ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ຂະແໜງ ຍທຂ 9 ແຂວງຂອງລາວໄດ້ຮັບອຸປະກອນຮັບໃຊ້ວຽກງານໂຄສະນາຄວາມປອດໄພທາງຫຼວງ

ກອງທຶນພິເສດ ແມ່ນໍ້າຂອງ-ແມ່ນໍ້າລ້ານຊ້າງ ມອບອຸປະກອນຮັບໃຊ້ວຽກງານໂຄສະນາຄວາມປອດໄພທາງຫຼວງໃຫ້ຂະແໜງໂຍທາທິການ ແລະ ຂົນສົ່ງ (ຍທຂ) 9 ແຂວງຂອງລາວ ລວມມີທັງໝົດ 34 ຊຸດ, ແຕ່ລະຊຸດປະກອບມີຄອມພີວເຕີໂນດບຸກ 1 ເຄື່ອງ LED 1 ເຄື່ອງຜ້າຈໍສາຍສະໄລ 1 ອັນ ແລະ ຕູ້ລຳໂພງ 1 ໜ່ວຍ, ໃນນີ້ ມອບໃຫ້ແຂວງວຽງຈັນ 11 ຊຸດ, ຫຼວງພະບາງ 7 ຊຸດ, ບໍ່ແກ້ວ 3 ຊຸດ, ໄຊຍະບູລີ 3 ຊຸດ, ຜົ້ງສາລີ 2 ຊຸດ, ຫຼວງນໍ້າທາ 2 ຊຸດ, ຫົວພັນ 2 ຊຸດ, ຊຽງຂວາງ 2 ຊຸດ ແລະ ແຂວງໄຊສົມບູນ 2 ຊຸດ ເພື່ອນຳໃຊ້ເຂົ້າໃນການລົງໂຄສະນາເຜີແຜ່ກົດລະບຽບຈະລາຈອນ ແລະປູກຈິດສຳນຶກຄວາມປອດໄພທາງທາງຫຼວງຕາມສຳນັກງານ, ອົງການ, ໂຮງຮຽນ ແລະບ້ານ ເພື່ອແນໃສ່ເຮັດໃຫ້ຜູ້ໃຊ້ລົດໃຊ້ທາງຫຼວງໄດ້ຮັບຮູ້ກົດລະບຽບຈະລາຈອນ, ເຕັກນິກການຂັບຂີ່ທີ່ປອດໄພ, ຄຸນສົມບັດມາລະຍາດໃນການຂັບຂີ່ແລະ ຊ່ວຍຫຼຸດຜ່ອນການເກີດອຸບັດເຫດລົງຕາມທ້ອງຖະໜົນລົງເທື່ອລະກ້າວ.


ພິທີ່ມອບ-ຮັບເຄື່ອງຊ່ວຍເຫລືອດັ່ງກ່າວ ຈັດຂຶ້ນຢູ່ກະຊວງໂຍທາທິການ ແລະ ຂົນສົ່ງ ໃນວັນທີ 2 ມິຖຸນາ 2020 ໂດຍການກ່າວມອບຂອງ ທ່ານ ບຸນຕາ ອ່ອນນາວົງ ຫົວໜ້າກົມຂົນສົ່ງ ແລະ ກ່າວຮັບແມ່ນຕາງໜ້າພະແນກ ຍທຂ ທັງ 9 ແຂວງ, ມີຜູ້ຕາງໜ້າຈາກກະຊວງການຕ່າງປະເທດ, ກະ ຊວງການເງິນ, ກົມການເງິນກະຊວງໂຍທາທິການ ແລະຂົນສົ່ງ ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.


ທ່ານ ບຸນຕາ ອ່ອນນາວົງ ໃຫ້ຮູ້ວ່າ: ໂຄງການໂຄສະນາປູກຈິດສໍານຶກກ່ຽວກັບຄວາມປອດໄພທາງຫຼວງ ສ້າງຕັ້ງຂຶ້ນປີ 2017 ໂດຍແມ່ນກອງທຶນພິເສດແມ່ນໍ້າຂອງ-ແມ່ນໍ້າລ້ານຊ້າງເປັນຜູ້ອະນຸມັດໃນການຈັດຕັ້ງປະຕິບັດໂຄງການດັ່ງກ່າວ ປີ 2019 ໄດ້ສຳເລັດການມອບອຸປະກອນໃຫ້ບັນດາພະແນກ ຍທຂ ແຂວງ ແລະ ເມືອງ 65 ຊຸດ, ພ້ອມນີ້ ຍັງສຳເລັດການເຝິກອົບຮົມກ່ຽວກັບການເຮັດໂຄສະນາຢູ່ 15 ແຂວງ 47 ເມືອງ ປີນີ້ແມ່ນສຳເລັດການມອບອຸປະກອນໃຫ້ແກ່ພະແນກ ຍທຂ ເມືອງຢູ່ພາກກາງ ແລະພາກໃຕ້ 29 ຊຸດ. ຈາກການຊ່ວຍເຫລືອຂອງກອງທຶນດັ່ງກ່າວໃນຄັ້ງນີ້ ຈະປະກອບສ່ວນເຂົ້າການຈັດຕັ້ງປະຕິບັດນະໂຍບາຍຂອງລັດຖະບານໃນການຫຼຸດຜ່ອນການເກີດອຸບັດເຫດລົງເທື່ອລະກ້າວ.