ໃນໄລຍະ 6 ເດືອນຕົ້ນປີ ລວມຍອດຜະລິດຕະພັນພາຍໃນ (ຈີດີພີ) ຂອງແຂວງອັດຕະປື ຂະຫຍາຍຕົວສະເລ່ຍໃນລະດັບ 5,23% (ມະຕິສະພາ 6,92%), ເປັນມູນຄ່າຕາມລາຄາໃນປີ 5.522 ຕື້ກີບ ເທົ່າກັບ 83% ຂອງແຜນການ (ມະຕິສະພາ 6.615 ຕື້ກີບ), ລວມຍອດຜະລິດຕະພັນພາຍໃນສະເລ່ຍຕໍ່ຫົວຄົນ 33,17 ລ້ານກີບ ຫລື 1.504 ໂດລາສະຫະລັດ ໃນນີ້, ຂະແໜງກະສິກຳ-ປ່າໄມ້ ຂະຫຍາຍຕົວ 6,82% ກວມເອົາ 51,07% ຂອງ ຈີດີພີ (ມະຕິສະພາ ຂະຫຍາຍຕົວ 8,49% ກວມເອົາ 48,43% ຂອງ ຈີດີພີ), ຂະແໜງອຸດສາຫະກຳຂະຫຍາຍຕົວ 3,23% ກວມເອົາ 25,18% ຂອງ ຈີດີພີ (ມະຕິສະພາ ຂະຫຍາຍຕົວ 4,27% ກວມເອົາ 23,27% ຂອງ ຈີດີພີ) ແລະ ຂະແໜງບໍລິການ ຂະຫຍາຍຕົວ 2,41% ກວມເອົາ 23,74% ຂອງ ຈີດີພີ (ມະຕິສະພາ ຂະຫຍາຍຕົວ 5,05% ກວມເອົາ 28,29% ຂອງ ຈີດີພີ).
ທ່ານ ສູນນະຄອນ ແກ້ວວຽງຄໍາ ຫົວໜ້າພະແນກແຜນການ ແລະ ການລົງທຶນແຂວງ ອັດຕະປື ໄດ້ລາຍງານຕໍ່ກອງປະຊຸມ ອົງການປົກຄອງແຂວງອັດຕະປື ໃນວັນທີ 2 ກໍລະກົດ 2024 ວ່າ: ການຈັດຕັ້ງປະຕິບັດແຜນພັດທະນາ ເສດຖະກິດ-ສັງຄົມ 6 ເດືອນຕົ້ນປີ 2024 ຂອງແຂວງ ອັດຕະປື ແມ່ນດໍາເນີນຢູ່ໃນເງື່ອນໄຂສະພາບການຂອງໂລກ ແລະ ພາກພື້ນ ຍັງສືບຕໍ່ຜັນແປຢ່າງສັບສົນ ແລະ ມີຄວາມທ້າທາຍຫລາຍດ້ານ ເປັນຕົ້ນ ເສດຖະກິດ ໂລກຍັງສືບຕໍ່ຖົດຖອຍ, ອັດຕາເງິນເຟີ້ເພີ່ມສູງຂຶ້ນ, ຄວາມຂັດແຍ່ງທາງດ້ານການເມືອງຢູ່ບາງຂົງເຂດ, ໄພພິບັດທາງທໍາມະຊາດທີ່ເກີດຂຶ້ນ, ເຊິ່ງສົ່ງຜົນກະທົບຕໍ່ການພັດທະນາ ເສດຖະກິດ-ສັງຄົມຂອງແຂວງ, ຄຽງຄູ່ກັບສິ່ງທ້າທາຍດັ່ງກ່າວ ກໍຍັງມີໂອກາດຫລາຍດ້ານ ເປັນຕົ້ນ ການເປີດປີທ່ອງ ທ່ຽວລາວ ໃນປີ 2024, ການສືບຕໍ່ປະຕິບັດ 2 ວາລະແຫ່ງຊາດ ແລະ ວຽກງານເຄັ່ງຮ້ອນ ເຊິ່ງກາຍເປັນປັດໄຈທີ່ສໍາຄັນ ແກ່ການພັດທະນາເສດຖະກິດ-ສັງຄົມ ໃນປີ 2024 ຂອງແຂວງ ອັດຕະປື ມີການຂະຫຍາຍຕົວ.
ປັດໄຈຕົ້ນຕໍທີ່ຍູ້ແຮງເຮັດໃຫ້ຕົວເລກ ຈີດີພີ ຂອງແຂວງອັດຕະປື ເພີ່ມຂຶ້ນ ເນື່ອງຈາກຂະແໜງກະສິກຳ ແລະ ຂະແໜງອຸດສາຫະກຳປຸງແຕ່ງ ເປັນຕົ້ນ ຈາກການຜະລິດພືດ ແລະ ສັດ ເພື່ອທົດແທນການນໍາເຂົ້າ ແລະ ສົ່ງອອກເພີ່ມຂຶ້ນ ໂດຍສະເພາະ ພືດອຸດສາຫະກຳ (ມັນຕົ້ນ, ກ້ວຍ, ອ້ອຍ ແລະ ໝາກໄມ້ອື່ນໆ). ນອກຈາກນີ້, ຂະແໜງການຄ້າ (ຂາຍຍົກ-ຂາຍຍ່ອຍ), ຂະແໜງຄົມມະນາຄົມຂົນສົ່ງ ແລະ ຂະແໜງໂຮງແຮມ-ຮ້ານອາຫານ ກໍມີການຂະຫຍາຍຕົວດີເຊັ່ນດຽວກັນ.
ຂ່າວ: ພອນປະເສີດ
