ປັດຈຸບັນ, ໂຄງການພັດທະນາເສດຖະກິດພິເສດໃໝ່ ສີທັນດອນ ຢູ່ເມືອງໂຂງ, ແຂວງຈໍາປາສັດ ພວມໄດ້ຮັບການຈັດຕັ້ງປະຕິບັດຢ່າງຕໍ່ເນື່ອງ ເຖີງວ່າພົບຄວາມຫຍຸ້ງຍາກບາງດ້ານ ໂດຍສະເພາະການຊອກຫາແຮງລາວເພື່ອເຂົ້າເຮັດວຽກນໍາໂຄງ ການ, ລວມເຖີງຂັ້ນຕອນອະນຸມັດບາງໜ້າວຽກຂອງໂຄງການຈາກພາກລັດຍັງມີຫລາຍຂັ້ນຕອນທີ່ສັບສົນ.
ທ່ານ ຈາງສີ (Zhang Qi) ຜູ້ອໍານວຍບໍລິສັດ ຮ່ວມພັດທະນາ ສີທັນດອນ ຈໍາກັດ ໃຫ້ສໍາພາດຕໍ່ສື່ມວນຊົນລາວ ເມື່ອບໍ່ດົນມານີ້ວ່າ: ໂຄງການພັດທະນາເສດຖະ ກິດພິເສດໃໝ່ສີທັນດອນ ໄດ້ເລີ່ມຕົ້ນໃນປີ 2018. ພາຍຫລັງອະນຸມັດໂຄງການ ໄດ້ປະສົບກັບການລະບາດຂອງພະຍາດໂຄວິດ-19, ແຕ່ພາຍຫລັງການລະບາດຂອງພະ ຍາດດັ່ງກ່າວ, ບັນດາໜ້າວຽກຂອງໂຄງການໄດ້ຮັບການຈັດຕັ້ງປະຕິບັດ. ປັດຈຸບັນ ແມ່ນພວມສຸມໃສ່ຈັດຕັ້ງປະຕິບັດຫລາຍໜ້າວຽກ ເຊິ່ງລວມມີ:ເຂດທີ່ຢູ່ອາໄສໃໝ່ ໂຄງການບ້ານຈັດສັນຂອງປະຊາຊົນ ເຊິ່ງໄລຍະທຳອິດຄາດວ່າຈະໄດ້ມອບ-ຮັບ ແລະ ນຳໃຊ້ພາຍໃນທ້າຍປີນີ້, ຄຽງຄູ່ກັນນີ້ ແມ່ນໂຄງການການລ້ຽງປາເພື່ອສົ່ງອອກ ເຊິ່ງໂຮງງານແປຮູບປາຈະໄດ້ເປີດນໍາໃຊ້ພາຍໃນປີນີ້ເຊັ່ນດຽວກັນ.
ສໍາຫຼັບໂຄງການກໍ່ສ້າງໂຮງແຮມຕຶກຕິບເຂົ້າ ໄດ້ດໍາເນີນການກໍ່ສ້າງຮອດຊັ້ນທີ 5 ແລ້ວ ແລະ ໂຄງສ້າງຫຼັກຂອງອາຄານ ໂດຍສະເພາະຊັ້ນເທິງສຸດຂອງອາຄານຈະສໍາເລັດສົມບູນກ່ອນທ້າຍປີນີ້ ແລະ ຄາດວ່າໃນປີ 2026 ຈະເປີດດໍາເນີນກິດຈະການ, ສ່ວນໂຄງການກໍ່ສ້າງສະໜາມກ໊ອຟ ທີ່ກຳລັງດຳເນີນການກໍ່ສ້າງ, ປັດຈຸບັນ ແມ່ນບຸກເບີກເນື້ອທີ່. ເຊິ່ງທັງໝົດນີ້ແມ່ນຄວາມຄືບໜ້າຂອງໂຄງການກໍ່ສ້າງຕົ້ນຕໍ ແລະ ສໍາຄັນ, ສ່ວນການກໍ່ສ້າງສິ່ງອຳນວຍຄວາມສະດວກອື່ນໆ ໄດ້ເລີ່ມດຳເນີນການກໍ່ສ້າງຢ່າງເຕັມຮູບແບບ.
