ທ່ານ ສຸກດາລາ ນໍລະແສງ ຮອງປະທານສະຫະພັນມວຍ ລາວແຫ່ງຊາດ, ທັງເປັນປະທານບໍລິສັດທະວີຊັບ ກໍ່ສ້າງຂົວທາງ ຈຳກັດ ຜູ້ດຽວ ຕໍ່ສື່ມວນຊົນໃນວັນທີ 14 ກຸມພານີ້ ທີ່ນະຄອນ ຫລວງວຽງຈັນ ກ່ຽວກັບການຈັດການແຂ່ງຂັນຊົກມວຍລາວລະດັບຊາດ ຊີງແຊັມສາຍແອວກຽດຕິຄຸນຂອງທ່ານນາຍົກລັດ ຖະມົນຕີ ແຫ່ງ ສປປ ລາວ ຮອບທີ 2 ຊຶ່ງຈະຈັດຂຶ້ນໃນວັນທີ 23 ກຸມພາ 2024 ຢູ່ສະໜາມກິລາ ຫລັກ2 ນະຄອນປາກເຊ, ແຂວງຈຳປາສັກ.
ຈຸດປະສົງເພື່ອຄັດເລືອກເອົານັກກິລາມວຍໃນແຕ່ລະຮຸ່ນນ້ຳໜັກ ຄື: ຮຸ່ນ 51 ກິໂລ, 57 ກິໂລ ແລະ 65 ກິໂລ ກຽມສົ່ງເຂົ້າ ຮ່ວມແຂ່ງຂັນລາຍການແຂ່ງຂັນໃນລະດັບພາກພື້ນ ແລະ ສາກົນໃນຕໍ່ໜ້າ. ການແຂ່ງຂັນຄັ້ງນີ້ ຈະຄັດເລືອກເອົາຜູ້ຊະນະເລີດໜຶ່ງດຽວໃນ 3 ຮຸ່ນນ້ຳໜັກ ເພື່ອໄປຊີງກັນໃນຮອບສຸດທ້າຍ ເພື່ອຊີງເອົາສາຍ ແອວກຽດຕິຄຸນ ຂອງທ່ານນາຍົກລັດຖະມົນຕີ ແຫ່ງ ສປປ ລາວ.
ການແຂ່ງຂັນດັ່ງກ່າວນີ້ຈະມີທັງໝົດ 16 ຄູ່. ໃນນີ້ ເປັນມວຍຮອບ 8 ຄູ່ ແລະ ມວຍປະກອບລາຍການ 8 ຄູ່ ໂດຍໄດ້ເຊີນເອົານັກມວຍຈາກປະເທດເພື່ອນ ບ້ານມາແຂ່ງກັບນັກມວຍລາວ ເພື່ອສ້າງສີສັນໃຫ້ງານຄຶກຄື້ນຂຶ້ນຕື່ມ ໂດຍບໍ່ໄດ້ເສຍຄ່າເຂົ້າຊົມ.
ຮອງປະທານສະຫະພັນມວຍລາວແຫ່ງຊາດ ໃຫ້ຮູ້ຕື່ມວ່າ: ການແຂ່ງຂັນມວຍລາວ ໃນຄັ້ງນີ້ ນອກຈາກເປັນການສ້າງນັກກິລາມວຍຢູ່ ສປປ ລາວ ໃຫ້ມີຄວາມເຂັ້ມແຂງ ທຽບເທົ່າພາກພື້ນ ແລະ ສາກົນ, ຍັງເປັນການສົ່ງເສີມປີທ່ອງທ່ຽວລາວ 2024 ໃຫ້ເປັນຂະບວນການຟົດຟື້ນ, ແນໃສ່ດຶງດູດເອົານັກທ່ອງທ່ຽວຕ່າງປະເທດເຂົ້າມາທ່ອງທ່ຽວ ສປປ ລາວ ໃຫ້ຫລາຍຂຶ້ນ.
ສຳລັບເງິນລາງວັນ ຮຸ່ນນ້ຳໜັກ 57 ກິໂລ ແລະ ຮຸ່ນ 65 ກິໂລ ຊະນະເລີດ ໄດ້ຮັບສາຍແອວກຽດຕິຄຸນຂອງທ່ານນາຍົກລັດ ຖະມົນຕີ ແຫ່ງ ສປປ ລາວ ພ້ອມເງິນລາງວັນ 100 ລ້ານກີບ ແລະ ຮອງຊະນະເລີດ ໄດ້ຮັບເງິນລາງວັນ 50 ລ້ານກີບ. ສ່ວນຮຸ່ນນ້ຳໜັກ 51 ກິໂລ ໄດ້ຮັບສາຍແອວ ພ້ອມເງິນລາງວັນ 60 ລ້ານກີບ ແລະ ຮອງຊະນະເລີດ ໄດ້ຮັບເງິນລາງວັນ 30 ລ້ານກີບ.
