ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ຂໍຊົມເຊີຍປວງຊົນລາວຢ່າງສຸດໃຈທີ່ເປັນເຈົ້າການໃຫ້ການຮ່ວມມືເຮັດໃຫ້ການຕິດເຊື້ອຢູ່ປະເທດເຮົາ ມີລະດັບຕໍ່າກວ່າໝູ່ໃນອາຊຽນ

ທ່ານ ຮສ ດຣ ພູທອນ ເມືອງປາກ, ຮອງລັດຖະມົນຕີກະຊວງສາທາລະນະສຸກ, ຜູ້ປະຈໍາການຄະນະສະເພາະກິດເພື່ອຄວບຄຸມພະຍາດ ໂຄວິດ-19 ໃຫ້ຮູ້ວ່າ: ມາຮອດມື້ນີ້ ຜູ້ສໍາຜັດໃກ້ຊິດກັບຜູ້ຕິດເຊື້ອ ຈໍານວນ 313 ຄົນ ກໍ່ໄດ້ຮັບການຕິດຕາມຄົບກໍານົດ 14 ວັນແລ້ວ, ຄົນເຈັບສະສົມ ຈຳນວນ 19 ຄົນ ກໍ່ໄດ້ປິ່ນປົວຫາຍດີ ແລະ ອອກໂຮງໝໍແລ້ວ 7 ຄົນ ຍັງສືບຕໍ່ປິ່ນປົວອີກ ຈໍານວນ 12 ຄົນ; ສະນັ້ນ ການທີ່ ສປປ ລາວ ສາມາດຄວບຄຸມ ເຮັດໃຫ້ມີຜູ້ຕິດເຊື້ອມີຈຳນວນຕໍ່າກວ່າປະເທດອື່ນໃນພາກພື້ນອາຊຽນນີ້ ອັນສໍາຄັນແມ່ນຍ້ອນມີແນວທາງ, ມີການຊີ້ນໍານໍາພາ, ມີຄໍາສັ່ງ, ແລະ ຄໍາແນະນໍາທີ່ຖືກຕ້ອງ ແລະ ສອດຄ່ອງຂອງພັກ ແລະ ລັດຖະບານເຮົາ; ແຕ່ອັນສໍາຄັນຕັດສິນກວ່າໝູ່ໝົດກໍ່ແມ່ນ ຍ້ອນບັນດາພໍ່ແມ່ ປະຊາຊົນບັນດາເຜົ່າ, ທະຫານຕໍາຫລວດ ພະນັກງານ, ແລະ ລັດຖະກອນເຮົາທຸກຄົນ ໄດ້ເອົາໃຈໃສ່ ເປັນເຈົ້າການໃນການຮ່ວມມື ຈັດຕັ້ງປະຕິບັດຢ່າງຕັ້ງໜ້າ, ພວກເຮົາຈຶ່ງມີຜົນສໍາເລັດຄືແນວນີ້. ດັ່ງນັ້ນ, ຄະນະສະເພາະກິດ ຈຶ່ງສະແດງຄວາມຂອບໃຈ ແລະ ຄວາມຮູ້ບຸນຄຸນຢ່າງສູງ ຕໍ່ທຸກໆພາກສ່ວນທີ່ໄດ້ຮ່ວມແຮງຮ່ວມໃຈ ເປັນເຈົ້າການນຳກັນ ເຮັດໃຫ້ການຕິດເຊື້ອຢູ່ປະເທດເຮົາ ມີລະດັບຕໍ່າກວ່າໝູ່ໃນອາຊຽນ.

