ກໍາປູເຈຍ-ລາວ-ຫວຽດນາມ ຫາລືເຂດສາມຫລ່ຽມພັດທະນາ ຄັ້ງທີ 13

ກອງປະຊຸມສົ່ງເສີມການຄ້າ, ການລົງທຶນ ແລະ ທ່ອງທ່ຽວ ເຂດສາມຫລ່ຽມພັດທະນາຄັ້ງທີ 13 ຈັດຂຶ້ນໃນວັນທີ 27 ກຸມ ພາ 2024 ທີ່ແຂວງອັດຕະປື ໂດຍເປັນປະທານຂອງ ທ່ານ ສະຖາ ບັນດິດ ອິນສີຊຽງໃໝ່ ຮອງລັດຖະມົນຕີກະຊວງແຜນການ ແລະ ການລົງທຶນ, ມີຮອງເລຂາຄະນະກໍາມະການສົ່ງເສີມການລົງທຶນກໍາປູເຈຍ, ຮອງຫົວໜ້າໜ່ວຍງານລົງທືນຕ່າງປະເທດ ສສ ຫວຽດນາມ, ພ້ອມດ້ວຍນັກລົງທຶນ ທັງ 3 ປະເທດ ແລະ ພາກ ສ່ວນກ່ຽວຂ້ອງ ເຂົ້າຮ່ວມ.

ໂອກາດນີ້, ທ່ານ ສະຖາບັນດິດ ອິນສີຊຽງໃໝ່ ໄດ້ກ່າວວ່າ: ກອງປະຊຸມຄັ້ງນີ້, ມີຄວາມໝາຍສໍາຄັນຢ່າງຍິ່ງໃນການສົ່ງເສີມ ແລະ ປັບປຸງສະພາບແວດລ້ອມຂອງການດໍາເນີນທຸລະກິດ ແລະ ທ່ອງທ່ຽວໃນເຂດສາມຫລ່ຽມພັດທະນາຂອງ 3 ປະເທດ ກໍາປູ ເຈຍ-ລາວ-ຫວຽດນາມ. ສປປ ລາວ ຕີລາຄາສູງຕໍ່ຜົນສໍາເລັດ ໃນການຈັດຕັ້ງປະຕິບັດຂອບການຮ່ວມມືຂອງ 3 ປະເທດ ພົ້ນເດັ່ນແມ່ນການຜັນຂະ ຫຍາຍຜົນຂອງການປະຊຸມສຸດຍອດ ລັດຖະ ສະພາກໍາປູເຈຍ-ລາວ-ຫວຽດນາມຄັ້ງທີ 1 ທີ່ນະຄອນ ຫລວງວຽງຈັນ, ສປປ ລາວ ໃນວັນທີ 5-6 ທັນວາ 2023 ທີ່ຜ່ານມາ ຂອງລັດຖະບານ ແລະ ຂະແໜງ ການຂ່ຽວຂ້ອງຕ່າງໆຂອງ 3 ປະເທດໃນການຈັດຕັ້ງປະຕິບັດບັນດາສັນຍາ ແລະ ຂໍ້ຕົກລົງຕ່າງໆ ທີ່ໄດ້ຕົກລົງຮ່ວມກັນຕາມຂອບການຮ່ວມມື ໃນເຂດສາມຫລ່ຽມພັດທະນາ ແລະ ບັນລຸໄດ້ຜົນສໍາເລັດໃນຫລາຍດ້ານ ໂດຍ ສະເພາະພື້ນຖານໂຄງລ່າງການຄົມມະນາຄົມຂົນສົ່ງທາງບົກ ທີ່ມີການກໍ່ສ້າງຖະໜົນຫົນທາງເຊື່ອມຕໍ່ ລາວ-ກໍາປູເຈຍ-ຫວຽດນາມ, ການກໍ່ສ້າງເຂື່ອນໄຟຟ້ານໍ້າຕົກ, ການພັດທະນາດ້ານກະສີກໍາ ແລະ ວຽກງານພັດທະນາຊັບພະຍາກອນມະນຸດ ໃນເຂດສາມຫລ່ຽມພັດທະນາໄດ້ຮັບການປັບປຸງຍົກລະດັບ ຊຶ່ງເປັນການສົ່ງເສີມ ແລະ ອໍານວຍຄວາມສະດວກໃຫ້ແກ່ການຄ້າ, ການລົງທຶນ ແລະ ການທ່ອງທ່ຽວຢູ່ເຂດສາມຫລ່ຽມພັດທະນາ ເຮັດໃຫ້ຊີວິດການເປັນຢູ່ຂອງປະຊາຊົນນັບມື້ໄດ້ຮັບການແກ້ໄຂດີຂຶ້ນ.

