ກຽມເຂົ້າຮ່ວມງານມະຫະກໍາໜັງສື ມະຫາວິທະຍາໄລແຫ່ງຊາດ ປະຈໍາປີ 2024

ງານມະຫະກໍາໜັງສື ມະຫາວິທະຍາໄລແຫ່ງຊາດ ປະຈໍາປີ 2024 ຈະຈັດຂຶ້ນໃນລະຫວ່າງວັນທີ 27-31 ມີນານີ້ ທີ່ສະໂມ ສອນໃຫຍ່ມະຫາວິທະຍາໄລແຫ່ງຊາດລາວ, ວິທະຍາເຂດດົງໂດກ, ນະຄອນຫລວງວຽງຈັນ ພາຍໃຕ້ຫົວຂໍ້: “ອ່ານປ່ຽນຊີວິດ”.

ທ່ານ ສົມໄໝ ພົມມະຈັນ, ຜູ້ອໍານວຍການສໍານັກພິມ ດີບຸກ ຖະແຫລງຂ່າວຕໍ່ສື່ມວນຊົນໃນຕອນເຊົ້າວັນທີ 2 ມີນາ 2024 ນີ້ ທີ່ສະໂມສອນໃຫຍ່ມະຫາວິທະຍາໄລແຫ່ງຊາດລາວວ່າ: ພາຍໃນງານຄັ້ງນີ້ ຈະມີຫລາຍກວ່າ 40 ບູດເຂົ້າຮ່ວມວາງສະແດງ ແລະ ຈໍາໜ່າຍສິນຄ້າ ໂດຍສະເພາະຮ້ານປື້ມ, ໂຮງພິມ, ສໍານັກພິມ, ວິຈິດສິນ, ຫັດຖະກໍາ, ຮ້ານຂາຍເຄື່ອງທົ່ວໄປ ແລະ ອື່ນໆ, ພ້ອມນີ້ ຈະມີປື້ມລາວອອກໃໝ່ຫລາຍກວ່າ 10 ເຫລັ້ມ, ປື້ມອ່ານທົ່ວໄປທັງພາຍໃນ ແລະ ຕ່າງປະເທດນັບໝື່ນເຫລັ້ມ ໂດຍສະເພາະປື້ມໝວດແຮງບັນດານໃຈ, ທຸລະກິດ, ຊີວິດ ແລະ ຜົນງານ, ປະຫວັດ ສາດ, ວັນນະກໍາ, ນິທານ ແລະ ວິຊາການຕ່າງໆ. ນອກຈາກນີ້ ທ່ານໃດທີ່ມີປື້ມເກົ່າທີ່ເຊົາອ່ານແລ້ວສາມາດນໍາມາແລກເອົາປື້ມໃໝ່ພາຍໃຕ້ໂຄງການແລກປື້ມກັນອ່ານ ເພາະປຶ້ມເກົ່າຂອງທ່ານອາດເປັນປື້ມໃໝ່ຂອງຫລາຍຄົນ.

ພາຍໃນງານຄັ້ງນີ້ ຍັງຈະມີການບັນຍາຍ ແລະ ເສວັນນາ ຈາກວິທະຍາກອນຊື່ດັງ ທັງປະສົບຜົນສໍາເລັດໃນຊີວິດຫລາກຫລາຍດ້ານທີ່ແຕກຕ່າງກັນ ເພື່ອແບ່ງປັນປະສົບການ, ເບື່ອງຫລັງຜົນສໍາເລັດ, ຖ່າຍທອດຄວາມຮູ້ໃຫ້ແກ່ຜູ້ເຂົ້າຮ່ວມງານ ແລະອື່ນໆ.

ທັງໝົດນີ້ ເພື່ອປະກອບສ່ວນຈັດຕັ້ງຜັນຂະຫຍາຍແຜນຍຸດ ທະສາດ ການພັດທະນາ ຊັບພະຍາກອນມະນຸດຂອງ ສປປ ລາວ ຮອດປີ 2025 ຕາມແນວທາງນະໂຍບາຍຂອງພັກ ແລະ ລັດ ໃຫ້ບັນລຸເປົ້າໝາຍຕາມຍຸດທະສາດ ການອະນຸລັກ ແລະ ສົ່ງເສີມວັດ ທະນະທໍາ ອັນດີງາມຂອງຊາດ ໃຫ້ທົ່ວປວງຊົນ ໃນວຽກງານສົ່ງ ເສີມການອ່ານໃຫ້ໄດ້ 2/3 ຂອງປະຊາກອນ ທັງໝົດພາຍໃນປີ 2025. ພ້ອມນີ້, ຍັງເປັນການສົ່ງເສີມ ຝວັດທະນະທຳການອ່ານໃຫ້ນັກອ່ານ, ນັກຂຽນເພີ່ມຂຶ້ນ, ທັງເພີ່ມຊ່ອງທາງ ໃນການເຂົ້າເຖິງປຶ້ມອ່ານ ໃຫ້ເປັນສັງຄົມແຫ່ງການຮຽນຮູ້ຕະຫລອດຊີວິດ ແລະ ປະເທດຊາດ ໄດ້ຮັບການພັດທະນາ ຢ່າງບໍ່ຢຸດຢັ້ງໃຫ້ເທົ່າ ທຽມກັບສາກົນ.

ນອກຈາກນີ້ ຍັງເປັນການສະເຫລີມສະຫລອງວັນກະວີໂລກ ວັນທີ 2 ມີນາຄົບ ຮອບ 28 ປີ, ວັນແມ່ຍິງສາກົນ ວັນທີ 8 ມີນາ ຄົບຮອບ 114 ປີ ແລະ ສ້າງຂະບວນການຕ້ອນຮັບວັນສ້າງຕັ້ງ ພັກປະຊາຊົນ ປະຕິວັດລາວ 22 ມີນາ ຄົບຮອບ 69 ປີທີ່ຈະມາເຖິງນີ້, ໃຫ້ເປັນຂະບວນການຟົດຟື້ນມ່ວນຊື່ນ ແລະ ມີຄວາມໝາຍສຳຄັນຂອງຊາດລາວເຮົາ.

ງານມະຫະກໍາໜັງສື ຈັດຂຶ້ນມາແລ້ວ 3 ຄັ້ງ ທີ່ມະຫາວິທະຍາ ໄລແຫ່ງຊາດ ຄື: ຄັ້ງທີ 1 ຈັດຂຶ້ນລະຫວ່າງວັນທີ 4-6 ມີນາ ປີ 2021, ຄັ້ງທີ 2 ຈັດຂຶ້ນລະຫວ່າງວັນທີ 10-12 ມີນາ 2022 ແລະ ຄັ້ງທີ 3 ຈັດຂຶ້ນລະຫວ່າງວັນທີ 8-12 ມີນາ 2023. ສ່ວນຄັ້ງທີ 4 ທີ່ຈະຈັດຂຶ້ນລະຫວ່າງ 27-31 ມີນາ 2024, ແຕ່ລະວັນແມ່ນເລີ່ມຕົ້ນແຕ່ເວລາ 9 ໂມງ00- 17 ໂມງ 00.

Cr: ບຸນຕຽງ ຈັນທະວົງ, ວສລ