ອີງຕາມແຈ້ງການສະບັບເລກທີ 0842/ກຄພນ ລົງວັນທີ 31 ກໍລະກົດ 2024 ໃຫ້ຮູ້ວ່າ: ກົມການຄ້າພາຍໃນ ກະຊວງອຸດສາຫະກຳ ແລະ ການຄ້າ ຂໍຖືເປັນກຽດແຈ້ງມາຍັງບັນດາທ່ານຊາບວ່າ ໃນທ້າຍອາທິດຜ່ານມາ (26-28 ກໍລະກົດ 2024) ລາຄາຊື້-ຂາຍຄໍາ ມີການເໜັງຕີງແບບຜິດປົກກະຕິ ເຊິ່ງເຮັດໃຫ້ຮ້ານຂາຍຄໍາຫຼາຍຮ້ານ ໄດ້ຢຸດການຊື້-ຂາຍຄໍາ ຊົ່ວຄາວ ເຊິ່ງກໍມີບາງຮ້ານຢຸດຕິການຂາຍ ແຕ່ຍັງຮັບຊື້ຄໍາປົກກະຕິ ລວມເຖິງທຸລະກໍາຊື້-ຂາຍຄໍາຜ່ານຊ່ອງທາງເອເລັກໂຕຣນິກ ຫຼື ແອັບພລິເຄເຊີນ ອີຊີ ໂກລ (EASY GOLD) ກໍໄດ້ມີການ ຢຸດຊື້-ຂາຍຄໍາຊົ່ວຄາວ.
ກົມການຄ້າພາຍໃນ ໃນຖານະຜູ້ຄຸ້ມຄອງ ແລະ ອອກໃບຢັ້ງຢືນຮັບຮູ້ການດໍາເນີນທຸລະກິດການຄ້າທາງເອເລັກໂຕຣນິກໃຫ້ແກ່ ແອັບພລິເຄເຊິນ ອີຊີໂກລ ໄດ້ແຕ່ງຕັ້ງຄະນະ ເພື່ອດໍາເນີນການກວດສອບ ແລະ ຕິດຕາມການດໍາເນີນງານຂອງ ແອັບພລິເຄເຊິນ ອີຊີໂກລ ເພື່ອຮັບປະກັນການມີຢູ່ຂອງຄໍາຕົວຈິງ ແລະ ກໍເພື່ອຮັບປະກັນຜົນປະໂຫຍດຂອງຜູ້ຊື້ຄໍາຜ່ານຊ່ອງທາງດັ່ງກ່າວ.
ເຖິງແມ່ນວ່າ ແອັບພລິເຄເຊີນ ອີຊີໂກລ ຈະປິດການຊື້ຄໍາ ໃນໄລຍະທ້າຍອາທິດຜ່ານມາ ເນື່ອງຈາກມີການຊື້ຄໍາແບບຜິດປົກກະຕິ ເຮັດໃຫ້ເກີດຂໍ້ຈຳກັດທາງດ້ານປະລິມານໃນການຂາຍ ເນື່ອງຈາກຕ້ອງຮັບປະກັນໃຫ້ມີຄໍາຕົວຈິງຕາມຈໍານວນການສັ່ງຊື້ ເຊິ່ງລູກຄ້າ ຫຼື ບັນດາສະມາຊິກຊື້-ຂາຍຄໍາຜ່ານທາງແອັບພລິເຄເຊິນດັ່ງກ່າວ ສາມາດດໍາເນີນການຖອນຄໍາ ເພື່ອຮັບຄໍາຕົວຈິງໄດ້ຕາມຈໍານວນທີ່ຕົນໄດ້ສະສົມໄວ້.
ພ້ອມນັ້ນ ຂໍ້ມູນການຊື້ຄໍາຜ່ານມາຂອງທ່ານຍັງຖືກເກັບຮັກສາໄວ້ໃນທີ່ປອດໄພ ແລະ ທ່ານສາມາດໄດ້ຮັບຄໍາຕົວຈິງ ຫຼື ຈໍານວນເງິນຕາມລາຄາຄໍາທີ່ໄດ້ຊື້ໄວ້ແລ້ວຕາມປົກກະຕິ ຖ້າຫາກມີບັນຫາໃດທີ່ຕິດພັນກັບການບໍລິການ ແອັບພລິເຄເຊິນ ອີຊີ ໂກລ (EASY GOLD) ທ່ານ ສາມາດຕິດຕໍ່ແຈ້ງເຖິງ ກົມການຄ້າພາຍໃນ ໂທລະສັບ: 021 412436.
ຂ່າວ: ກົມການຄ້າພາຍໃນ
