ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ພິທີຖະແຫຼງຂ່າວງານມະຫາກຳສີມືຫັດຖະກຳລາວ ຄັ້ງທີ 23 ປະຈຳປີ 2024 ແລະ ການເປັນເຈົ້າ ພາບກອງປະຊຸມແຜ່ນແພພື້ນເມືອງອາຊຽນ ຄັ້ງທີ 9 ຈັດຂຶ້ນຕອນບ່າຍວັນທີ 14 ມິຖຸນາ 20024 ທີ່ໂຮງແຮມແລນມາກ ນະຄອນຫຼວງວຽງຈັນໂດຍເປັນປະທານ ຂອງທ່ານ ນາງ ສຸວິຕາ ປະເສີດ ປະທານສະມາຄົມຫັດ ຖະກຳລາວ ມີທ່ານ ນາງຈັນເທົາ ປະຖັມມະວົງ ປະທານກິດຕິມະ ສັກ ສະມາຄົມຫັດຖະກຳລາວ ທ່ານ ວິທູນ ສິດທິມໍລະດາ ຫົວ ໜ້າກົມສົ່ງເສີມການຄ້າ ແລະ ຫັດຖະກຳ ກະຊວງອຸດສາຫະກຳ ແລະ ການຄ້າ ພ້ອມຜູ້ຕາງໜ້າຈາກກະຊວງການຕ່າງປະເທດ ກະຊວງຖະແຫຼງຂ່າວ ວັດທະນາທຳ ແລະ ທ່ອງທ່ຽວ, ສະພາການຄ້າ ແລະ ອຸດສາຫະກຳແຫ່ງຊາດລາວ, ທູດ ຕານຸທູດ, ອົງການຈັດຕັ້ງສາກົນ ປະຈຳ ສປປ ລາວ ເຂົ້າຮ່ວມ.
ທ່ານ ພູທອງໄຊສະນິດ ຮອງປະທານສະມາຄົມຫັດຖະກຳລາວ ກ່າວວ່າ: ງານມະຫາກຳສີມືຫັດຖະກຳລາວ ເປັນງານປະເພນີບຸນປາງໃຫຍ່ ແລະ ເປັນກິດຈະກຳຫຼັກຂອງຊາວຊ່າງຫັດຖະກຳລາວເຊິ່ງໄດ້ຈັດຂຶ້ນທຸກໆປີ ງານດັ່ງກ່າວ ໄດ້ຈັດຂຶ້ນຄັ້ງທໍາອິດໃນປີ 2002 ເມື່ອມາເຖິງປີ 2024 ປີນີ້ ການຈັດງານມະຫາກຳສີມືຫັດຖະກຳລາວໄດ້ເປັນຄັ້ງທີ 23 ດ້ວຍຈຸດປະສົງລວມ ເພື່ອສົ່ງ ເສີມການຜະລິດ ແລະ ການຕະຫຼາດ ໃນຂະແໜງ ຫັດຖະກຳ ພ້ອມດຽວກັນ ຍັງເປັນກິດຈະກຳຫຼັກທີ່ຈັດຂຶ້ນເພື່ອສະເຫຼີມສະຫຼອງວັນຫັດຖະກຳລາວ ວັນທີ 1 ພະຈິກ ໃຫ້ມີເນື້ອໃນຄວາມໝາຍເລິກເຊິ່ງ ແລະ ມີບັນຍາກາດຟົດຟື້ນ ສຳລັບການຈັດງານມະຫາກຳສີມືຫັດຖະກຳລາວ ຄັ້ງທີ 23 ປະຈຳປີ 2024 ແມ່ນຈະຈັດຂຶ້ນໃນລະຫວ່າງວັນທີ 26 ຕຸລາ ຫາ ວັນທີ 3 ພະຈິກ 2024 ຢູ່ສູນການຄ້າລາວ-ໄອເຕັກນະຄອນຫຼວງວຽງຈັນ.
