ກຽມປູກໄມ້ໃຫ້ໝາກ ແລະ ຜັກປອດສານພິດ ຢູ່ເຂດບ້ານໜອງ ເມືອງປາກຊ່ອງ

ບໍລິສັດ ເອັມດີເອ ລາຟາມ ຈໍາກັດຜູ້ດຽວ ສຳປະທານທີ່ດິນເນື້ອທີ່ 36,7 ເຮັກຕາ ຢູ່ເຂດບ້ານໜອງ ເມືອງປາກຊ່ອງ ແຂວງຈໍາປາສັກ ເພື່ອປູກໝາກອາໂວກາໂດ, ແມັກຄາເດເມຍ, ແນວພັນ, ກາເຟ ແລະ ຜັກປອດສານພິດ.

ພິທີເຊັນສັນຍາສໍາປະທານ ໂຄງການດັ່ງກ່າວ ຈັດຂຶ້ນໃນວັນທີ 26 ສິງຫາ 2024 ຕາງໜ້າເຊັນໂດຍທ່ານ ສຸກສະຫວັນ ວິໄລວົງ ຫົວໜ້າພະແນກແຜນການ ແລະ ການລົງທຶນແຂວງຈຳປາສັກ ແລະ ທ່ານ ອິນ ຊູ ຊອງ (In Soo Song) ປະທານບໍລິສັດ ເອັມດີເອ ລາວ ຈໍາກັດຜູ້ດຽວ, ລົງນາມເປັນພະຍານ ມີທ່ານ ພິມພອນ ພັນດານຸວົງ ເຈົ້າເມືອງໆປາກຊ່ອງ, ທ່ານ ຄໍາເຜີຍ ບຸດໂທ ຮອງຫົວໜ້າພະແນກກະສິກໍາ ແລະ ປ່າໄມ້ແຂວງ, ທ່ານ ຊິນ ຢອນ ຈຸງ (Shin Yeon Jung) ຜູ້ອໍານວຍການບໍລິສັດ ເອັມດີເອ ລາຟາມ ຈໍາກັດຜູ້ດຽວ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.

ການເຊັນສັນຍາສໍາປະທານຄັ້ງນີ້ ກໍເພື່ອພັດທະນາເນື້ອທີ່ດິນດ້ານກະສິກໍາ ຢູ່ເຂດບ້ານດັ່ງກ່າວ ເພື່ອຜົນປະໂຫຍດທາງດ້ານເສດຖະກິດ ແກ່ປະຊາຊົນລາວ ກໍຄືການຜະລິດກະສິກໍາປູກຝັງ.

ຂ່າວ-ພາບ: ທູນທອງໃຈ