ອົງການປົກຄອງແຂວງວຽງຈັນ ເຊັນບົດບັນທຶກຄວາມເຂົ້າໃຈ (MOU) ກັບບໍລິສັດ ບຸນເຮືອງ ການຄ້າຂາເຂົ້າ-ຂາອອກຈຳກັດ ເພື່ອສຶກສາ-ສຳຫລວດຄວາມເປັນໄປໄດ້ ໂຄງການພັດທະນາແຫລ່ງທ່ອງທ່ຽວແບບອະນຸລັກ ຢູ່ເຂດບ້ານນ້ຳເຟືອງ ເມືອງແມດ ແຂວງວຽງຈັນ ໃນວັນທີ 31 ກໍລະກົດ 2024 ຕາງໜ້າລົງນາມຄັ້ງນີ້ໂດຍທ່ານ ເຕັ່ງເມັ່ງ ຢ່າງລືໄຊ ຫົວໜ້າພະແນກແຜນການ ແລະ ການລົງທຶນ ແຂວງວຽງຈັນ ແລະ ທ່ານ ຄຳພັນ ບຸນເຮືອງ ອຳນວຍການບໍລິສັດ ບຸນເຮືອງ ການຄ້າຂາເຂົ້າ-ຂາອອກຈຳກັດ, ມີ ທ່ານ ຄຳພັນ ສິດທິດຳພາ ເຈົ້າແຂວງໆວຽງຈັນ ພ້ອມດ້ວຍພະແນກການ ແລະ ພາກສ່ວນກ່ຽວຂ້ອງຂອງທັງສອງຝ່າຍເຂົ້າຮ່ວມ.
ທ່ານ ຮົ່ວຊົງ ປ່າຈ້າ ໄດ້ກ່າວວ່າ: ແຂວງວຽງຈັນມີແຜນພັດທະນາ ເຂດສາຍນ້ຳເຟືອງ ເພື່ອສ້າງເປັນສະຖານທີ່ບໍລິການ-ການທ່ອງທ່ຽວ ແລະ ໄດ້ເຫັນດີອະນຸມັດໃຫ້ ບໍລິສັດ ບຸນເຮືອງ ການຄ້າຂາເຂົ້າ-ຂາອອກຈຳກັດ ສຶກສາ-ສຳຫລວດ ຄວາມເປັນໄປໄດ້ໂຄງການພັດທະນາແຫລ່ງທ່ອງທ່ຽວແບບອະນຸລັກ, ຊຶ່ງເປັນບໍລິສັດທີ່ລົງທຶນພາຍໃນ 100%. ການສຶກສາ-ສຳຫລວດຄວາມເປັນໄປໄດ້ ໂຄງການພັດທະນາແຫລ່ງທ່ອງທ່ຽວແບບອະນຸລັກ ຢູ່ເຂດສາຍນ້ຳເຟືອງ ເມືອງແມດ ແຂວງວຽງຈັນ ຈຸດປະສົງກໍເພື່ອສ້າງເປັນບ່ອນພັກຜ່ອນ, ຣີສອດ, ທ່າເຮືອ, ຮ້ານອາຫານ ແລະ ຈຸດບໍລິການລ່ອງເຮືອແພ, ເຮືອຄາຍັກ, ທ່ຽວຊົມທັດສະນິຍະພາບຖ້ຳຜາກ້າ ແລະ ກິດຈະກຳອື່ນໆ. ກຳນົດຂອບເຂດສຶກສາ-ສຳຫລວດຢູ່ຈຸດເຊື່ອມຕໍ່ລະຫວ່າງ ຫ້ວຍຜີໄຫ້ ຫາ ປາກຫ້ວຍນ້ຳຕັ່ງນາຍ ລ່ອງລົງຕາມສາຍນ້ຳເຟືອງ ຫາ ບ້ານນ້ຳເຟືອງ ເມືອງແມດ ແຂວງວຽງຈັນ ໂດຍກຳນົດເວລາໃນການສຶກສາ-ສຳຫລວດ 24 ເດືອນ.
ທ່ານ ຄຳພັນ ບຸນເຮືອງ ໄດ້ກ່າວວ່າ: ການເຊັນ MOU ໃນຄັ້ງນີ້ ກໍເພື່ອຢາກສຶກສາ-ສຳຫລວດ ແລະ ພັດທະນາເຂດດັ່ງກ່າວ ໃຫ້ກາຍເປັນບ່ອນພັກຜ່ອນ, ຣີສອດ, ທ່າເຮືອ, ຮ້ານອາຫານ ແລະ ຈຸດບໍລິການລ່ອງເຮືອແພ ຢ່າງແທ້ຈິງ ແລະ ຍີນດີປະຕິບັດພັນທະຕ່າງໆ ຕໍ່ພາກລັດຕາມລະບຽບການ.
