ການກໍາເນີດ ແລະ ເຕີບໃຫຍ່ຂະຫຍາຍຕົວ
ຂອງວິທະຍຸກະຈາຍສຽງແຫ່ງຊາດລາວ (13/08/1960 –13/08/2015)
ໃນເງື່ອນໄຂ ທີ່ພາຫະນະສື່ມວນຊົນເອເລັກໂຕຼນິກອື່ນໆ ຍັງບໍ່ທັນປະກົດຕົວ ແລະ ບາງສື່ສິ່ງພິມກໍເກີດຂຶ້ນແລ້ວ, ແຕ່ຍັງບໍ່ສາມາດນໍາເອົາຂໍ້ມູນຂ່າວສານໄປເຖິງກຸ່ມເປົ້າໝາຍໃນທົ່ວທຸກແຫ່ງຂອງເຂດປົດປ່ອຍ ກໍຄືທົ່ວປະເທດໃນສະໄໝຕໍ່ສູ້ກູ້ຊາດ,ແຕ່ ຄວາມຮຽກຮ້ອງຕ້ອງການໃນການໂຄສະນາເຜີຍແຜ່ແນວທາງການເມືອງຂອງພັກໃນການຕໍ່ສູ້ປົດປ່ອຍຊາດ ພັດເລັ່ງທວງສູງ. ສະນັ້ນ, ມາໃນວັນທີ 13 ສິງຫາ 1960 ວິທະຍຸກະຈາຍສຽງຝ່າຍປະເທດລາວ ຈຶ່ງໄດ້ສ້າງຕັ້ງຂຶ້ນຢູ່ເມືອງວຽງໄຊ ແຂວງຫົວພັນ ຢູ່ເຂດປົດປ່ອຍພາກເໜືອຂອງລາວ. ນັບແຕ່ວັນທີ 13 ສິງຫາ 1960 ມາເຖິງວັນທີ 13 ສິງຫາ 2015 ນີ້, ວິທະຍຸກະຈາຍສຽງຂອງຝ່າຍປະເທດລາວໃນເມື່ອກ່ອນ ເຊິ່ງໃນປະຈຸບັນ ແມ່ນວິທະຍຸກະຈາຍສຽງແຫ່ງຊາດລາວ ໄດ້ມີອາຍຸຄົບຮອບ 55 ປີ ພໍດີ.
ໃນຂະບວນວິວັດແຫ່ງການຕໍ່ສູ້ກູ້ຊາດຕ້ານຈັກກະພັດ ແລະ ລູກມື ເພື່ອປົດປ່ອຍຊາດ ແລະ ຕະຫຼອດໄລຍະແຫ່ງການປະຕິບັດສອງໜ້າທີ່ຍຸດທະສາດແຫ່ງການປົກປັກຮັກສາປະເທດຊາດ ແລະ ກໍ່ສ້າງລະບອບປະ ຊາທິປະໄຕປະຊາຊົນນີ້ ວິທະຍຸກະຈາຍສຽງແຫ່ງຊາດລາວ ກໍໄດ້ຮັບການພັດທະນາ ແລະ ປັບປຸງຕົນເອງຢ່າງບໍ່ຢຸດຢັ້ງ ຈາກແຕ່ບ່ອນທີ່ອ່ອນນ້ອຍຫຼ້າຫຼັງທີ່ສຸດ ຄ່ອຍໆເຕີບໃຫຍ່ຂະຫຍາຍຕົວ ແລະ ທັນສະໄໝຂຶ້ນທຸກດ້ານເທື່ອລະກ້າວໃນແຕ່ລະໄລຍະຈົນເຖິງເທົ້າທຸກວັນນີ້. ເພື່ອໃຫ້ເຂົ້າໃຈງ່າຍໃນການຈັດລຽງປະຫວັດຄວາມເປັນມາຂອງວິທະຍຸກະຈາຍສຽງແຫ່ງຊາດລາວ, ພວກເຮົາໄດ້ຈັດແບ່ງອອກເປັນ 04 ໄລຍະ ດັ່ງນີ້ :
