ON AIR

ຟັງວິທະຍຸ FM103.7Mhz ອອນລາຍ
Listen to Radio FM103.7Mhz Online

ຂົວເຊກຸມກາມ ແລະຂົວເຊທ່າມວກ ແຂວງສະຫວັນນະເຂດ ຂອງຂັວນຈາກລັດຖະບານຍີ່ປຸ່ນ ເປີດໃຫ້ບໍລິການແລ້ວ

ພິທີມອບ-ຮັບ ຂົວສອງແຫ່ງທີ່ນອນຢູ່ໃນເສັ້ນທາງຫຼວງແຫ່ງຊາດເລກ 9, ແຂວງສະຫວັນນະເຂດ ຈັດຂຶ້ນຢ່າງເປັນທາງການໃນວັນທີ 10 ມິຖຸນາ 2019ນີ້ ໂດຍມີທ່ານສະເຫລີມໄຊ ກົມມະສິດ ລັດຖະມົນຕີ ກະຊວງ ການຕ່າງປະເທດ , ທ່າສຸພັນ ແກ້ວມີໄຊ ລັດຖະມົນຕີກະຊວງແຜນການແລະການລົງທຶນ, ທ່ານນາງ ໂຕຊະໂກະ ອາເບະ ຮອງລັດຖະມົນຕີກະຊວງການຕ່າງປະເທດຍີ່ປຸ່ນ ທ່ານ ທາເຄຊິ ຮີຄິຮາຣະ, ເອກອັກຄະຣາຊະທູດ ຍີ່ປຸ່ນ ປະຈຳ ສປປ ລາວ, ທ່ານ ໂຢຊິຮາຣຸ ໂຢເນຢາມະ, ຜູ້ຕາງໜ້າອົງການໄຈກ້າ ປະຈຳລາວແລະທ່ານ ໂພໄຊ ໄຊຍະສອນ ຮອງເຈົ້າແຂວງສະຫວັນນະເຂດ, ພ້ອມດ້ວຍພາກສ່ວນກ່ຽວຂ້ອງສອງປະເທດ ລາວ-ຍີ່ປຸ່ນເຂົ້າຮ່ວມ.

ໂຄງການກໍ່ສ້າງຂົວສອງແຫ່ງນີ້ ມີມູນຄ່າທັງໝົດ 194 ຕື້ກີບ (ປະມານ 2.528 ລ້ານເຢັນ) ແລະ ລັດຖະບານລາວ ປະກອບສ່ວນສົມທົບຈຳນວນ 12 ຕື້ກີບ. ໂດຍແມ່ນບໍລິສັດຮາຊາມາອັນໂດ ແລະບໍລິສັດເຈເອຟຈີເອັນຈີເນຍຣິງ ເປັນຜູ້ຮັບເໝົາກໍ່ສ້າງ  ທ່ານ ຄໍາໝັ້ນ ແສນພິມມະຈັກ, ຮອງຜູ້ດໍາເນີນໂຄງການໃຫ້ຮູ້ວ່າ ຂົວສອງແຫ່ງນີ້ເປັນຂົວເບຕົງເສີມເຫລັກສາມາດຮັບນໍ້າໜັກໄດ້ 11 ໂຕນ/ເພົາ ຂົວເຊກຸມກາມມີຄວາມຍາວ 160ແມັດ, ກວ້າງ 12ແມັດ, ສ່ວນຂົວເຊທ່າມວກ ຍາວ 160ແມັດ ກວ້າງ 16ແມັດ ພ້ອມໄດ້ປູຢາງອັສຟານ ເຂົ້າຂົວ ສອງແຫ່ງນີ້ ຍາວ2.056ແມັດ ກໍ່ສ້າງລະບົບຕ້ານເຈື່ອນດ້ວຍກະຕ່າຫີນ , ປູກຫຍ້າແລະຕິດຕັ້ງລະບົບໄຟ ແລະເຄື່ອງ ໝາຍຈາລະຈອນ ການກໍ່ສ້າງເລີ່ມມາແຕ່ເດືອນມັງກອນ 2017 ໃຊ້ເວລາກໍ່ສ້າງທັງໝົດ 31 ເດືອນ.

ພາຍຫລັງທ່ານນາງ ໂຕຊະໂກະ ອາເບະ ຮອງລັດຖະມົນຕີກະຊວງການຕ່າງປະເທດຍີ່ປຸ່ນ ກ່າວມອບຂົວທັງ ສອງແຫ່ງໃຫ້ລັດຖະບານລາວແລ້ວ ທ່ານໂພໄຊ ໄຊຍະສອນ ຮອງເຈົ້າແຂວງສະຫວັນນະເຂດ ໄດ້ກ່າວສະແດງ ຄວາມຂອບໃຈຕໍ່ລັດຖະບານແລະປະຊາຊົນຍີ່ປຸ່ນ ທີ່ເຫັນວ່າ ໂຄງການກໍ່ສ້າງຂົວເຊກຸມກາມ ແລະຂົວເຊທ່າມວກ ຕາມແລະເສັ້ນທາງເລກ9 ເປັນໂຄງການທີ່ສໍາຄັນຫລາຍ ໃນການຂົນສົ່ງທາງບົກ ເປັນເປັນໂຄງການທີ່ສໍາຄັນທາງ ເສດຖະກິດ ແລະສັງຄົມ ປະກອບສ່ວນຈັດຕັ້ງຜັນຂະຫຍາຍ ແຜນພັດທະນາເສດຖະກິດ ສັງຄົມແຫ່ງຊາດ 5ປີ ເທື່ອທີ VIII ຂອງລັດຖະບານກໍຄືຂອງແຂວງສະຫວັນນະເຂດ ແລະສັນຍາວ່າຈະປົກປັກຮັກສາ ຖະໜຸຖະໜອມ ປົວແປງໃຫ້ຂົວຮັບປະກັນທາງດ້ານເຕັກນິກ, ທົນທານ ໃຫ້ສົມກັບການສະໜັບສະໜູນຊ່ວຍເຫລືອລ້າ ຈາກລັດຖະບານຍີ່ປຸ່ນ.