ສຳລັບກອງປະຊຸມແຜ່ນແພພື້ນເມືອງອາຊຽນ ຄັ້ງທີ 9 ແລະ ເຫດຜົນຄວາມເປັນມາ ທີ່ ສປປ ລາວ ໄດ້ເປັນເຈົ້າພາບ ເຊິ່ງກອງປະຊຸມສົ່ງເສີມແຜ່ນແພພື້ນເມືອງອາຊຽນ (ASEAN Traditional Textile Symposium) ຄັ້ງທໍາອິດ ໄດ້ຈັດຂຶ້ນຢູ່ນະຄອນຫຼວງຈາກາຕາ ປະເທດອິນໂດເນເຊຍ ໃນປີ 2005 ກອງປະຊຸມດັ່ງກ່າວ ໃນເວລານັ້ນ ໄດ້ແນໃສ່ 3 ຈຸດປະສົງຕົ້ນຕໍ ເປັນຕົ້ນ ແມ່ນເພື່ອຊຸກຍູ້ ແລະ ສ້າງເງື່ອນໄຂໃຫ້ແຕ່ລະປະເທດທີ່ເປັນສະມາຊິກອາຊຽນ ໄດ້ຜັດປ່ຽນກັນເປັນເຈົ້າພາບຈັດກອງປະຊຸມຕາມລໍາດັບຕົວອັກສອນ ເຊິ່ງ2 ປີໃດຈັດຄັ້ງໜຶ່ງ ເພື່ອເປັນເວທີ ແລະ ສ້າງໂອກາດໃຫ້ຜູ້ທີ່ມີສ່ວນກ່ຽວຂ້ອງ ໃນການຜະລິດແຜ່ນແພທັງແບບພື້ນເມືອງ ແລະ ແບບປະຍຸກ ໃນບັນດາປະເທດອາຊຽນ ໃຫ້ໄດ້ເຂົ້າຮ່ວມແລກປ່ຽນບົດ ຮຽນປະສົບການ ເພື່ອວາງສະແດງຜະລິດຕະພັນຫັດຖະກຳແຜ່ນແພທີ່ມີຄຸນນະພາບສູງ ທີ່ຜະລິດຢູ່ໃນແຕ່ລະປະເທດອາຊຽນ ໃຫ້ຜູ້ເຂົ້າຮ່ວມງານໄດ້ຊົມ ໄດ້ເຫັນ ແລະ ໄດ້ສຳພັດ ຄວາມອາດສາມາດຂອງການ ຕໍ່າຜ້າ ໃນແຕ່ລະປະເທດສະມາຊິກ ແລະ ເພື່ອສົ່ງເສີມຫົວຄິດປະດິດສ້າງ ໃນການຜະລິດແຜ່ນແພພື້ນ ເມືອງ ຢ່າງສ້າງສັນ ແລະ ສາມາດຜະລິດເປັນສິນຄ້າສົ່ງອອກ.
ນັບແຕ່ປີ 2005 ເປັນຕົ້ນມາ ກອງປະຊຸມດັ່ງກ່າວ ໄດ້ຈັດຂຶ້ນແລ້ວ 8 ຄັ້ງ ປະເທດທີ່ໄດ້ເປັນເຈົ້າ ພາບແລ້ວມີ 6 ປະເທດ ຄື: ປະເທດບຣູໄນ, ອິນໂດເນເຊຍ, ຟີລິບປິນ, ມາເລເຊຍ, ໄທ ແລະ ຫວຽດນາມ, ສ່ວນປະເທດທີ່ຍັງບໍ່ໄດ້ເປັນເຈົ້າພາບມີ 4 ປະເທດ ຄື: ສປປ ລາວ, ກຳປູເຈຍ, ມຽນມາ ແລະ ປະເທດສິງກະ ໂປ.
ສະມາຄົມຫັດຖະກຳລາວ ຖືກເຊີນໄປຮ່ວມກອງປະຊຸມ ຄັ້ງທີ8 ທີ່ປະເທດມາເລເຊຍ ລະຫວ່າງວັນທີ 25-30 ກັນຍາ 2022 ແລະ ໄດ້ຮັບການເຫັນດີຈາກກອງປະຊຸມໃຫ້ ສປປ ລາວ ເປັນເຈົ້າພາບຈັດກອງປະຊຸມ ຄັ້ງທີ9 ໃນປີ 2024 ເຊິ່ງຕົວແທນຈາກສະມາຄົມຫັດຖະກຳລາວ 2 ທ່ານ ຄື: ທ່ານ ນາງ ໄພພອນ ໄຊຍະເດດ ແລະ ທ່ານ ນາງ ດວງມາລາ ພົມມະວົງ ໄດ້ຂຶ້ນເວທີຮັບເອົາທຸງໄຊ ເພື່ອເປັນເຈົ້າພາບໃນງານຄັ້ງນີ້.