ວັນທີ 25 ກັນຍາ 2023 ຂະແໜງການສຶກສາທິການ ແລະ ກິລາທົ່ວແຂວງອັດຕະປື ໄດ້ເປີດຂະບວນການແຂ່ງຂັນຮັກຊາດ ແລະ ພັດທະນາ ຂຶ້ນທີ່ຫ້ອງປະຊຸມພະແນກສຶກສາທິການ ແລະ ກິລາແຂວງ, ໂດຍການເປັນປະທານຂອງທ່ານ ອຸດົມສິນ ສີຊານົນ ກໍາມະການພັກແຂວງ ຫົວໜ້າພະແນກສຶກສາທິການ ແລະ ກິລາ ແຂວງອັດຕະປື,ມີຫ້ອງການສຶກສາທິການ ແລະ ກິລາ 5 ເມືອງ,ມີຄະອຳນວຍການ ໂຮງຮຽນທີ່ກ່ຽວຂ້ອງ ພ້ອມດ້ວຍແຂກຖືກເຊີນເຂົ້າຮ່ວມ.
ທ່ານ ອຸດົມສິນ ສີຊານົນ ໄດ້ກ່າວເປີດກອງປະຊຸມວ່າ: ການຈັດຕັ້ງປະຕິບັດຂໍ້ແຂ່ງຂັນຮັກຊາດ ແລະ ພັດທະນາ ແມ່ນຂະບວນການລວມຂອງຊາດ,ເຊິ່ງທຸກຂົງເຂດວຽກງານນັບແຕ່ສູນກາງລົງຮອດທ້ອງຖິ່ນຕ້ອງໄດ້ຈັດຕັ້ງປະຕິບັດ,ໂດຍສະເພາະແມ່ນການຈັດຕັ້ງປະຕິບັດເນື້ອໃນມະຕິກອງປະຊຸມໃຫຍ່ ຄັ້ງທີ XI ຂອງສູນກາງພັກ ແລະ ແຜນພັດທະນາເສດຖະກິດ-ສັງຄົມແຫ່ງຊາດ ແລະ ການຜັນຂະຫຍາຍເນື້ອໃນຂໍ້ແຂ່ງຂັນ, ຮັກຊາດ ແລະ ພັດທະນາ ທີ່ໄດ້ຮັບຮອງເວົ້າລວມ, ເວົ້າສະເພາະ ແມ່ນການຈັດຕັ້ງປະຕິບັດມະຕິກອງປະຊຸມ ໃຫຍ່ຄັ້ງທີ XI ຂອງອົງຄະນະພັກແຂວງ ແລະ ແຜນພັດທະນາເສດຖະກິດ-ສັງຄົມ 5 ປີ ຂອງແຂວງອັດຕະປືໃຫ້ປະກົດຜົນເປັນຈິງ. ສຳລັບຂະແໜງການສຶກສາທິການ ແລະ ກິລາ ແມ່ນສຸມໃສ່ຈັດຕັ້ງປະຕິບັດຍຸດທະສາດ ແຜນພັດທະນາການສຶກສາ ແລະ ກິລາຕາມຂະແໜງການຍ່ອຍໃນແຕ່ລະໄລຍະ, ໂດຍສະເພາະແມ່ນບັນດາຄາດໝາຍຕ່າງໆ ທີ່ສະພາຮັບຮອງ ເພື່ອບັນລຸຄາດໝາຍດັ່ງກ່າວນັ້ນ, ຜູ້ບໍລິຫານການສຶກສາຂັ້ນແຂວງ, ຂັ້ນເມືອງ, ຂັ້ນສະຖານການສຶກສາ ພ້ອມດ້ວຍພະນັກງານລັດຖະກອນ ແລະ ຄູສອນທັງໝົດເປັນເຈົ້າການຈັດຕັ້ງປະຕິບັດແຜນພັດທະນາດັ່ງກ່າວໃຫ້ເກີດເປັນຮູບປະທຳ. ສະນັ້ນ ການໄດ້ເປີດຂະບວນການແຂ່ງຂັນ, ຮັກຊາດ ແລະ ພັດທະນາ ໂດຍຕິດພັນກັບ 3 ຂໍ້ແຂ່ງຂັນຂອງຂະແໜງການສຶກສາທິການ ແລະ ກິລາ ທັງເປັນການປະເມີນຜົນງານໃນການຈັດຕັ້ງປະຕິບັດແຜນພັດທະນາການສຶກສາ ແລະ ກິລາໃນແຕ່ລະໄລຍະ ແລະ ເພື່ອເປັນການປຸກລະດົມ, ຊຸກຍູ້ຂະບວນການແຂ່ງຂັນ, ຍ້ອງຍໍ ຕໍ່ຜູ້ທີ່ມີຜົນງານດີເດັ່ນໃນການປະກອບສ່ວນເຂົ້າໃນການພັດທະນາການສຶກສາຕະຫຼອດໄລຍະ 5 ປີ .
ກອງປະຊຸມໄດ້ຜ່ານແຜນການແຂ່ງຂັນຂອງພະແນກສຶກສາທິການ ແລະ ກິລາແຂວງ ປະຈຳປີ 2021-2025, ຜ່ານຂໍ້ຕົກລົງເຈົ້າແຂວງ ວ່າດ້ວຍການຮັບຮອງແຜນການຈັດຕັ້ງປະຕິບັດຂໍ້ແຂ່ງຂັນຮັກຊາດ ແລະ ພັດທະນາ ຂອງຂະແໜງການສຶກສາທິການ ແລະ ກິລາ ແລະ ໄດ້ພ້ອມກັນຂຶ້ນຈັບມືແຂ່ງຂັນຈັດຕັ້ງປະຕິບັດຂໍ້ແຂ່ງຂັນຮັກຊາດ ແລະ ພັດທະນາ ຂອງຂະແໜງ ການສຶກສາທິການ ແລະ ກິລາ ປະຈຳປີ 2021 ຫາ 2025 ຢ່າງເປັນທາງການ.
ຂ່າວ ສິດຕິພອນ. ຂ.ອັດຕະປື