ທ່ານ ຈາງສີ ໃຫ້ຮູ້ຕື່ມວ່າ: ຜູ້ອໍານວຍບໍລິສັດ ຮ່ວມພັດທະນາ ສີທັນດອນ ຈໍາກັດ ໃຫ້ຮູ້ຕື່ມວ່າ: ຜ່ານການຈັດຕັ້ງປະຕິບັດໂຄງການພັດທະນາເສດຖະກິດພິເສດໃໝ່ ສີທັນດອນ ມາຮອດປັດຈຸບັນ ເຫັນວ່າໄດ້ຮັບການສະໜັບສະໜູນເປັນຢ່າງດີຈາກພາກລັດ, ບວກກັບຂອບເຂດໂຄງການມີແຫຼ່ງຊັບພະຍາກອນ, ທຳມະຊາດ ແລະ ສະພາບສິ່ງແວດລ້ອມໂດຍລວມແມ່ນດີຫຼາຍ, ພ້ອມນີ້ ປະຊາຊົນໃນທ້ອງຖິ່ນ ເປັນຄົນທີ່ຊື່ສັດຈິງໃຈມີມະນຸດສຳພັນທີ່ດີ.
ຢ່າງໃດກໍຕາມ, ຄຽງຄູ່ກັບຈຸດດີ ກໍມີບາງຂໍ້ຫຍຸ້ງຍາກ ຍ້ອນຂັ້ນຕອນອະນຸຍາດບາງໜ້າວຽກຂອງໂຄງການຍັງມີຫລາຍຂັ້ນຕອນ ແລະ ຫລ້າຊ້າ, ລວມທັງທິດທາງໃນການແກ້ໄຂບັນຫາດັ່ງກ່າວຍັງບໍ່ທັນໄດ້ດີເທົ່າທີ່ຄວນ ແລະ ຫວັງວ່າຈະໄດ້ຮັບການສະ ໜັບສະໜູນ ແລະ ອຳນວຍຄວາມສະ ດວກເພີ່ມເຕີມຫຼາຍຂຶ້ນຈາກພາກລັດໃນດ້ານນີ້. ນອກຈາກນີ້ ແມ່ນບັນຫາແຮງງານ ເນື່ອງຈາກການວ່າຈ້າງຮັບສະໝັກພະນັກ ງານໃນປະເທດລາວພົບຄວາມຫຍຸ້ງຍາກສົມຄວນ ເນື່ອງຈາກທາງໂຄງການ ມີນະໂຍ ບາຍໃນການເຝິກອົບຮົມ ແລະ ສອນວຽກໃຫ້ພະນັກງານທີ່ເປັນຄົນທ້ອງຖິ່ນຫຼາຍກວ່າທີ່ການວ່າຈ້າງແຮງງານຈາກຕ່າງປະເທດ.
ສໍາລັບໂຄງການພັດທະນາເສດຖະກິດພິເສດໃໝ່ ສີທັນດອນແມ່ນໃຊ້ເວລາ 50 ປີ, ເລີ່ມແຕ່ມື້ເຊັນສັນຍາໂຄງການໃນປີ 2018 ເປັນຕົ້ນໄປ, ໃນນີ້ ໄລຍະກໍ່ສ້າງພື້ນ ຖານໂຄງລ່າງ 33 ປີ ໂດຍແບ່ງເປັນ 6 ໄລຍະ ຄື:
– ໄລຍະທີ 1 ໃຊ້ເວລາ 8 ປີ (2018-2025)
– ໄລຍະທີ 2: ໃຊ້ເວລາ 5 ປີ (ປີ 2026-2030)
– ໄລຍະທີ 3 : ໃຊ້ເວລາ 5 ປີ (ປີ 2031-2035)
– ໄລຍະທີ 4: ໃຊ້ເວລາ 5 ປີ (ປີ 2036-2040)
– ໄລຍະທີ 5: ໃຊ້ເວລາ 5 ປີ (ປີ 2041-2045)
– ໄລຍະທີ 6: ໃຊ້ເວລາ 5 ປີ (ປີ 2046- 2050)
