ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ຂະບວນແຫ່ຮູບຫລໍ່ ສົມເດັດພຣະໄຊຍະເຊດຖາທິຣາດ ຈະເລີ່ມເຄື່ອນຈາກວຽງຈັນ ວັນທີ 27 -31 ກໍລະກົດ ຈຶ່ງຈະເຖິງ ແຂວງອັດຕະປື.

ພິທີສະເຫຼີມສະຫຼອງພຣະບໍຣົມມະຮູບເໝືອນ ສົມເດັດພຣະໄຊຍະເຊດຖາທິຣາດເຈົ້າ ພຣະວີຣະມະຫາຣາດຊົງຊ້າງ ທີ່ຫຼໍ່ດ້ວຍທອງເຫຼືອງ ຈະຈັດຂື້ນຢ່າງເປັນທາງການລະຫວ່າງວັນທີ 21 ຫາ 26 ກໍລະກົດ 2020 ນີ້ ທີ່ຫໍທຳມະສະພາ ວັດພະທາດຫລວງເໜືອ ນະຄອນຫລວງວຽງຈັນ ພາຍຫລັງໄດ້ຮັບການຫຼໍ່ສໍາເລັດຮຽບຮ້ອຍແລ້ວ ກ່ອນຈະອັນເຊີນໄປປະດິດສະຖານໄວ້ເທິງພຣະແທ່ນອະນຸສາວະລີພຣະເຈົ້າໄຊເຊດຖາ ແລະ ຫໍພິພິດທະພັນພຣະເຈົ້າໄຊເຊດຖາ ທີ່ບ້ານຫາດຊາຍຂາວ ເມືອງໄຊເຊດຖາ ແຂວງອັດຕະປື.

ພຣະອາຈານ ຍອດຄໍາ ພັດທະຣະເກສີ  ຫົວໜ້າຫ້ອງການບໍລິຫານງານ ທັງເປັນຫົວໜ້າກຳມາທິການ ການຕ່າງປະເທດສູນກາງອົງການພຸດທະສາສະໜາສຳພັນລາວ ໃຫ້ສຳ ພາດວ່າ: ກ່ອນຈະເຄື່ອນຍ້າຍອັນເຊີນພຣະບໍຣົມມະຮູບຊົງຊ້າງຂອງສົມເດັດ ພຣະໄຊຍະເຊດຖາທິຣາດເຈົ້າ ພຣະວີຣະມະຫາຣາດໄປປະດິດສະຖານໄວ້ເທິງພຣະແທ່ນອະນຸສາວະລີພຣະເຈົ້າໄຊເຊດຖາທິຣາດ ຢູ່ແຂວງອັດຕະປືນັ້ນ ຈະເປີດໂອກາດໃຫ້ພຸດທະສາສະນິກະຊົນລາວທີ່ມີຈິດໃຈເຫຼື້ອມໃສສັດທາ ແລະມີຄວາມກະຕັນຍູຕໍ່ບັນພະບູລຸດ ທີ່ມີຄຸນງາມຄວາມດີຕໍ່ຊາດບ້ານເມືອງມາຮ່ວມໂມທະນາບຸນກຸສົນໃນຄັ້ງນີ້ ໂດຍຈະມີການຄົບງັນ ສູດປະຣິຕະມຸງຄຸນ, ຟັງທຳມະເທດສະໜາ ແລະໃສ່ບາດຖວາຍສັງຄະທານ, ຈາກນັ້ນ ວັນທີ 27 ກໍລະກົດ ຂະບວນແຫ່ຄັ້ງຍິ່ງໃຫ່ຍ ຈະເຄື່ອນຍ້າຍ ໄປຄົບງັນຢູ່ແຂວງບໍລິຄໍາໄຊ, ຄໍາມ່ວນ, ສະຫວັນນະເຂດ ແລະແຂວງຈໍາປາສັກ ບ່ອນລະ 1ຄືນ ໃນນີ້ຈະແວ່ຜ່ານ ເມືອງຄົງເຊໂດນ ແຂວງສາລະວັນ ແລະແຂວງເຊກອງໄລຍະໜຶ່ງ.

ໂຄງການກໍ່ສ້າງອະນຸສາວະລີ ສົມເດັດພຣະໄຊຍະເຊດຖາທັມມິກະຣາດເຈົ້າສ້າງຂຶ້ນ ເພື່ອຈາລຶກຄຸນງາມຄວາມດີເຊີດຊູກຽດສັກສີຂອງວີຣະມະຫາ ກະສັດຕາທິຣາດເຈົ້າ ອານາຈັກລາວລ້ານຊ້າງ ຜູ້ຊົງສະຫຼຽວສະຫຼາດ ອົງອາດກ້າຫານ ຊົງມີພຣະປີຊາສາມາດ ສະຫຼາດໃນການພິໄຊສົງຄາມ ຊົງເປັນພຸດທະສາສະນິກະຊົນອັນເລີດ ຊົງເປັນ ພຣະມະຫາຣາດເຈົ້າຜູ້ຊົງທັມ ຊົງເປັນແບບຢ່າງອັນດີງາມ ໃນການສ້າງສາພັດທະນາບ້ານເມືອງ ສີລະປະວັດທະນະທັມ ຮີດຄອງປະເພນີຂອງຊາດ ເປັນພຣະມະຫາກະ ສັດຕາທິຣາດເຈົ້າ ສະເໝີດັ່ງແວ່ນແຍງອັນໃສແຈ້ງແກ່ອານາປະຊາຣາດ ຕັ້ງແຕ່ບັນພະການສືບມາ ຈົນເຖິງລູກຫຼານ ໄດ້ສືບທອດກັນມາຫຼາຍເຊັ່ນຄົນ ຈວບຈົນທຸກວັນນີ້ ແລະ ຊົ່ວກາລະນານ.
ໂຄງການນີ້ ແມ່ນອົງການປົກຄອງແຂວງອັດຕະປື ເຊິ່ງມີຄອບຄົວທ່ານຈູມມາລີ ໄຊຍະສອນ ອະດີດປະທານປະເທດ ເປັນປະທານທີ່ປຶກສາ ກິຕິມະສັກເປັນຜູ້ຊີ້ນໍາ – ນໍາພາ ໃນການກໍ່ສ້າງ, ບໍລິສັດວັງຕັດຂຸດຄົ້ນບໍ່ແຮ່ຈໍາກັດ ເປັນຜູ້ຮັບຜິດຊອບວຽກງານອອກແບບ, ເທທອງຫຼໍ່ ແລະ ການກໍ່ສ້າງທັງໝົດ. ຮູບຫຼໍ່ເໝືອນ ສົມເດັດພຣະໄຊຍະເຊດຖາທິຣາດມະຫາຣາດເຈົ້າ ຊົງປະທັບຊ້າງປະທານພອນ ໄດ້ຮັບການຫຼໍ່ດ້ວຍທອງເຫຼືອງ ເນື້ອບໍຣິສຸດ ນໍ້າໜັກລວມ 18 ໂຕນ, ມູນຄ່າປະມານ 39 ຕື້ກີບ ສ່ວນທຶນຮອນໃນການກໍ່ສ້າງໄດ້ມາຈາກການປະກອບສ່ວນສົມທົບທຶນຂອງທົ່ວປວງຊົນເຊື້ອຊາດລາວ ທັງພາຍໃນ ແລະ ຕ່າງປະ ເທດ ແລະ ການອຸປະຖໍາຫຼັກຂອງໂຄງການບໍ່ຄໍາວັງຕັດ ເມືອງຊານໄຊ ແຂວງອັດຕະປື.