ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ກົມຕໍາຫລວດຈະລາຈອນ ກະ ກຽມຄວາມພ້ອມຮອບດ້ານ ເພື່ອສະກັດກັ້ນ ອຸບັດເຫດ ທີ່ຈະເກີດຂຶ້ນຕາມທ້ອງຖະໜົນ ໃນໄລຍະສະ ເຫລີມສະຫລອງ ສົ່ງທ້າຍປີເກົ່າ-ຕ້ອນຮັບປີໃໝ່ ສາກົນ 2024 ເປັນຕົ້ນ ໄດ້ອອກຄໍາແນະນໍາ, ກະກຽມພາຫະ ນະ, ອຸປະກອນຮັບໃຊ້, ຈັດກໍາລັງລົງຕັ້ງຈຸດກວດກາການສັນຈອນ. ທັງນີ້, ກໍເພື່ອເຮັດໃຫ້ການສະຫລອງວັນດັ່ງກ່າວ ມີຄວາມເບີກບານມ່ວນຊື່ນ ແລະ ປາສະຈາກໄດ້ຜົນເສຍຫາຍທາງດ້ານຊີວິດ, ສຸຂະພາບ ແລະ ຊັບສິນ ທີ່ເກີດຈາກການເກີດອຸບັດ ເຫດຈະລາຈອນທາງບົກ ໃນໄລຍະປີໃໝ່ສາກົນ 2024 ປີນີ້.
ພັນໂທ ແກ້ວມາລາ ແສງທອງ ຮອງຫົວໜ້າກົມຕໍາຫລວດຈະລາຈອນ ໄດ້ໃຫ້ຮູ້ໃນໂອກາດຖະແຫລງຂ່າວຕໍ່ສື່ມວນຊົນ ໃນວັນທີ 26 ທັນວາ 2023 ວ່າ: ເພື່ອເຮັດໃຫ້ການສະເຫລີມສະຫລອງສົ່ງທ້າຍປີເກົ່າ-ຕ້ອນຮັບປີໃໝ່ສາກົນ 2024 ມີຄວາມສະຫງົບ, ຄວາມເປັນລະບຽບຮອບຮ້ອຍ ແລະ ປອດໄພໃນການສັນຈອນໄປ-ມາ ປາສະຈາກໄດ້ປະ ກົດການຫຍໍ້ທໍ້ ແລະ ຫລຸດຜ່ອນຜົນເສຍຫາຍຈາກການເກີດອຸບັດເຫດ. ກົມຕໍາຫລວດຈະລາຈອນ ໄດ້ກະ ກຽມພາຫະນະ, ອຸປະກອນຮັບໃຊ້ວຽກງານວິຊາສະເພາະ ແລະ ຈັດກໍາລັງລົງເຮັດໜ້າທີ່ ຈັດສັນອໍານວຍຄວາມສະດວກ ຕາມສະຖານທີຕ່າງໆ ເຮັດໃຫ້ການສັນຈອນມີຄວາມສະດວກປອດໄພ; ຈັດກໍາລັງລົງຕັ້ງຈຸດກວດກາການສັນຈອນ ຕາມເສັ້ນທາງຫລວງ, ກວດກາເອກະ ສານ, ກວດກາຜູ້ຂັບຂີ່ພາຫະນະ, ກວດກາຈັບຄວາມໄວ, ກວດທາດເຫລົ້າ, ກວດສະພາບເຕັກນິກພາຫະນະ ແລະ ອື່ນໆ ທີ່ລະເມີດຕໍ່ກົດລະບຽບການຈະລາຈອນທາງບົກ; ໄດ້ອອກຄໍາແນະນໍາ ສະບັບເລກທີ 570/ກຈຈ, ລົງວັນທີ 12 ທັນວາ 2023 ແລະ ແຈ້ງການສະບັບເລກທີ 095/ກຈຈ, ລົງວັນທີ 12 ທັນວາ 2023, ກ່ຽວກັບການຈັດຕັ້ງປະຕິບັດການປ້ອງກັນປີໃໝ່ ແລະ ລົງໂຄສະນາລະບຽບກົດຈະລາຈອນທາງບົກ. ກ່ອນການສະເຫລີມສະຫລອງປີໃໝ່ສາກົນ 2024 ທີ່ຈະມາເຖິງນີ້, ກົມຕໍາຫລວດຈະລາຈອນ ຈະໄດ້ລົງເຄື່ອນໄຫວຊຸກຍູ້, ຊີ້ນໍາໃຫ້ກໍາລັງຕໍາຫລວດຈະລາຈອນ ທົ່ວປະເທດ ເອົາໃຈໃສ່ປະຕິບັດໜ້າທີ່ ໃນການປ້ອງກັນປີໃໝ່ສາກົນ 2024 ຢ່າງເຂັ້ມງວດ.
