ຂະບວນການປຸກລະດົມຊຸມຊົນເປັນເຈົ້າການເຮັດອະນາໄມທໍາລາຍແຫລ່ງເພາະພັນໜອນນໍ້າຍຸງລາຍ ເພື່ອປ້ອງກັນພະຍາດໄຂ້ຍຸງລາຍ ຫລື ໄຂ້ເລືອດອອກທົ່ວເມືອງນາຊາຍທອງ ນະຄອນຫລວງວຽງຈັນ ຈັດຂຶ້ນຕອນເຊົ້າ ວັນທີ 6 ສິງຫາ 2022 ທີ່ວັດບ້ານນາຄູນ ເມືອງນາຊາຍທອງ ນະຄອນຫລວງວຽງຈັນ, ໂດຍການເຂົ້າ ຮ່ວມຂອງ ດຣ ບຸນແຝງ ພູມມະໄລສິດ ລັດຖະມົນຕີກະຊວງສາທາລະນະສຸກ, ມີທ່ານ ບຸນໜາ ຜາທຸມມະວົງ ຫົວໜ້າຄະນະຈັດຕັ້ງ ນະຄອນຫລວງວຽງຈັນ, ທ່ານ ພູວອນ ພົມລາດແກ້ວ ຮອງເຈົ້າເມືອງໆ ນາຊາຍທອງ, ຂະແໜງການອ້ອມຂ້າງກະຊວງສາທາລະນະສຸກ, ການນໍາເມືອງນາຊາຍທອງ, ພ້ອມດ້ວຍປະຊາຊົນພາຍໃນບ້ານນາຄູນ.
ດຣ ບຸນແຝງ ພູມມະໄລສິດ ລັດຖະມົນຕີກະຊວງສາທາລະນະສຸກມີຄໍາເຫັນວ່າ: ປະຈຸບັນລາວກໍ່ຄື ບັນດາປະເທດອ້ອມຂ້າງກຳລັງສຸມໃສ່ຟື້ນຟູເສດຖະກິດ ແລະ ຊີວິດການເປັນຢູ່ພາຍຫລັງການເກີດ ລະບາດຂອງພະຍາດ Covid-19 ຄ່ຽງຄູ່ກັນນັ້ນ ພະຍາດຕິດຕໍ່ທີ່ເກີດຂື້ນຕາມລະດູການ ໂດຍສະເພາະ ພະຍາດໄຂ້ຍຸງລາຍເປັນສີ່ງທີ່ກະຊວງສາທາລະນະສຸກໄດ້ຮຽກຮ້ອງໃຫ້ມີການປະກອບສ່ວນ ແລະ ການມີສ່ວນຮ່ວມ ໃນການປ້ອງກັນທົ່ວສັງຄົມຢ່າງຈີງຈັງ; ວຽກດັ່ງກ່າວນີ້ ເມື່ອຟັງແລ້ວ ຄືຊິເຮັດບໍ່ຍາກ ແຕ່ການຈັດຕັ້ງປະຕິບັດຕົວຈິງແລ້ວ ແມ່ນວຽກງານໜຶ່ງທີ່ພົບຄວາມຫຍູ້ງຍາກພໍສົມຄວນ, ເວົ້າສະ ເພາະແມ່ນຊາວນະຄອນຫຼວງວຽງຈັນຂອງພວກເຮົາ ທີ່ມີປະ ຊາກອນອາໃສຢູ່ຢ່າງໜາແໜ້ນ, ຫຼາຍຄົນຍັງບໍ່ທັນເຂົ້າໃຈ ເຖິງຄວາມອັນລະລາຍ ແລະ ຮ້າຍແຮງ ຂອງການເຈັບເປັນຍ້ອນພະຍາດ ທີ່ເກີດຈາກຍຸງລາຍກັດ-ຕອດ ໂດຍສະເພາະ ການໃຫ້ຄວາມຮ່ວມມື ແລະ ເປັນເຈົ້າການຕ້ານພະຍາດໄຂ້ເລືອດອອກ ແລະ ສັງຄົມຍັງເຂົ້າໃຈວ່າວຽກງານດັ່ງກ່າວເປັນວຽກງານຂອງຂະແໜງການສາທາລະນະສຸກພຽງຝ່າຍດຽວ. ໃນຄວາມເປັນຈິງແລ້ວ ວຽກງານການປ້ອງກັນ ແລະ ຕ້ານພະຍາດໄຂ້ເລືອດອອກ ແມ່ນໜ້າທີຂອງໝົດທຸກຄົນ ໃນສັງຄົມທີ່ຕ້ອງໄດ້ມີສ່ວນຮ່ວມ ປະກອບສ່ວນ ແລະ ເອົາໃຈໃສ່ແທ້ຈິງ
