ເນື່ອງໃນໂອກາດສະເຫລີມສະຫລອງວັນເດັກສາກົນ ໃນວັນທີ 1 ມີຖຸນາ 2022 ນີ້ທີ່ແຂວງອັດຕະປື, ຄະນະກໍາມາທິການແຫ່ງຊາດເພື່ອຄວາມກ້າວໜ້າຂອງແມ່ຍິງ ແລະ ແມ່-ເດັກ(ຄຊກມດ) ຮ່ວມກັບ ຄກມດ ແຂວງອັດຕະປື ແລະ ອົງການອຸຍນີເຊັບ ປະຈຳລາວ ໄດ້ຈັດພິທີສະເຫລີມສະຫລອງວັນເດັກສາກົນປີ 2022 ຕິດພັນກັບວັນປູກຕົ້ນໄມ້ແຫ່ງ ຊາດ ຢ່າງເປັນຂະບວນຟົດຟື້ນ ພາຍໃຕ້ຫົວຂໍ້ “ສ້າງອະນາຄົດທີ່ດີກວ່າເພື່ອເດັກທຸກຄົນ”.ໂດຍເປັນປະທານກ່າວເປີດຂອງທ່ານ ນາງ ອິນລາວັນ ແກ້ວບຸນພັນ ປະ ທານສູນກາງສະຫະພັນແມ່ຍິງລາວ, ຮອງປະທານຜູ້ປະຈໍາການ ຄຊກມດ, ມີທ່ານ ບຸນປະເສີດເສດທິລາດ ຮອງເຈົ້າແຂວງອັດຕະປື, ປະທານ ຄກມດຂ; ມີບັນດາຮອງປະທານ ຄກມດ ແຂວງອັດຕະປື, ມີຜູ້ຕາງໜ້າອົງການອຸຍນິເຊັບ, ອົງການກອຍກາ ແລະ ຈັດຕັ້ງສາກົນ, ພ້ອມດ້ວຍຄູ-ອາຈານ ຜູ້ປົກຄອງ, ນ້ອງນັກຮຽນ, ຫລານນ້ອຍ ພາຍໃນແຂວງອັດຕະປືເຂົ້າຮ່ວມ.
ທ່ານ ນາງ ອິນລາວັນ ແກ້ວບຸນພັນ ກ່າວວ່າ: ພັກ ແລະ ລັດຖະບານຍາມໃດກໍ່ໄດ້ເອົາໃຈໃສ່ ແລະ ມີຄວາມເປັນຫ່ວງເປັນໄຍຕໍ່ເດັກລາວບັນດາເຜົ່າ ເຊິ່ງສະແດງອອກໃນການອອກແຈ້ງການໃຫ້ມີການສະເຫລີມສະຫລອງວັນເດັກສາກົນ ຕິດພັນກັບວັນປູກຕົ້ນໄມ້ແຫ່ງຊາດໃນທົ່ວປະເທດ ໂດຍຕິດພັນກັບສະພາບຄວາມເປັນຈິງທາງດ້ານເສດຖະກິດ ແລະ ການແຜ່ລະບາດຂອງພະຍາດໂຄວິດ 19 ຢູ່ໃນແຕ່ລະທ້ອງຖິ່ນ. ວັນເດັກສາກົນໃນແຕ່ ລະປີແມ່ນໄດ້ຈັດຂຶ້ນຄືກັບປາງບຸນໃຫຍ່ສຳລັບເດັກທຸກຄົນ ເພື່ອທົບທວນຄືນການຈັດຕັ້ງປະຕິບັດ ສົນທິສັນຍາ ວ່າດ້ວຍສິດທິເດັກ ຢູ່ ສປປ ລາວ ເຊິ່ງເດັກມີຄວາມຕ້ອງການໃນການປ້ອງກັນ ແລະ ດູແລເບິ່ງແຍງເປັນພິເສດ ລວມທັງການປົກປ້ອງທີ່ເຫມາະສົມທາງດ້ານກົດໝາຍ. ການສະເຫລີມສະຫລອງວັນເດັກສາກົນແມ່ນໄດ້ເລິ່ມຈາກ ການຈັດກອງປະຊຸມໂລກຄັ້ງທໍາອິດ ເພື່ອຄວາມເປັນຢູ່ທີ່ດີຂອງເດັກ ຢູ່ ເຊີແນວ, ປະເທດສະວິດເຊີແລນ ໃນວັນທີ 1 ມິຖຸນາ 1925 ແລະ ບັນດາປະເທດສະມາຊິກອົງການສະຫະປະຊາຊາດ ກໍ່ໄດ້ຖືເອົາວັນດັ່ງກ່າວເປັນວັນເດັກສາກົນ ເພື່ອຈຸດປະສົງໃນການປົກປ້ອງ ແລະ ສົ່ງເສີມເດັກຕາມພອນສະຫວັນ ແລະ ຄວາມສາມາດຂອງເດັກແຕ່ລະຄົນ. ການສະເຫລີມສະຫລອງວັນເດັກສາກົນໃນປີນີ້ ແມ່ນຄົບຮອບ 97 ປີ.
