ພິທີວາງສີລາເລິກ ໂຄງການກໍ່ສ້າງ ສາງເກັບຂອງກາງພາສີ ທີ່ບ້ານນາເຕີຍ ເມືອງຫລວງນໍ້າທາ ແຂວງຫລວງນ້ຳທາ ຈັດຂຶ້ນໃນວັນທີ 25 ມິຖຸນາ 2024 ໂດຍມີ ທ່ານ ອ່ອນຈັນ ຄຳພາວົງ ຮອງເຈົ້າແຂວງຫລວງນ້ຳທາ, ທ່ານ ພູເຂົາຄຳ ວັນນະວົງໄຊ ຫົວໜ້າກົມພາສີ, ກະຊວງການເງິນ ແລະ ພາກສ່ວນກ່ຽວຂ້ອງເຂົ້າຮ່ວມ.
ທ່ານ ພູເຂົາຄຳ ວັນນະວົງໄຊ ໃຫ້ຮູ້ວ່າ: ໂຄງການກໍ່ສ້າງ ສາງເກັບຂອງກາງພາສີ ເປັນໜຶ່ງໃນໂຄງການກໍ່ສ້າງທີ່ສຳຄັນ ທີ່ໄດ້ຮັບການສະໜັບສະໜູນຈາກ ລັດຖະບານສະຫະລັດອາເມຣິກາ, ເຊິ່ງສາງເກັບຂອງກາງແຫ່ງນີ້ ເປັນການຢັ້ງຢືນເຖິງການພົວພັນຄູ່ຮ່ວມມືທີ່ຢືນຍົງ ລະຫວ່າງ ລາວ ແລະ ສະຫະລັດອາເມລິກາ ໃນການຕ້ານ ແລະ ສະກັດກັ້ນການເຄື່ອນຍ້າຍສິນຄ້າທີ່ຜິດກົດໝາຍ ພ້ອມທັງເປັນການເພີ່ມທະວີຄວາມໝັ້ນຄົງຕາມຊາຍແດນ ແລະ ປົກປັກຮັກສາຫລັກໝັ້ນຮ່ວມກັນຂອງສອງປະເທດ ເປັນການຮ່ວມມືໃນການບັງຄັບໃຊ້ກົດໝາຍ ແລະ ຄວາມປອດໄພຊາຍແດນ.
ການສ້າງຕັ້ງສະຖານທີ່ ທີ່ທັນສະໄໝນີ້ ແມ່ນເປັນທີ່ຂີດໝາຍສໍາຄັນ ໃນຄວາມພະຍາຍາມຢ່າງບໍ່ຢຸດຢັ້ງ ເພື່ອເພີ່ມຄວາມສາມາດ ດ້ານການບັງຄັບໃຊ້ກົດໝາຍພາສີ, ປັບປຸງປະສິດທິຜົນການປະຕິບັດງານ, ຕ້ານອາດຊະຍາກໍາຂ້າມຊາດ ດ້ວຍທີ່ຕັ້ງຍຸດທະສາດ ແລະ ບ່ອນເກັບມ້ຽນຂອງກາງທີ່ທັນສະໄໝ ທັງເປັນພື້ນຖານໃນຄວາມພະຍາຍາມຮ່ວມກັນ ເພື່ອຮັບປະກັນວ່າເຈົ້າໜ້າທີ່ພາສີ ມີຄວາມສາມາດໃນການເກັບຮັກສາຂອງກາງ ຕັ້ງແຕ່ຕອນຍຶດໄດ້ຈົນໄປຮອດຕອນດຳເນີນຄະດີຂັ້ນສຸດທ້າຍ. ພ້ອມກັນນີ້, ຍັງເປັນການຊ່ວຍການປ້ອງກັນ ແລະ ແກ້ໄຂການຄ້າຂາຍເຖື່ອນ, ການລັກລອບຂົນຢາເສບຕິດ, ສິນຄ້າລະເມີດຊັບສິນທາງປັນຍາ, ສັດນ້ຳ-ສັດປ່າ ຕາມສົນທິສັນຍາ, ອາວຸດເສິກ ແລະ ການເຄື່ອນໄຫວຜິດກົດໝາຍອື່ນໆ ທີ່ຂົ່ມຂູ່ຄວາມປອດໄພ ແລະ ຄວາມຜາສຸກຂອງປະເທດຊາດ.
ຂ່າວ: ມຸນຕີ
