ໃນໂອກາດທີ່ກອງປະຊຸມໃຫຍ່ ຜູ້ແທນທົ່ວປະເທດ ຄັ້ງທີ XI ຂອງພັກ ປະຊາ ຊົນ ປະຕິວັດລາວ ທີ່ຈະໄຂຂຶ້ນໃນມໍ່ໆ ນີ້ ແລະ ເພື່ອຕ້ອນຮັບວັນສ້າງຕັ້ງກອງທັບ ປະຊາຊົນລາວ ວັນທີ 20 ມັງກອນ ຄົບຮອບ 72 ປີ. ໃນວັນທີ 8 ມັງກອນ 2021 ທີ່ກະຊວງພະລັງງານ ແລະ ບໍ່ແຮ່ ທ່ານ ດາວວົງ ພອນແກ້ວ ກໍາມະການຄະນະພັກກະຊວງຮອງລັດຖະມົນຕີກະຊວງພະລັງງານ ແລະ ບໍ່ແຮ່ ໄດ້ໃຫ້ສໍາພາດຕໍ່ສື່ມວນຊົນກ່ຽວກັບຜົນສໍາເລັດໃນການຈັດຕັ້ງປະຕິບັດວຽກງານຂອງຂະແຫນງການພະລັງງານ ແລະ ບໍ່ແຮ່ ໃນໄລຍະປີ 2020 ແລະ ແຜນພັດທະນາເສດຖະກິດ 5 ປີ ຄັ້ງທີ 8 ຂອງລັດຖະບານ ຊຶ່ງເຫັນວ່າໄດ້ຮັບຜົນສໍາເລັດຫລາຍດ້ານ ໃນນີ້ ສະເພາະວຽກພັກ ແລະ ອົງການຈັດ ຕັ້ງມະຫາຊົນ, ພາຍໃນຄະນະປະຈໍາພັກ, ຄະນະພັກ, ຄະນະນໍາກະຊວງ ໄດ້ແບ່ງງານ ແລະ ມອບຫມາຍຄວາມຮັບຜິດຊອບທີ່ມີລັກສະນະຈະແຈ້ງ, ຂາດຕົວ, ປຶກສາຫາລື ແລະ ຕົກລົງບັນຫາທີ່ສໍາຄັນເປັນຫມູ່ຄະນະຢູ່ສະເຫມີ, ພ້ອມນີ້ ໄດ້ເອົາໃຈໃສ່ປະຕິບັດລະບອບການຫັນພະນັກງານລົງຮາກຖານ ເພື່ອຊຸກຍູ້, ກວດກາປະເມີນຜົນ ແລະ ຖອດຖອນບົດຮຽນຮ່ວມກັນ. ໃນ 1 ປີ ຜ່ານມາ ມີ 45 ຫນ່ວຍພັກໃນຈຳນວນທັງຫມົດ 47 ຫນ່ວຍພັກຖືກຄັດເລືອກເປັນຫນ່ວຍພັກປອດໃສ, ເຂັ້ມແຂງ ແລະ ຫນັກແຫນ້ນ. ສ່ວນວຽກງານບໍາລຸງທິດສະດີ ໃນໄລຍະ 5 ປີ ຜ່ານມາ ໄດ້ເປີດຊຸດບໍາລຸງທິດສະດີການເມືອງ-ການປົກຄອງ 45 ວັນ ຈໍານວນ 10 ຊຸດ ແລະ ຂະຫຍາຍສະມາຊິກພັກໃຫມ່ໄດ້ຈໍານວນ 347 ຄົນ, ຍິງ 124 ຄົນ.
ສໍາລັບຜົນສໍາເລັດໃນການຊີ້ນໍາ-ນໍາພາຈັດຕັ້ງປະຕິບັດວຽກງານວິຊາສະເພາະ ທ່ານ ດາວວົງ ພອນແກ້ວ ໃຫ້ຮູ້ວ່າ: ລວມຍອດມູນຄ່າການຜະລິດຂະແຫນງພະລັງ ງານ ແລະ ບໍ່ແຮ່ ສະເພະໃນປີ 2020 ຜ່ານມາ ປະຕິບັດໄດ້ 31.468 ຕື້ກີບ, ທຽບໃສ່ໄລຍະດຽວກັນຂອງປີ 2019 ເພີ່ມຂຶ້ນ 16%, ທຽບໃສ່ແຜນການປີ ປະຕິບັດໄດ້ 102%, ໃນນີ້ ຂະແຫນງພະລັງງານ ປະຕິບັດໄດ້ 20.616 ຕື້ກີບ, ທຽບໃສ່ໄລຍະດຽວກັນຂອງປີ 2019 ເພີ່ມຂຶ້ນ 33% ທຽບໃສ່ແຜນການປະຕິບັດໄດ້ 98% ແລະ ຂະແຫນງບໍ່ແຮ່ ປະຕິບັດໄດ້ 10.851 ຕື້ກີບ, ທຽບໃສ່ໄລຍະດຽວກັນຂອງປີ 2019 ຫລຸດລົງ 7% , ທຽບໃສ່ແຜນການປະປະຕິບັດໄ 113%. ສະເພາະປີ 2020 ຜ່ານມາ ໄດ້ສໍາເລັດການກໍ່ສ້າງແຫລ່ງຜະລິດໄຟຟ້າ ຈໍານວນ 4 ແຫ່ງ ລວມກໍາລັງຕິດຕັ້ງ 537 MW ຜະລິດກະແສໄຟຟ້າໄດ້ 2.139 ລ້ານkWh/ປີ ເຮັດໃຫ້ມາຮອດປັດຈຸບັນ ທົ່ວປະເທດມີແຫລ່ງຜະລິດກະແສໄຟຟ້າທັງຫມົດ 81 ແຫ່ງ ລວມກໍາລັງຕິດຕັ້ງ 10.328 MW, ສາມາດຜະລິດພະລັງງານໄຟຟ້າໄດ້ 53.640 ລ້ານkWh/ປີ. ອັດຕາການເຂົ້າເຖີງໄຟຟ້າ ແມ່ນບັນລຸ 100% ຂອງເທດສະບານແຂວງ, ນະຄອນຫລວງ, ເທດສະບານເມືອງ ແລະ ນະຄອນ, 93% ຂອງຈໍານວນບ້ານ ແລະ 95% ຊອງຈໍານວນຄອບຄົວທົ່ວປະເທດ.
