ຂົວມິດຕະພາບລາວ-ໄທ ແຫ່ງທີ 1 ວຽງຈັນ-ໜອງຄາຍ ເປັນຂົວແຫ່ງມິດຕະພາບ ເຊື່ອມໂຍງລະຫວ່າງ ສອງຝັ່ງຂອງ ລາວ-ໄທ, ໄທ-ລາວ, ເປັນຂົວຂ້າມນໍ້າຂອງແຫ່ງທຳອິດຂອງ ສປປ ລາວ ເຮັດໃຫ້ການໄປມາຫາສູ່ລະຫວ່າງປະຊາຊົນຂອງສອງປະເທດ ສະດວກສະບາຍ ແລະ ວ່ອງໄວ. ສ້າງຕັ້ງຂຶ້ນພາຍໃຕ້ການຮ່ວມມື ຂອງສອງລັດຖະບານລາວ-ໄທ ໂດຍການສະໜັບສະໜູນທຶນ ໃນການກໍ່ສ້າງຂອງລັດຖະບານອົດສະຕຣາລີ.
ເນື່ອງໃນໂອກາດຄົບຮອບ 30 ປີ ແຫ່ງການສ້າງຕັ້ງຂົວມິດຕະພາບລາວ-ໄທ ແຫ່ງທີ 1 ວຽງຈັນ-ໜອງຄາຍ, ທ່ານ ສົມສະຫວາດ ເລັ່ງສະຫວັດ ອະດີດຮອງນາຍົກລັດຖະມົນຕີ, ອະດີດລັດຖະມົນຕີກະຊວງຕ່າງປະເທດ ໄດ້ໃຫ້ສຳພາດຕໍ່ສື່ມວນຊົນ ໃນວັນທີ 6 ເມສາ 2024 ໂດຍທ່ານໄດ້ຍົກໃຫ້ເຫັນປະຫວັດກ່ອນການ ສ້າງຂົວມິດຕະພາບລາວ-ໄທ ແຫ່ງທີ 1 ວຽງຈັນ-ໜອງຄາຍ ໂດຍໄດ້ມີການປຶກສາຫາລືສອງຝ່າຍ ໃນຫລາຍບັນຫາສຳຄັນ ໂດຍສະເພາະ ແມ່ນການປ່ຽນເລນການສັນຈອນ ໂດຍໄດ້ຕົກລົງກຳນົດເອົາຈຸດປ່ຽນເລນລົດ ຢູ່ດິນແດນຝັ່ງລາວ ຫລັງຈາກນັ້ນ, ຂົວມິດຕະພາບແຫ່ງທີ 2 ແມ່ນໃຫ້ກຳນົດເອົາຈຸດປ່ຽນເລນລົດ ຢູ່ຝັ່ງໄທ ແລະ ຂົວຕໍ່ໄປແມ່ນໃຫ້ຜັດປ່ຽນກັນໄປແຕ່ລະແຫ່ງ ເຊິ່ງຂົວມິດຕະພາບລາວ-ໄທ ແຫ່່ງທີ 1 ວຽງຈັນ-ໜອງຄາຍ ໄດ້ເລີ່ມລົງມືກໍ່ສ້າງໃນປີ 1991 ແລະ ສຳເລັດການກໍ່ສ້າງ ພ້ອນເປີດນໍາໃຊ້ຢ່າງເປັນທາງການໃນວັນທີ 9 ເມສາ 1994 ເຊິ່ງໄດ້ຮັບການສະໜູນສະໜັບທຶນ ແລະ ວິຊາການ ຈາກ ລັດຖະບານອົດສະຕາລີ ໃນມູນຄ່າ 42 ລ້ານໂດລາອົດສະຕາລີ.
ຕະຫລອດໄລຍະ 30 ປີຜ່ານມາ ຂົວແຫ່ງນີ້, ໄດ້ປະກອບສ່ວນ ແລະ ອຳນວຍຄວາມສະດວກ ໃນການເຊື່ອມຈອດຄົມມະນາຄົມ, ການຄ້າ, ການລົງທຶນ, ການທ່ອງທ່ຽວ ແລະ ການໄປມາຫາສູ່ລະຫວ່າງ ປະຊາຊົນສອງຊາດ ລາວ-ໄທ ລວມທັງປະຊາຊົນຈາກປະເທດພາກພື້ນ ແລະ ອາຊຽນ, ທັງເປັນການພັດທະນາເສດຖະກິດຂອງສອງປະເທດ ໃຫ້ເຕີບໃຫຍ່ເຂັ້ມແຂງ.
ພ້ອມນີ້, ທ່ານ ສົມສະຫວາດ ເລັ່ງສະຫວັດ ໄດ້ຍົກໃຫ້ເຫັນບັນຍາກາດ ພິທີເປີດຂົວມິດຕະພາບຢ່າງເປັນທາງການ ເຊິ່ງເປັນພາບແຫ່ງປະຫວັດຊາດ, ເປັນພາບແຫ່ງຄວາມປະທັບໃຈ ທີ່ການນຳຂັ້ນສູງສຸດຂອງສາມປະເທດ ລາວ, ໄທ ແລະ ອົດສະຕຣາລີ ເຂົ້າຮ່ວມເປີດຂົວດັ່ງກ່າວ ເຊິ່ງບັນຍາກາດເຕັມໄປດ້ວຍໄມຕີຈິດມິດຕະພາບ ເຊິ່ງຂົວດັ່ງກ່າວ, ໄດ້ກາຍເປັນຄວາມຫວັງ ຂອງປະຊາຊົນສອງປະເທດ ນຳພາຜົນປະໂຫຍດມາສູ່ປະຊາຊົນສອງຊາດ. ພ້ອມກັນນີ້, ທ່ານ ສົມສະຫວາດ ເລັ່ງສະຫວັດ ຍັງໄດ້ສະແດງຄວາມຂອບໃຈ ຕໍ່ລັດຖະບານອົດສະຕຣາລີ ທີ່ໄດ້ໃຫ້ການຊ່ວນເຫລືອ ສະໜັບສະໜູນທາງດ້ານທຶນ ແລະ ວິຊາການ ໃນການກໍ່ສ້າງຂົວ ຈົນສຳເລັດ ແລະ ເປີດໃຊ້ມາຮອດປັດຈຸບັນ.
ປັດຈຸບັນ ຂົວມິດຕະພາບລາວ-ໄທ ມີທັງໝົດ 5 ແຫ່ງ ຄື: ວຽງຈັນ-ໜອງຄາຍ, ສະຫວັນນະເຂດ-ມຸກດາຫານ, ຄຳມ່ວນ-ນະຄອນພະນົມ, ບໍ່ແກ້ວ-ຊຽງລາຍ ແລະ ບໍລິຄຳໄຊ-ບຶງການ ກຳລັງກໍ່ສ້າງໃກ້ຈະສຳເລັດ.
ຂ່າວ-ພາບ: ກິດຕາ, ຂປລ
