ຂປລ.ຂະບວນແຫ່ຮູບຫລໍ່ທອງເຫລືອງ ພຣະເຈົ້າໄຊຍະເຊດຖາທິຣາດ ພ້ອມດ້ວຍຊ້າງ ແລະ ພຣະພຸດທະຮູບ ໄດ້ເຄື່ອນຍ້າຍອອກຈາກ ເມືອງທ່າແຂກ ແຂວງຄຳມ່ວນ ໃນຕອນເຊົ້າຂອງວັນທີ 29 ກໍລະກົດ 2020 ແລະ ເດີນທາງເຖິງ ເມືອງໄກສອນ ພົມວິຫານ ແຂວງສະຫວັນນະເຂດ ໃນຕອນແລງຂອງວັນດຽວກັນ ນຳພາໂດຍທ່ານ ບົວເງິນ ຊາພູວົງ ຮອງລັດຖະມົນຕີ ກະຊວງຖະແຫລງຂ່າວ ວັດທະນະ ທຳ ແລະ ທ່ອງທ່ຽວ ຊຶ່ງຖືກຕ້ອນຮັບຢ່າງສົມກຽດ ຈາກທ່ານ ສັນຕິພາບ ພົມວິຫານ ເຈົ້າແຂວງສະຫວັນນະເຂດ, ພ້ອມຄະນະນຳແຂວງ ແລະ ມວນຊົນ ຊາວແຂວງສະຫວັນນະເຂດ ເຂົ້າຮ່ວມຈຳນວນຫລວງຫລາຍ.
ຂະບວນຮູບຫລໍ່ທອງເຫລືອງ ພຣະເຈົ້າໄຊຍະເຊດຖາທິຜຣາດ ໄດ້ພັກຄ້າງຄືນທີ່ສະໂມສອນເມືອງໄກສອນ ຫ້ອງວ່າການ ແຂວງສະຫວັນນະເຂດ ຊຶ່ງເປີດໂອກາດໃຫ້ ການນຳ ພັກ-ລັດ ຊາວພຸດທະສາສະນິກະຊົນ ຊາວແຂວງສະຫວັນນະເຂດ ເຂົ້າກາບໄຫວ້, ວາງທູບທຽນ ດອກໄມ້ ແລະ ໂມທະນາທານ ຕາມສັດທາ. ສ່ວນຕອນຄ່ຳ ໄດ້ມີພິທີທາງສາສະຫນາ ສູດປະຣິຕະມຸງຄຸນ ເທດສະຫນາເສີມບຸນປະຣາມີ ຈາກພຣະສົງ ຕາມເວລາອັນຄວນ.
ສ່ວນໃນຕອນເຊົ້າ ຂອງວັນ ທີ 30 ກໍລະກົດ 2020, ຈະມີພິທາງສາສະຫນາແລ້ວ ການນຳ ພັກ-ລັດ ອອກຕົນຍາດໂຍມ ຈະຮ່ວມໃສ່ບາດ ຖວາຍສັງຄະທານ ແກ່ພະ-ສົງ 39 ອົງ ເພື່ອອຸທິດແດ່ ພຣະເຈົ້າໄຊຍະເຊດຖາທິຣາດ ມະຫາຣາດ ສຳເລັດແລ້ວ ສືບຕໍ່ເຄື່ອນຂະບວນໄປຍັງ ແຂວງຈຳປາສັກ.
ໂດຍ: ບຸນກອງ ຣາດຊະວົງ

Loading...