ໃນໂອກາດນີ້, ທ່ານ ນາງ ອິນລາວັນ ແກ້ວບຸນພັນ ຍັງໄດ້ຮຽກຮ້ອງມາຍັງ ການຈັດຕັັ້ງຂອງພັກ-ລັດ, ແນວລາວສ້າງຊາດ, ອົງການຈັດຕັັ້ງມະຫາຊົນ, ສະຖາບັນການສຶກສາທັງພາກລັດ ແລະ ເອກະຊົນ ຕະຫລອດເຖິງປະຊາຊົນ ໃນຂອບເຂດທົ່ວປະເທດ ຈົ່ງຍົກສູງຄວາມຮັບຜິດ ຊອບຂອງຕົນ ແລະ ອອກແຮງເພີ່ມທະວີປະຕິບັດວຽກງານແມ່ແລະເດັກ ແລະ ແກ້ໄຂບັນຫາ, ສິ່ງທ້າທາຍ ແລະ ຂໍ້ຄົງຄ້າງໃນປະຈຸບັນ ກໍຄືເອົາໃຈໃສ່ເພື່ອຮັບປະກັນການຢູ່ລອດ, ການພັດທະນາ, ການປົກປ້ອງ ແລະ ການມີສ່ວນຮ່ວມຂອງເດັກທຸກຄົນ, ເຮັດໃຫ້ເດັກລາວບັນດາເຜົ່າ ມີຄວາມຜາສຸກ, ໄດ້ຮັບຄວາມຮັກອັນອົບອຸ່ນ ແລະ ການເບິ່ງແຍງດູແລເອົາໃຈໃສ່ເປັນຢ່າງດີຈາກພໍ່ແມ່, ຄອບ ຄົວ, ຊຸມຊົນ, ສັງຄົມ ແລະ ການຈັດຕັ້ງທຸກຂັ້ນ ເພື່ອໃຫ້ເດັກຮັບການພັດທະນາ ແລະ ມີອະນາຄົດທີ່ສົດໃສ ກ້າວເປັນຜູ້ໃຫຍ່ທີ່ມີຄຸນນະພາບ, ເປັນກຳລັງຊັບພະຍາກອນມະນຸດ ທີ່ມີຄວາມເຂັ້ມແຂງຂອງຊາດ ເພື່ອສືບຕໍ່ພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ໃຫ້ຈະເລີນຮຸ່ງເຮືອງ.
ໃນໂອກາດດຽວກັນ, ທ່ານ ນາງ ອິນລາວັນ ແກ້ວບຸນພັນ ປະທານສູນກາງສະຫະ ພັນແມ່ຍິງລາວ, ຮອງປະທານຜູ້ປະຈໍາການ ຄຊກມດ ແລະ ທ່ານ ເລັດ ໄຊຍະພອນ ເຈົ້າແຂວງອັດຕະປື ພ້ອມດ້ວຍແຂກທີ່ຖືກເຊີນຍັງໄດ້ເຂົ້າຮ່ວມພິທີປູກຕົ້ນໄມ້ ແລະ ຢອດຢາໃຫ້ເດັກ ຢູ່ທີ່ຫໍປະຊຸມໃຫຍ່ແຂວງອັດຕະປື.