ພ້ອມນີ້, ກົມຕໍາຫລວດຈະລາຈອນ ຍັງໄດ້ອອກແຈ້ງການເຖິງ ພໍ່ແມ່ປະຊາຊົນ, ພະນັກງານ, ທະຫານ, ຕໍາຫລວດ ແລະ ຜູ້ໃຊ້ລົດ-ໃຊ້ຖະໜົນ ກ່ຽວກັບການປ້ອງກັນ, ສະກັດກັ້ນອຸບັດເຫດ ໃນ ໄລຍະສະເຫລີມສະຫລອງ ປີໃໝ່ສາກົນ 2024 ເຊິ່ງຜູ້ຂັບຂີ່ລົດຕ້ອງກຽມຄວາມພ້ອມ ດ້ານສຸຂະພາບຮ່າງກາຍ, ເອກະສານຂອງຜູ້ຂັບຂີ່ພາຫະນະໃຫ້ຄົບຊຸດຕາມລະບຽບການ ເຊັ່ນ: ໃບຂັບຂີ່, ໃບທະບຽນ, ໃບກວດກາເຕັກນິກ, ຄ່າທາງ, ປະກັນໄພ ແລະ ໃບອະນຸຍາດດໍາເນີນທຸລະກິດ ສໍາລັບລົດຂົນສົ່ງສິນຄ້າ ແລະ ລົດໂດຍສານ; ຜູ້ຂັບຂີ່ລົດຈັກ ຕ້ອງໃສ່ໝວກກັນກະທົບ ທັງຜູ້ຂັບ ແລະ ຜູ້ຊ້ອນທ້າຍ (ຖ້າການລະເມີດທີ່ມີຄວາມສ່ຽງຈະພາໃຫ້ເກີດອູບັດເຫດ ເຈົ້າໜ້າທີ່ຈະໄດ້ກັກພາຫະນະໄວ້) ເພື່ອຄວາມປອດໄພຂອງຜູ້ຂັບຂີ່; ຜູ້ຂັບຂີ່ລົດໃຫຍ່ ຕ້ອງຮັດສາຍແອວນິລະໄພ ເພື່ອຮັບປະກັນຄວາມປອດໄພໃຫ້ແກ່ຜູ້ຂັບຂີ່ ແລະ ຜູ້ໂດຍສານ; ກ່ອນຈະນຳໃຊ້ພາຫະນະຕ້ອງກວດສະພາບເຕັກນິກ ແລະ ຄວາມພ້ອມຂອງພາຫະນະ ໃຫ້ມີຄວາມຮັບປະກັນເປັນຢ່າງດີ; ລົດຂົນສົ່ງໂດຍສານທາງໄກ ຕ້ອງມີໂຊເຟີສຳຮອງ ທຸກຄັ້ງໃນເວລາເດີນທາງ; ສະເພາະເສັ້ນທາງດ່ວນ, ການໃຊ້ຄວາມໄວສູງສຸດບໍ່ໃຫ້ເກີນ 120 km/ ຊົ່ວໂມງ ແລະ ຄວາມໄວຕໍ່າສຸດບໍ່ໃຫ້ຫລຸດ 80 km/ຊົ່ວໂມງ (ເຈົ້າໜ້າທີ່ຕໍາຫລວດຈະໄດ້ຈັບຄວາມໄວຜ່ານກ້ອງວົງຈອນປິດ); ຜູ້ຂັບຂີ່ພາຫະນະຕ້ອງເຄົາລົບ ແລະ ປະຕິບັດຕາມກົດລະບຽບຈະລາຈອນທາງບົກ ຢ່າງເຂັ້ມງວດ.
ສໍາລັບຂໍ້ຫ້າມຜູ້ຂັບຂີ່ພາຫະນະ ແມ່ນຫ້າມຜູ້ຂັບຂີ່ພາຫະນະ ນໍາໃຊ້ໂທລະສັບ ໃນເວລາຂັບຂີ່ ຢ່າງເດັດຂາດ; ຫ້າມຜູ້ຂັບຂີ່ດື່ມສີ່ງມືນເມົາ (ເມົາຫ້າມຂັບຂີ່ລົດ) ຢ່າງເດັດຂາດ ຖ້າຫາກກວດກາພົບເຫັນ ເຈົ້າໜ້າທີ່ຕຳຫຼວດຈະລາຈອນຈະໄດ້ກັກໄວ້, ຊ່ວງເມົາແລ້ວຈື່ງອະນຸຍາດໃຫ້ໄປ ຫຼື ໃຫ້ຍາດພີ່ນ້ອງໝູ່ຄູ່ມາຮັບເອົາ ເພື່ອຮັບປະກັນຄວາມປອດໄພ; ຫ້າມຂັບຂີ່ລົດຄວາມໄວເກີນກົດໝາຍກຳນົດ (ສຳລັບລົດຂົນສົ່ງໂດຍສານ ຫ້າມແລ່ນໄວເກີນ 80 Km/h ຕາມເສັ້ນທາງຫຼວງ ສະເພາະຢູ່ເຂດນອກເມືອງ); ຫ້າມຂັບຂີ່ພາຫະນະ ເປັນພືງເປັນແພ, ຊ່ວງຊີງກັນຕາມເສັ້ນທາງ ຢ່າງເດັດຂາດ; ຫ້າມນຳໃຊ້ລົດຂົນສົ່ງໂດຍສານ ບັນທຸກສີນຄ້າ ແລະ ບັນທຸກຜູໂດຍສານເກີນກໍານົດ ແລະ ຊ່ວງຊີງເອົາຜູ້ໂດຍສານ ຢ່າງເດັດຂາດ; ຫ້າມຜູ້ປົກຄອງປະປ່ອຍໃຫ້ເດັກນ້ອຍ ທີ່ອາຍຸບໍ່ເຖີງກະສຽນ ຂັບຂີ່ພາຫະນະ ຢ່າງເດັດຂາດ; ຫ້າມຈອດລົດຕາມເສັ້ນທາງດ່ວນ ຢ່າງເດັດຂາດ (ຍົກເວັ້ນກໍລະນີພາຫະນະເປ່ເພ); ຖ້າບຸກຄົນໃດທີ່ລະເມີດຕໍ່ກົດຈະລາຈອນທາງບົກ ຈະຖືກສຶກສາອົບຮົມ ແລະ ປັບໃໝຕາມລະບຽບກົດໝາຍ ຢ່າງເຂັ້ມງວດ.
ຂ່າວ: ກິດຕາ
ພາບ: ວຽງຈັນໃໝ່