ສ່ວນການພັດທະນາດ້ານທໍລະນີສາດແຮ່ທາດ ແລະ ບໍ່ແຮ່: ປັດຈຸບັນ ມີບໍລິສັດທີ່ໄດ້ຮັບອະນຸຍາດຊອກຄົ້ນ, ສໍາຫລວດ ແລະ ຂຸດຄົ້ນແຮ່ທາດ 212 ບໍລິສັດ ມີ 316 ກິດ ຈະການ, ໃນນັ້ນ ດ້ານທໍລະນີສາດແຮ່ທາດ ມີ 91 ບໍລິ ສັດ 113 ກິດຈະການ ແລະ ດ້ານບໍ່ແຮ່ ມີ 121 ບໍລິສັດ 203 ກິດຈະການ.
ພິເສດ ກະຊວງພະລັງງານ ແລະ ບໍ່ແຮ່ ໄດ້ເອົາໃຈໃສ່ກ່ຽວກັບຄວາມປອດໄພຂອງເຂື່ອນໄຟຟ້າ ໂດຍໄດ້ຕິດຕາມ, ກວດກາຢ່າງເປັນປົກກະຕິ ແລະ ໄດ້ສ້າງຕັ້ງສະມາຄົມເຂື່ອນລາວ ຊຶ່ງໄດ້ຖືກຮັບ ຮອງເຂົ້າເປັນສະມາຊິກສະມາຄົມເຂື່ອນໃຫຍ່ສາກົນ (ICOLD) ຢ່າງເປັນທາງການໃນວັນທີ 30 ພະຈິກ 2020 ເຊີ່ງເປັນປະເທດສະມາຊິກອັນດັບທີ 104.
ຮອງລັດຖະມົນຕີກະຊວງພະລັງງານ ແລະ ບໍ່ແຮ່ ໃຫ້ຮູ້ຕື່ມວ່າ: ສໍາລັບໃນປີ 2021 ນີ້ ກະຊວງພະລັງງານ ແລະ ບໍ່ແຮ່ ໄດ້ວາງແຜນການສູ້ຊົນດ້ານພະລັງງານ ໂດຍຈະສູ້ຊົນຜະລິດກະແສໄຟຟ້າໃຫ້ບັນລຸປະມານ 41.916 ລ້ານkWh, ມູນຄ່າ 21.640 ຕື້ກີບ, ຈໍາຫນ່າຍກະແສໄຟຟ້າພາຍໃນປະເທດ ໃຫ້ໄດ້ 9.021 ລ້ານkWh ມູນຄ່າ 7.547 ຕື້ກີບ ( ທຽບເທົ່າ 762 ລ້ານໂດລາສະຫະລັດ), ຈະຈໍາໜ່າຍກະແສໄຟຟ້າໄປຕ່າງປະເທດ 33.400 ລ້ານkWh ມູນຄ່າ 19.925 ຕື້ກີບ (ທຽບເທົ່າ 2.012 ລ້ານໂດລາສະຫະລັດ). ສໍາລັບດ້ານທໍລະນີສາດ-ແຮ່ທາດ ແລະ ບໍ່ແຮ່ ຈະເຮັດໃຫ້ການຜະລິດບັນດາແຮ່ທາດໃຫ້ບັນລຸ 13.812 ຕື້ກີບ ທຽບໃສ່ປີ 2020 ເພີ່ມຂຶ້ນ 27,28%, ມູນຄ່າຈໍາໜ່າຍພາຍໃນປະມານ 3.098 ຕື້ກີບ (ທຽບເທົ່າ 32 ລ້ານໂດລາສະຫະລັດ) ແລະ ມູນຄ່າສົ່ງອອກຕ່າງປະເທດໃຫ້ໄດ້ປະມານ 13.543 ຕື້ກີບ (ທຽບເທົ່າ 1.367 ລ້ານໂດລາສະຫະລັດ).
ຂ່າວ: ບຸນຕຽງ ຈັນທະວົງ
ພາບ: ຄໍາກອງ ກິດຕິຄຸນ
Loading...