ສະຫະພັນກິລາດອກປີກໄກ່ແຫ່ງຊາດລາວ ກຽມຈັດ ການແຂ່ງຂັນກິລາດອກປີກໄກ່ທົ່ວປະເທດ ປະເພດທີມ ຄັ້ງທີ II ຊິງຂັນນາຍົກລັດຖະມົນຕີ ໃນລະຫວ່າງວັນທີ 3-6 ທັນວາ 2020ທີ່ສະໂມສອນກິລາດອກປີກໄກ່ເສດຖາ (ບ້ານ ບຶງຂະຫຍອງ ) ນະຄອນຫລວງວຽງຈັນ ຊີງເງິນລາງ ວັນລວມທັງຫມົດ 100 ກວ່າລ້ານກີບ.

ທ່ານ ບຸນເຫລືອ ສິນໄຊວໍລະວົງ, ຮອງລັດຖະມົນຕີ ກະຊວງການເງິນ, ປະທານສະຫະພັນກິລາດອກປີກໄກ່ແຫ່ງລາວ ຖະແຫລງຂ່າວຕໍ່ສື່ມວນຊົນໃນວັນທີ 30 ພະ ຈິກ 2020 ທີ່ຫ້ອງປະຊຸມຄະນະໂອແລັມປິກແຫ່ງຊາດລາວ ວ່າ: ການແຂ່ງຂັນໃນຄັ້ງນີ້ ຖືເປັນໃບໜ້າປະຫວັດ ສາດຂອງວົງການ ກິລາດອກປີກໄກ່ບ້ານເຮົາ ເພາະໄດ້ຮັບກຽດເປັນຢ່າງສູງຈາກນາຍົກລັດຖະມົນຕີແຫ່ງ ສປປ ລາວ ອະນຸຍາດໃຫ້ນຳໃຊ້ ນາມ ມະຍົດ “ ຊິງຂັນ ນາຍົກລັດຖະ ມົນຕີ ” ເປັນຄັ້ງທໍາອິດ ໂດມີຈຸດປະສົງ ເພື່ອສະເຫຼີມສະ ຫຼອງວັນຊາດ ວັນທີ 02 ຄົບຮອບ 45 ປີ, ສ້າງຂະບວນ ການແຂ່ງຂັນ ແລະ ການຫຼິ້ນກິລາດອກປີກໄກ່ພາຍໃນປະ ເທດໃຫ້ມີຄວາມຟົດຟື້ນ; ເປັນເວທີໃຫ້ນັກກິລາໄດ້ມີໂອ ກາດໃນການທົດສອບສີມືຂອງຕົນເອງ ແລະ ເລືອກໄດ້ ນັກກິລາດີເດັ່ນ ປະກອບເຂົ້າເປັນນັກກິລາທີມຊາດໃນແຕ່ ລະລຸ້ນ ຕາມວິໄສທັດຂອງຄະນະບໍລິຫານງານສະຫະພັນກິລາດອກປີໄກ່ຊຸດໃໝ່ ຄື: “ ເຂັ້ມແຂງ, ມີຄຸນນະພາບ, ເຊື່ອມໂຍງ ແລະ ເປັນກິລາເພື່ອທຸກຄົນ ”

ການແຂ່ງຂັນໃນຄັ້ງນີ້ ຈະມີທັງໝົດ 6 ລາຍການ ຄື: ຊາຍທົ່ວໄປ 18 ທີມ, ຍິງທົ່ວໄປ 8 ທີມ, ປະສົມທົ່ວໄປ 9 ທີມ, ເຍົາວະຊົນຊາຍ 13 ທີມ, ເຍົາວະ ຊົນປະສົມ 5 ທີມ ແລະ ອາວຸໂສຊາຍ 6 ທີມ. ທັງຫມົດນີ້ ແມ່ນທີມທີ່ມາຈາກທັງພາຍໃນນະຄອນຫຼວງວຽງຈັນ ແລະ ບັນດາແຂວງອ້ອມຂ້າງສູນກາງ.

ໃນງານຖະແຫລງຂ່າວຄັ້ງນີ້ ຍັງໄດ້ມີພິທີມອບ-ຮັບການອຸປະຖໍາຈາກບັນດາບໍລິສັດຈຳນວນຫນຶ່ງ ເຊີ່ງການຈັດການແຂ່ງຂັນຈະໃຊ້ງົບປະມານລວມທັງຫມົດຫລາຍກວ່າ 300 ລ້ານກີບ.

 

Loading...