ON AIR

ຟັງວິທະຍຸ FM103.7Mhz ອອນລາຍ
Listen to Radio FM103.7Mhz Online

ຂົນຕາປອມອາດເຮັດໃຫ້ຕາບອດໄດ້

ນາຍ​ແພດ​ ໄພຈິດ ຫົວໜ້າຫ້ອງການ​ກະຊວງ​ສາທາລະນະ​ສຸກ​ຂອງ​ໄທ​ກ່າວ​ວ່າ:ປະຈຸ​ບັນ​ກະ​ແສ​ແຟຊັນ​ໃສ່​ຂົນ​ຕາ​ປອມ​ກກຳລັງ​ນິຍົມ​ກັນ​ທັງ​ຜູ້ຍິງ ​ແລະ ຜູ້​ຊາຍ ທີ່​ນິຍົມ​ຕິດ​ຂົນ​ຕາ​ປອມ​ທີ່​ມີ​ລັກສະນະ​ຍາວ ​ແລະ ງໍ ​ເພື່ອ​ໃຫ້​ຄົນ​ອື່ນ​ເບິ່ງ​ແລ້ວ​ໃບໜ້າ​ໂດດ​ເດັ່ນ,ສ່ວນ​ຄົນ​ທີ່​ມີ​ຂົນ​ຕາໜ້ອຍ ​ແລະ ສັ້ນ​ກໍ່​ແຮງ​ເອົາ​ມາ​ຕິດ​ເພີ່ມ​ຫລາຍ​ຊັ້ນ,ບາງ​ຄົນ​ຕິດ​ເປັນ​ແຜ່ນ ໜາຄື​ກັບ​ຂົນ​ນົກ,ບາງ​ຄົນ​ນຳ​ຂົນ​ຕາ​ປອມ​ທີ່​ມີໜ່ວຍໝາກປັດ​ແກ້ວ ຫລື ​ເພັດ​ປະດັບ​ຢູ່​ນຳ​ມາ​ຕິດ​ແບບ​ດາຣາ ​ແລະ ນາງ​ແບບ ​ເຊິ່ງ​ເປັນ​ການ​ນຳ​ສິ່ງ​ແປກ​ປອມ​ວັດ​ສະດຸ​ຕ່າງໆມາ​ຕິດ​ຢູ່​ຂົນ​ຕາຖື​ວ່າ​ສ່ຽງ ​ແລະ ​ເປັນ​ອັນຕະລາຍ​ຕໍ່ໜ່ວຍຕາ

​ແລະ ຍັງ​ເປັນ​ການ​ທຳລາຍໜ່ວຍຕາ​ທາງ​ອ້ອມ​ເນື່ອງ​ຈາກ​ວ່າ​ອາດ​ເຮັດ​ໃຫ້​ເກີດ​ສິ່ງ​ສົກກະປົກ​ມາສະ​ສົມ​ບໍລິ​ເວນໜັງຕາ

​ແລະ ຖ້າ​ເກັບ​ຮັກສາ​ຂົນ​ຕາ​ປອມ​ບໍ່ຖືກ​ວິທີ ​ແລະ ບໍ່ສະອາດ​ເມື່ອ​ນຳ​ມາ​ຕິດ​ຂອບ​ຕາກໍ່ມີ​ໂອກາດ​ທີ່​ເຊື້ອ​ໂຣກຈະ​ເຂົ້າ​ສູ່ໜ່ວຍຕາ ​ແລະ ອາດ​ຈະ​ກໍ່​ໃຫ້​ເກີດ​ອາການ​ແພ້,ອັກ​ເສບ ​ແລະ ​ເຄືອງ​ຕາ ​ເຊິ່ງມີ​ໂອກາດ​ສ່ຽງ​ເຖິງ​ຂັ້ນ​ຕາບອດ​ໄດ້.

​ແພດ​ເຕືອນ​ວ່າ​ຂົນ​ຕາ​ປອມ​ຄຸນ​ນະພາ​ບຕ່ຳ​ອາດ​ເຮັດ​ໃຫ້​ເຊື້ອພະຍາດ​ເຂົ້າຕາ​ໄດ້ ​ແລະ ຖ້າ​ຖອດ​ຂົນ​ຕາ​ປອມ​ເລື້ອຍໆກໍ່​ເຮັດ​ໃຫ້​ຂົນ​ຕາ​ແທ້​ຫລຸດ ​ແລະ ບໍ່​ແຂງ​ແຮງ ​ແລະ ອາດ​ຈະ​ທຳລາຍໜ່ວຍຕາ​ເອງ​ອີກ.​ຜູ້​ທີ່​ຕິດ​ຂົນ​ຕາ​ປອມ​ຄວນ​ລະມັດ​ລະວັງ​ແດ່ ​ເນື່ອງ​ຈາກ​ວ່າ​ຂົນ​ຕາ​ຂອງ​ຄົນ​ເຮົາມີ​ຄວາມ​ສຳຄັນ​ຫລາຍ​ຕໍ່ໜ່ວຍຕາ ມີໜ້າທີ່​ປ້ອງ​ກັນ​ອັນຕະລາຍ​ທີ່​ຈະ​ເກີດ​ກັບໜ່ວຍຕາ​ເຊັ່ນ:ປ້ອງ​ກັນ​ຂີ້ຝຸ່ນ ​ແລະ ​ເຫື່ອ​ບໍ່​ໃຫ້​ໄຫລ​ເຂົ້າ​ສູ່ໜ່ວຍຕາ.