ສໍາລັບ ສປປ ລາວ ສາມາດຍາດແຍ່ງການສົ່ງອອກ, ດຶງດູດການລົງທຶນ ແລະ ນັກທ່ອງທ່ຽວຈາກກໍາປູເຈຍ ແລະ ຫວຽດ ນາມ ຄື: ການສົ່ງອອກໄປກໍາປູເຈຍປີ 2021 ມີມູນຄ່າລວມ 131 ລ້ານໂດລາ ຊຶ່ງໄຟຟ້າ ເປັນຜະລິດຕະພັນຕົ້ນຕໍ່ກວມເອົາ 109 ລ້ານໂດລາສະຫະລັດ, ເທົ່າກັບ 83% ຂອງການສົ່ງອອກທັງໝົດ, ສ່ວນການສົ່ງອອກໄປຫວຽດນາມປີ 2021 ມີມູນຄ່າລວມ 1.240 ລ້ານໂດລາສະຫະລັດ, ຜະລິດຕະພັນຕົ້ນຕໍ່ແມ່ນ ນໍ້າດື່ມ, ຢາງພາລາ ແລະ ງົວ ກວມເອົາ 520 ລ້ານໂດລາສະຫະ ລັດ, ຄິດເປັນ 42% ຂອງການສົ່ງອອກທັງໝົດ; ການລົງທຶນຂອງກໍາປູ ເຈຍ ມູນຄ່າລວມຮອດປີ 2023 ແມ່ນ 118 ລ້ານໂດລາ ຈັດເປັນອັນດັບທີ 16. ສ່ວນການລົງທຶນຂອງຫວຽດນາມ ມີມູນຄ່າລວມຮອດປີ 2023 ແມ່ນ 4.200 ລ້ານໂດລາສະຫະລັດ ຈັດເປັນອັນດັບ 3 ການລົງທຶນຕ່າງປະເທດຢູ່ລາວ. ຂະນະທີ່ ການທ່ອງທ່ຽວປີ 2023 (9 ເດືອນຕົ້ນປີ) ສໍາລັບ ຈາກປະເທດອາ ຊຽນມີ 1,6 ລ້ານຄົນ ກວມເອົາ 66% ຂອງນັກທ່ອງທ່ຽວທັງ ໝົດ, ໃນນີ້ມີນັກທ່ອງທ່ຽວຈາກໄທ, ຫວຽດນາມ ແລະ ກໍາປູເຈຍ ແມ່ນກວມເອົາຈໍານວນຫລາຍ.

ກອງປະຊຸມ ວ່າດ້ວຍການສົ່ງເສີມການຄ້າ, ການລົງທຶນ ແລະ ການທ່ອງທ່ຽວ ເຂດ 3 ຫລ່ຽມພັດທະນາ ຄັ້ງທີ 13 ຖືເປັນກົນໄກໜຶ່ງໃນຂອບການຮ່ວມມື ກໍາປູເຈຍ-ລາວ-ຫວຽດນາມ ທີ່ຈັດຂຶ້ນເປັນປະຈໍາທຸກໆປີ ເຊິ່ງໃນຄັ້ງຜ່ານມາແມ່ນກໍາປູເຈຍ ເປັນເຈົ້າພາບຈັດຂຶ້ນຢູ່ ແຂວງກະແຈະ ໃນປີ 2019 ແລະ ໄດ້ປະສົບກັບບັນຫາການແພ່ລະບາດຂອງພະຍາດໂຄວິດ-19 ຈຶ່ງເຮັດໃຫ້ກອງປະຊຸມໄດ້ຖືກເລື່ອນອອກໄປ. ຮອດປີ 2024 ສປປ ລາວ ຈຶ່ງໄດ້ສືບຕໍ່ຈັດກອງປະຊຸມດັ່ງກ່າວຂຶ້ນ ເພື່ອສືບຕໍ່ສົ່ງເສີມດ້ານການຄ້າ, ການລົງທຶນ ແລະ ການທ່ອງທ່ຽວ ຂອງ 3 ປະເທດ.

ຂ່າວ: ກຕທ

ພາບ: ຂັນໄຊ