ່ລະບຽບກົດໝາຍ ຕາມແນວທາງນະໂຍບາຍຂອງພັກ, ລັດຖະທຳມະນູນ ແລະ ກົດໝາຍຂອງລັດວາງອອກ, ທັງເປັນບ່ອນອີງໃຫ້ແກ່ຂະແໜງການ ແລະ ອົງການປົກຄອງທ້ອງຖິ່ນ; ຫລັກການ, ຂັ້ນຕອນ ແລະ ເງື່ອນໄຂ ໃນການສ້າງຕັ້ງສະຫະກອນ ມີຄວາມຊັດເຈນ, ຈະແຈ້ງ ແລະ ມີຄວາມເປັນເອກະພາບກັນ ເຊິ່ງຈະເປັນການຍູ້ແຮງຂະບວນການຜະລິດເປັນສິນຄ້າ, ການບໍລິການ, ສ້າງວຽກເຮັດງານທຳ ເຮັດໃຫ້ຄອບຄົວມີລາຍຮັບ ແລະ ມີອາຊີບໝັ້ນຄົງດີຂຶ້ນ ແລະ ອື່ນໆ.
ຂ່າວ: ວສລ
ພາບ: ຂັນໄຊ ຂປລ
