ພະແນກອຸດສາຫະກຳ ແລະ ການຄ້າ ນະຄອນຫຼວງວຽງຈັນ (ອຄ.ນວ) ໄດ້ຈັດງານຖະແຫຼງຂ່າວກຽມຈັດງານ ວາງສະແດງ ແລະ ຈຳໜ່າຍສິນຄ້າໜຶ່ງເມືອງໜຶ່ງຜະລິດຕະພັນ ແລະ ສິນຄ້າຄອບຄົວຕົວແບບຂອງນະຄອນຫຼວງວຽງຈັນ ຄັ້ງທີ X ຂຶ້ນ ໃນວັນທີ 30 ກໍລະກົດ 2024 ທີ່ສູນການຄ້າລາວໄອເຕັກ ເຂົ້າຮ່ວມຂອງທ່ານ ບຸນລ້ຳ ວົງສຸທິ ຮອງຫົວໜ້າພະແນກ ອຄ.ນວ, ທ່ານ ບົວຄຳ ສີສົງຄາມ ຮອງຫົວໜ້າພະແນກ ກະສິກຳ ແລະ ປ່າໄມ້ ນວ, ທ່ານ ສັງຄົມ ຈັນສຸກ ປະທານສະພາການຄ້າ ແລະ ອຸດສາຫະກຳ ນວ, ມີຮອງຫົວໜ້າພະແນກ ຖວທ ນວ, ຜູ່ຕາງໜ້າຈາກບໍລິສັດລາວເວີນ ແລະ ຜູ້ປະກອບການເຂົ້າຮ່ວມ.
ທ່ານ ບຸນລໍ້າ ວົງສຸທິ ກ່າວວ່າ: ຈຸດປະສົງຂອງການຈັດງານ ເພື່ອເປັນການວັດລະດັບຜະລິດຕະພັນ ເພື່ອນຳໄປສູ່ການພັດທະນາແບບຍືນຍົງ ແລະ ມີປະສິດທິຜົນສູງສຸດ ໃຫ້ມີຄວາມສາມາດເຂົ້າຫາກຸ່ມຕະຫຼາດເປົ້າໝາຍໄດ້. ສ້າງຄວາມເຂັ້ມແຂງໃຫ້ຫົວໜ່ວຍ
ທຸລະກິດທີ່ເຮັດການຜະລິດ ສາມາດກ້າວເຂົ້າຕະຫຼາດເທື່ອລະກ້າວ, ພ້ອມກັນນັ້ນສາມາດພັກດັນສິນຄ້າຄອບຄົວຕົວແບບ ມີຄວາມກະຕືລືລົ້ນໃນການ ພັດທະນາສິນຄ້າໂຕເອງ ແລະ ກ້າວເປັນສິນຄ້າທີ່ໄດ້ຮັບກາໝາຍ ໂອດ໊ອບ ແຫ່ງຊາດ ຂອງນະຄອນຫຼວງວຽງຈັນ, ເປັນການສ້າງມູນຄ່າໃຫ້ສິນຄ້າໂອດ໊ອບ ແຫ່ງຊາດ ໃຫ້ເປັນທີ່ຍອມຮັບ ຂອງສັງຄົມ ຜູ້ຊົມໃຊ້ມີຄວາມເຊື່ອໝັ້ນຫຼາຍຂຶ້ນ ໃຫ້ເຫັນໄດ້ຜະລິດຕະພັນທີ່ມີທ່າແຮງ ເພື່ອກຳນົດໃຫ້ເປັນຜະລິດຕະພັນທີ່ເປັນເອກະລັກ ສາມາດສ້າງກຸ່ມການຜະລິດ ເປັນສິນຄ້າທີ່ເປັນທ່າແຮງຂອງບ້ານ, ເມືອງ ແລະ ແຂວງ ໃນຕໍ່ໜ້າ, ເພື່ອເປັນການໂຄສະນາແລກປ່ຽນບົດຮຽນ ລະຫວ່າງນັກທຸລະກິດ, ຜູ້ປະກອບການ, ຜູ້ຜະລິດສິນຄ້າດ້ວຍກັນ.
ທ່ານກ່າວວ່າ ງານວາງສະແດງ ແລະ ຈຳໜ່າຍສິນຄ້າໜຶ່ງເມືອງໜຶ່ງຜະລິດຕະພັນ ແລະ ສິນຄ້າຄອບຄົວຕົວແບບ ຂອງນະຄອນຫຼວງວຽງວັນ ຄັ້ງທີ X ຄາດຄະເນສິນຄ້າໂອດ໊ອບເຂົ້າຮ່ວມງານເພີ່ມຂຶ້ນ 7,5%, ຄາດເຄເນມວນຊົນເຂົ້າຮ່ວມ 75.100 ຄົນ ຕໍ່ 9ວັນ, ຄາດຄະເນມູນຄ່າສິນຄ້າໃນງານ 3,886 ຕື້ກີບ, ຄາດຄະເນການຂາຍສິນຄ້າ 1,01 ຕື້ກີບ. ຄາດຄະເນຈະມີຜູ້ນຳສິນຄ້າເຂົ້າຮ່ວມ 160 ຫົວໜວ່ຍ ເຊິ່ງເປົ້າໝາຍຜູ້ປະກອບການເຂົ້າຮ່ວມ ສິນຄ້າໜຶ່ງເມືອງໜຶ່ງຜະລິດຕະພັນ ໂອດ໊ອບ 69 ຫົວໜ່ວຍ, ສິນຄ້າຄອບຄົວຕົວແບບ 45 ຫົວໜ່ວຍ, ສິນຄ້າອຸດສາຫະກຳ 10 ຫົວໜ່ວຍ, ສະພາການຄ້າ ແລະ ອຸດສາຫະກຳ 11 ຫົວໜ່ວຍ, ຫົວໜ່ວຍທຸລະກິດທ່ອງທ່ຽວ 5 ຫົວໜ່ວຍ, ສິນຄ້າກະສິກຳ (ກະສິກຳປຸງແຕ່ງ) 20 ຫົວໜ່ວຍ.
ສ່ວນລາຄາຫ້ອງເຊົ່າ 3×3 ແມັດ ສິນຄ້າໂອດ໊ອບ ເລີ່ມຕົ້ນລາຄາຫ້ອງລະ 1,8 ລ້ານກີບ, ສິນຄ້າຄອບຄົວຕົວແບບ ຫ້ອງລະ 3 ລ້ານກີບ, ຫົວໜ່ວຍທຸລະກິດທ່ອງທ່ຽວ – ສິນຄ້າກະສິກຳປຸງແຕ່ງ ຫ້ອງລະ 2,5 ລ້ານກີບ, ຜະລິດຕະພັນອຸດສາຫະກຳ ຫ້ອງລະ 3,5
ລ້ານກີບ, ສິນຄ້າເບ້ຍໄມ້ ຫ້ອງລະ 8 ແສນກີບ.
ການຈັດງານວາງສະແດງ ແລະ ຈຳໜ່າຍສິນຄ້າໜຶ່ງເມືອງໜຶ່ງຜະລິດຕະພັນ ແລະ ສິນຄ້າຄອບຄົວຕົວແບບຂອງນະຄອນຫຼວງວຽງຈັນ ຄັ້ງທີ X ຈະເລີ່ມເລີ່ມແຕ່ ວັນທີ 14-22 ກັນຍາ 2024 ທີ່ສູນການຄ້າລາວໄອເຕັກ ຕຶກເກົ່າ.
ຂ່າວ: ເສດຖະກິດການຄ້າ