ຈາກນັ້ນ ທ່ານ ພູວອນ ພົມລາດແກ້ວ ຮອງເຈົ້າເມືອງໆນາຊາຍທອງ ກ່າວເຖິງສະພາບພະຍາດໄຂ້ເລືອດອອກໃນໄລຍະຜ່ານມາຢູ່ເມືອງນາຊາຍທອງວ່າ: ເລີ່ມແຕ່ເດືອນມີນາເປັນຕົ້ນມາ, ຫ້ອງການ ສາທາລະນະສຸກເມືອງໄດ້ເປີດກອງປະຊຸມປຶກສາຫາລືວາງແຜນການຄວບຄຸມພະຍາດໄຂ້ເລືອດອອກ ຫລື ໄຂ້ຍຸງລາຍຮ່ວມກັບອໍານາດການປົກຄອງບ້ານ ແລະ ບັນດາຫົວໜ້າ ອສບ ກຸ່ມ, ເພື່ອວາງແຜນຈັດຕັ້ງປະຕິບັດ ແລະ ໄດ້ແຕ່ງຕັ້ງພະນັກງານລົງກວດໜອນນໍ້າຍຸງລາຍຢ່າງເປັນຂະບວນໃນແຕ່ລະບ້ານ, ຄອຄອບຄົວ ໃນ 6 ກຸ່ມບ້ານ, ມີ 54 ບ້ານ.
ເລີ່ມແຕ່ຕົ້ນປີ 2022 ຈົນເຖິງປັດຈຸບັນ, ເມືອງນາງຊາຍທອງມີກໍລະນີຕິດເຊື້ອທັງໝົດ 457 ຄົນ, ກວມເອົາ 51 ບ້ານໃນຈໍານວນ 54 ບ້ານທົ່ວເມືອງ ແຕ່ຍັງບໍ່ມີກໍລະນີເສຍຊີວິດ; ບ້ານທີ່ມີຕົວເລກຜູ້ເປັນໄຂ້ເລືອດອອກຫລາຍກວ່າໝູ່ແມ່ນ ບ້ານຫາດ ສ້ຽວ, ສີເກີດ, ໂພນສະຫວັນ, ນາຄູນ, ດົງຊຽງດີ, ປັກແຮດ, ດົງບອງ, ນາຊາຍໃຕ້, ຫ້ວຍນໍ້າເຢັນ, ໂພນຄໍາ ແລະ ບ້ານອື່ນໆ.
ສ່ວນເມືອງຫາດຊາຍຟອງ ຈັດຂື້ນ ທີ່ສະໂມສອນໃຫຍ່ວິທະຍາໄລຄູດົງຄໍາຊ້າງ ເມືອງຫາດຊາຍຟອງ ນະຄອນຫຼວງວຽງຈັນ. ໂດຍການເປັນປະທານຂອງທ່ານ ພູຂົງ ບັນນາວົງ ຮອງເຈົ້າຄອງນະຄອນຫຼວງວຽງຈັນ, ທ່ານ ຖາວອນ ສີຫາມາຍາ ຮອງເຈົ້າເມືອງຫາດຊາຍຟອງ, ດຣ ນາງ ລັດສະໝີ ວົງຄໍາຊາວ ຮອງຫົວໜ້າກົມຄວບຄຸມພະຍາດຕິດຕໍ່ ກະຊວງສາທາລະນະສຸກ, ມີຜູ້ຕາງໜ້າຈາກອົງການປົກຄອງເມືອງ, ກະຊວງສາທາ ລະນະສຸກ, ອົງການປົກຄອງບ້ານ 14 ບ້ານ, ຄູ-ອາຈານ, ນັກສຶກສາຈາກວິທະຍາໄລຄູດົງຄໍາຊ້າງພ້ອມດ້ວຍປະຊາຊົນພາຍໃນ 14 ບ້ານເຂົ້າຮ່ວມເປັນຈໍານວນຫຼາຍ.
ໂດຍ: ບຸນຍັງ ພຸດສະຫວັດ
ບັນລັງທອງ ກຽງຄໍາຊົນນີ