ເພື່ອເປັນການກຽມພ້ອມຮັບມືກັບສິ່ງທີ່ອາດຈະເກີດຂຶ້ນລະດູຝົນປີນີ້ ເຊັ່ນ: ນໍ້າຖ້ວມ ດິນເຈື່ອນ ລົມພະຍຸພັດເຂົ້າ ຫລື ເຫດການອື່ນໆ ທາງອົງການກາແດງແຫ່ງຊາດລາວໄດ້ສົມທົບກັບຄະນະກໍາມະການຄຸ້ມຄອງໄພພິບັດແຫ່ງຊາດແຕ່ລະຂັ້ນ ເພື່ອຕິດເຝົ້າລະວັງຢ່າງໃກ້ຊິດກ່ຽວກັບສະພາບການປ່ຽນ ແປງຂອງດິນຟ້າອາກາດ ເພື່ອລາຍງານຂໍ້ມູນຂ່າວສານໃຫ້ແກ່ປະຊາຊົນໄດ້ຮັບຮູ້
ສຈ ດຣ ພູທອນ ເມືອງປາກ ປະທານອົງການກາແດງແຫ່ງຊາດລາວໃຫ້ສໍາພາດວ່າ: ປັດຈຸບັນ ອົງການກາແດງແຫ່ງຊາດລາວໄດ້ແຈ້ງການເຖິງອົງການກາແດງແຕ່ລະແຂວງໃຫ້ເອົາໃຈໃສ່ຕິດຕາມເຝົ້າລະວັງພະຍາກອນອາກາດຈາກກົມອຸຕຸນິຍົມອຸທົບກະສາດຂອງກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມ ຫລື ພະຍາກອນອາກາດຂອງບັນດາປະເທດໃກ້ຄຽງເປັນປະຈໍາ ເນື່ອງຈາກໃນໄລຍະນີ້ສະພາບອາກາດມີການປ່ຽນແປງ ເພື່ອເຜີຍແຜ່ຂໍ້ມູນຂ່າວສານໃຫ້ປະຊາຊົນໄດ້ຮັບຮູ້ ແລະ ມີສະຕິໃນການປ້ອງກັນກັບສິ່ງທີ່ຈະເກີດຂຶ້ນ, ນອກນີ້ ທາງອົງການກາແດງແຫ່ງຊາດລາວຍັງໄດ້ກຽມເຄື່ອງບັນເທົາທຸກ ເພື່ອໄວ້ຊ່ວຍເຫລືອປະຊາຊົນຖ້າກໍລະນີເກີດໄພພິບັດທາງທໍາມະຊາດຂຶ້ນ
ປະທານອົງການກາແດງແຫ່ງຊາດລາວໃຫ້ຮູ້ຕື່ມວ່າ: ເພື່ອບັນເທົາທຸກໃຫ້ແກ່ປະຊາຊົນທີ່ໄດ້ຮັບຜົນກະທົບຈາກການຜະລິດໃນໄລຍະຜ່ານມາ ໂດຍສະເພາະການຂາດເຂົ້າກິນ. ສະນັ້ນ ທາງອົງການກາແດງແຫ່ງຊາດລາວຈະໄດ້ນໍາເອົາເຂົ້າສານຈໍານວນ 900 ໂຕນຈາກການຊ່ວຍເຫລືອຂອງອົງການອາຫານໂລກແຈກຢາຍໃຫ້ແຂວງເປົ້າໝາຍ 4 ແຂວງ ແລະ 16 ເມືອງ ມີຈໍານວນ 220 ບ້ານ ເປັນຕົ້ນ: ແຂວງ ອຸດົມໄຊ ຫລວງນໍ້າທາ, ເຊກອງ ແລະ ແຂວງສາລະວັນ ແລະ ຄາດວ່າພາຍໃນທ້າຍເດືອນກໍລະກົດນີ້ ຈະໄດ້ເລີ່ມແຈກຢາຍໃຫ້ສໍາເລັດ.