ທ່ານ ຮສ ດຣ ພູທອນ ເມືອງປາກ ໃຫ້ຮູ້ຕື່ມວ່າ: ພັກ ແລະ ລັດຖະບານເຮົາຊາບດີວ່າ ການປະຕິບັດຄໍາສັ່ງທີ່ມີລະບຽບ ມີຫລັກການຄືແນວນີ້ ມັນຍ່ອມແຕະຕ້ອງເຖິງການດໍາລົງຊີວິດປະຈໍາວັນຂອງປະຊາຊົນບັນດາເຜົ່າ, ແຕະຕ້ອງເຖິງການດໍາເນີນທຸລະກິດຂອງພາກສ່ວນຕ່າງໆ; ສະນັ້ນ ມາຮອດປະຈຸບັນ ທ່ານນາຍົກລັດຖະມົນຕີ ຈຶ່ງໄດ້ມີທິດຊີ້ນໍາໃຫ້ຄະນະສະເພາະກິດຂອງພວກເຮົາ ຫລຸດຜ່ອນບາງມາດຕະການທີ່ໄດ້ປະຕິບັດຜ່ານມາແລ້ວນັ້ນ ເພື່ອໃຫ້ທຸກຄົນສາມາດໍາເນີນຊີວິດປົກກະຕິໄດ້ ທັງຫລຸດຜ່ອນຜົນກະທົບຕໍ່ການດໍາເນີນທຸລະກິດ.

ໃນໂອກາດນີ້, ຮສ ດຣ ພູທອນ ເມືອງປາກ ຈຶ່ງຮຽກຮ້ອງອີກເທື່ອໜຶ່ງ ມາຍັງປະຊາຊົນບັນດາເຜົ່າ ຈົ່ງສືບຕໍ່ປະຕິບັດຄໍາສັ່ງ ແລະ ຄໍາແນະນໍາຕ່າງໆຂອງລັດຖະບານຢ່າງເຂັ້ມງວດຕໍ່ໄປອີກໄລຍະໜຶ່ງ. ອີກປະການໜຶ່ງ, ຖ້າສາມະຊິກພາຍໃນຄອບຄົວຂອງທ່ານ ຫາກມີບັນຫາດ້ານສຸຂະພາບ ຫລື ເຈັບເປັນ ກໍ່ຂໍໃຫ້ໄປພົບແພດໝໍ ໂດຍໄວ ເພື່ອກວດສຸຂະພາບຢູ່ໂຮງໝໍ, ບໍ່ໃຫ້ຢ້ານວ່າຈະຕິດພະຍາດໂຄວິດ-19 ເພາະທາງໂຮງໝໍ ໄດ້ຈັດສັນ ຂັ້ນຕອນການກວດພະຍາດຢ່າງປອດໄພດີ; ຖ້າເກີດສົງໄສເປັນພະຍາດໂຄວິດ- 19 ກໍ່ຈະໄດ້ຈັດສັນໄວ້ຢູ່ເຂດໜຶ່ງສະເພາະຕ່າງຫາກ ແຕ່ ຫາກເປັນພະຍາດທົ່ວໄປ ກໍ່ຈະຈັດສັນໄວ້ອີກເຂດໜຶ່ງຕ່າງຫາກ, ໂດຍສະເພາະໃນໄລຍະເວລານີ້ ທີ່ລະດູຝົນກໍ່ກ້າວເຂົ້າມາແລ້ວ ເຊິ່ງເປັນລະດູທີ່ພວກເຮົາຕ້ອງເອົາໃຈໃສ່ເຝົ້າລະວັງການເກິດພະຍາດລະດູການ, ໂດຍສະເພາະແມ່ນພະຍາດ ໄຂ້ເລືອດອອກ, ໝາກແດງ ແລະ ໄອໄກ່ ເຊິ່ງເປັນພະຍາດທີ່ສາມາດປ້ອງກັນໄດ້ດ້ວຍຢາວັກຊິນ, ຂໍໃຫ້ບັນດາທ່ານຈົ່ງເອົາໃຈໃສ່ສຸຂະພາບຂອງຕົນເອງ; ຖ້າມີອາການສົງໄສ ຂໍໃຫ້ຮີບຟ້າວໄປພົບແພດໝໍ ແລະ ກວດສຸຂະພາບຂອງຕົນເອງ, ເພາະທາງໂຮງໝໍພ້ອມແລ້ວທີ່ຈະໃຫ້ການບໍລິການ ແລະແນະນໍາດ້ານສຸຂະພາບແກ່ທຸກທ່ານຢ່າງເຕັມທີ່ສະເໝີ.

ໂດຍ: ເຂີຍຫລ້າ