ນັກທຸລະກິດລາວໃຊ້ງົບປະມານ 50 ລ້ານໂດລາສະຫະລັດ ເນລະມິດພື້ນທີ່ໃກ້ແຄມອ່າງເກັບນໍ້າ ຊົນລະປະທານໜອງເຊືອມ ເພື່ອສ້າງເປັນຫໍພິພິທະພັນວຽງຈັນ ສິລະປະລາວ ຮ່ວມສະໄໝ ເຊິ່ງຄາດວ່າສະຖານທີ່ດັ່ງກ່າວຈະກາຍແຫລ່ງທ່ອງທ່ຽວທີ່ໜ້າສົນໃຈທີ່ສຸດ ເນື່ອງຈາກວ່າເພິ່ນຈະນໍາເອົາຜະລິດຕະພັນໄມ້ຫາຍາກ, ພາບສິລະປະ ແລະ ວັດຖຸບູຮານເກົ່າແກ່ອື່ນໆຈໍານວນ 10.000 ລາຍການມາໂຮມໄວ້ນີ້.
ມາຮອດປັດຈຸບັນ, ການກໍ່ສ້າງພິພິທະພັນວຽງຈັນ ສິລະປະລາວ ຮ່ວມສະໄໝ ຕັ້ງຢູ່ບ້ານໂນນສະອາດ, ເມືອງໄຊທານີ, ນະຄອນຫລວງວຽງຈັນ ສໍາເລັດແລ້ວຫລາຍກວ່າ 80% ຄາດວ່າຈະສົມບູນ ແລະ ເປີດນໍາໃຊ້ຢ່າງເປັນທາງການພາຍ ໃນປີ 2024 ນີ້ ຊຶ່ງຈະກາຍເປັນໃບໜ້າໃໝ່ໃນການທ່ອງທ່ຽວທີ່ສໍາຄັນ ອີກແຫ່ງໜຶ່ງຂອງນະຄອນຫລວງວຽງຈັນ.
ທ່ານ ພິຊິດ ໄຊຍະສິດ ເຈົ້າຂອງພິພິທະພັນວຽງຈັນ ສິລະປະລາວ ຮ່ວມສະໄໝ ໃຫ້ສໍາພາດຕໍ່ສື່ມວນຊົນເມື່ອບໍ່ດົນມານີ້ວ່າ: ການກໍ່ສ້າງພິພິຕະພັນວຽງຈັນ ສິລະປະລາວ ຮ່ວມສະໄໝ ເລີ່ມຕົ້ນມາແຕ່ປີ 2021 ໂດຍນໍາໃຊ້ງົບປະມານ 50 ລ້ານກວ່າໂດລາສະຫະລັດ, ມີເນື້ອທີ່ 80 ເຮັກຕາ ເພື່ອສ້າງໃຫ້ເປັນແຫລ່ງທ່ອງທ່ຽວທາງສິລະປະວັດທະນະທຳ ຕິດພັນກັບທຳມະຊາດຢ່າງຄົບວົງຈອນ ປະກອບມີ: ອາຄານນໍາສະເໜີຂໍ້ມູນກ່ຽວກັບຫໍພິພິທະພັນ, ອາຄານຕ້ອນຮັບ, ອາຄານວາງສະແດງງານສິລະປະ-ວັດທະນະທໍາ ຕາມເທສະການຕ່າງໆ, ຫ້ອງໂຖງພັກຜ່ອນຊົມທິວທັດ, ອາຄານອະເນກປະສົງ, ອາຄານສະແດງງານສິລະປະໄມ້ແກະສະຫລັກ ແລະ ຮູບແຕ້ມ, ຮ້ານ ຂາຍເຄື່ອງທີ່ລະນຶກ, ໂຮງແຮມ, ຣີສອດ, ອາຄານວາງສະແດງສິນຄ້າ, ຮ້ານອາຫານ, ເຄື່ອງດື່ມ, ນໍ້າຕົກຈໍາລອງ ແລະ ອື່ນໆ.
ທ່ານໃຫ້ຮູ້ຕື່ມວ່າ: ການສ້າງຫໍພິພິທະພັນແຫ່ງນີ້ ເພື່ອຕ້ອນຮັບປີທ່ອງທ່ຽວລາວ ແລະ ການເປັນປະທານອາຊຽນຂອງລາວ ໃນປີ 2024 ແລະ ເປັນອີກສະຖານທີ່ທ່ອງທ່ຽວສໍາຄັນໜຶ່ງ ໃນການດຶງດູດນັກທ່ອງທ່ຽວທັງພາຍໃນ ແລະ ຕ່າງປະເທດ ເຂົ້າມາທ່ອງທ່ຽວ ນະຄອນຫລວງວຽງຈັນ ກໍຄື ປະເທດລາວ ນັບມື້ຫລາຍຂຶ້ນກວ່າເກົ່າ.
ໂດຍ: ເກີດຂວັນໃຈ ມາລີຈັນສີ
