ກອງປະຊຸມ ກະກຽມຄວາມພ້ອມໃຫ້ແກ່ບັ້ນສະເຫລີມສະຫລອງ 3 ວັນປະຫວັດ ສຳຄັນໃນປີ 2025 ຄື: ວັນສ້າງຕັ້ງພັກປະຊາຊົນ ປະຕິວັດລາວ ຄົບຮອບ 70 ປີ, ວັນສະຖາປະນາ ສປປ ລາວ ຄົບຮອບ 50 ປີ ແລະ ວັນເກີດປະທານ ໄກສອນ ພົມວິຫານ ຄົບຮອບ 105 ປີ ຈັດຂຶ້ນໃນວັນທີ 6 ສິງຫາ 2024 ໂດຍການເປັນປະທານຂອງ ສະຫາຍ ພົນເອກ ຈັນສະໝອນ ຈັນຍາລາດ ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນປະເທດ, ມີບັນດາລັດຖະມົນຕີ, ຮອງລັດຖະມົນຕີ, ຕາງໜ້າອົງການຈັດຕັ້ງມະຫາຊົນ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.
ໃນກອງປະຊຸມ, ຕາງໜ້າແຕ່ລະພາກສ່ວນປະກອບຄຳຄິດເຫັນໃສ່ບັນດາແຜນການ, ໜ້າວຽກແຕ່ຂັ້ນຂອງອະນຸກຳມະການຕ່າງໆ ເພື່ອໃຫ້ສ່ອດຄອງ, ຄົບຖ້ວນ ແລະ ແທດເໝາະກັບສະພາບເງື່ອນໄຂຕົວຈິງ. ທັງນີ້, ກໍເພື່ອເຮັດໃຫ້ການກະກຽມສະເຫລີມສະຫລອງ 3 ວັນປະຫວັດສາດດັ່ງກ່າວ ມີເນື້ອໃນເລິກເຊິ່ງ, ມີຮູບການທີ່ເໝາະສົມ ແລະ ທັນກັບກຳນົດເວລາ, ບົນຈິດໃຈປະຢັດມັດທະຍັດ ໂດຍຖືເອົາເນື້ອໃນເປັນຕົ້ນຕໍ ແລະ ຕ້ອງປຸກລະດົມທຸກພາກສ່ວນໃນທົ່ວສັງຄົມເຂົ້າຮ່ວມຢ່າງເປັນຂະບວນການຟົດຟື້ນ, ແຂງແຮງ ໃນຂອບເຂດທົ່ວປະເທດ. ສະນັ້ນ, ຈຶ່ງມີຄວາມຈໍາເປັນຕ້ອງມີການນໍາພາ-ຊີ້ນໍາ ຢ່າງໃກ້ຊິດແທດເຖິງ, ຕ້ອງກະກຽມແຕ່ລະດ້ານໃຫ້ລະອຽດ, ທັງປຸກລະດົມຂະບວນການແຂ່ງ ຂັນຮັກຊາດພັດທະນາ ໃນທົ່ວປະເທດ ໃຫ້ຟົດຟື້ນ ແລະ ແຂງແຮງ.
ໂອກາດນີ້, ສະຫາຍ ພົນເອກ ຈັນສະໝອນ ຈັນຍາລາດ ຍັງໄດ້ເນັ້ນໃຫ້ພາກສ່ວນກ່ຽວຂ້ອງ ນໍາ ເອົາເນື້ອໃນກິດຈະກຳໃນການສະເຫລີມສະຫລອງ 3 ວັນປະຫວັດສາດດັ່ງກ່າວ ໄປເຜີຍແຜ່ເຊື່ອມຊຶມ ແລະ ພ້ອມກັນຈັດຕັ້ງປະຕິບັດ ໃຫ້ເປັນຂະບວນການຟົດຟື້ນໃນທົ່ວປະເທດ, ເຮັດໃຫ້ການກະກຽມງານດັ່ງກ່າວ ມີເນື້ອໃນເລິກເຊິ່ງ, ທັນກັບກຳນົດເວລາ, ຕ້ອງນໍາພາ-ຊີ້ນໍາຢ່າງແທດເຖິງ, ເລິກເຊິ່ງ; ກະກຽມແຕ່ລະດ້ານໃຫ້ລະອຽດ, ທັງປຸກລະດົມຂະບວນການແຂ່ງຂັນຮັກຊາດພັດທະນາ ໃນທົ່ວປະເທດໃຫ້ຟົດຟື້ນ, ແຂງແຮງ ສ້າງທ່ວງທ່າໃໝ່ໃຫ້ແກ່ການກະກຽມຄວາມພ້ອມ ດຳເນີນກອງປະຊຸມໃຫຍ່ຂັ້ນຂອງຕົນ ແລະ ກ້າວເຂົ້າສູ່ກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XII ຂອງພັກ ດ້ວຍຜົນສໍາເລັດອັນໃໝ່ໃຫຍ່ຫລວງກວ່າເກົ່າ ແລະ ຕ້ອງປຸກລະດົມທຸກພາກສ່ວນໃນທົ່ວສັງຄົມເຂົ້າຮ່ວມ ຢ່າງເປັນຂະບວນການຟົດຟື້ນ ແລະ ມີຄວາມໝາຍສຳຄັນ.
ຂ່າວ: ໄພນາລິນ
