ON AIR

ຟັງວິທະຍຸ FM103.7Mhz ອອນລາຍ
Listen to Radio FM103.7Mhz Online

ຄວາມຝັນອັນຍິ່ງໃຫຍ່ຂອງ “ຈີນຍຸກໃໝ່” ພາຍໃຕ້ການນຳພາຂອງທ່ານ ສີ ຈີ້ນຜິງ

ໃນເດືອນ ຕຸລາ 2017 ທີ່ຜ່ານມາ, ທ່ານ ສີ ຈີ້ນຜິງ ໄດ້ຮັບການເລືອກຕັ້ງເປັນປະທານປະເທດ ຂອງ ສປ ຈີນ ເປັນສະໄໝທີ່ 2 ດ້ວຍຄະແນນສຽງສູງເຖິງ 2.962 ຄະແນນ ຈາກຜູ້ເຂົ້າຮ່ວມທັງໝົດ 2980 ສະຫາຍ ແລະ ມີ 18 ສະຫາຍທີ່ບໍ່ໄດ້ເຂົ້າຮ່ວມ. ພາຍຫຼັງທີ່ທ່ານໄດ້ຮັບຕຳແໜ່ງກໍໄດ້ໃຫ້ສັດຈະປະຕິຍານຕົນໃນກອງປະຊຸມຄັ້ງທີ່ 1 ຂອງສະພາປະຊາຊົນແຫ່ງ ສປ ຈີນ ສະໄໝທີ່ 13 ທີ່ໄດ້ຈັດຂຶ້ນທີ່ນະຄອນຫຼວງປັກກິ່ງ ໃນຊ່ວງກາງເດືອນ ມີນາ 2018 ທີ່ຜ່ານມາວ່າ: ທ່ານຈະປະຕິບັດໜ້າທີ່ຮັບຜິດຊອບຕາມທີ່ລັດຖະທຳມະນູນກຳນົດໄວ້ຢ່າງຊື່ສັດຕະຫຼອດໄປ, ຈະຮັບໃຊ້ປະຊາຊົນ ແລະ ພ້ອມທີ່ຈະຮັບການຕຳນິຕິຊົມຈາກປະຊາຊົນ. ທ່ານຍັງໄດ້ກ່າວເນັ້ນອີກວ່າ: ສັງຄົມນິຍົມທີ່ມີສີສັນພິເສດຂອງຈີນໃນຍຸກໃໝ່ ແມ່ນຂຶ້ນກັບປະຊາຊົນຈີນທຸກຄົນ ພຽງແຕ່ປະຊາຊົນສາມັກຄີປອງດອງ ແລະ ສູ້ຊົນຮ່ວມກັນ ຈະບໍ່ມີກຳລັງປໍລະປັກໃດໆເຂົ້າມາແຊກແຊງ ເພື່ອສ້າງຄວາມວຸ້ນວາຍໄດ້.

​ໃນ 5 ປີ ຜ່ານມາ​ພັກ​ກອມ​ມູນິດ​ຈີນ ໄດ້​ປະສົມປະສານ​ລະຫວ່າງ​ທິດ​ສະ​ດີ ​ແລະ ພາກ​ປະຕິບັດ​ຕົວ​ຈິງໃນ​ການຄົ້ນຄວ້າ​ແນວ​ຄວາມຄິດ ​ພ້ອມທັງວາງຍຸດ​ທະ​ສາດຂອງ​​ລະບອບ​ສັງຄົມ​ນິຍົມ​ຂອງ​ ສປ ຈີນ ​ໃຫ້​ແທດເໝາະ​ກັບ​ສະພາບ​ການ​ຕົວ​ຈິງ, ສອດຄ່ອງ​ກັບ​ພາວະ​ວິ​ໄສ, ​ໄປ​ຕາມ​ກົດ​ເກນ​ການ​ຂະຫຍາຍຕົວ​ຂອງ​ລະບອບ​ສັງຄົມ​ນິຍົມ​ໃນ​ຍຸກ​ສະ​ໄໝໃໝ່​ໃຫ້​ມີ​ຄວາມ​ສົມບູນ​ແບບທີ່ສຸດ. ພັກ​ກອມ​ມູນິດ​ຈີນ ​ໄດ້​ພິສູດ​ຕົວ​ເອງ​​ແລ້ວວ່າ ສາມາດເປັນ​ແວ່ນ​ແຍງ​ໃຫ້​ແກ່​ສັງຄົມ​ຈີນໄດ້, ​ເປັນ​ແບບຢ່າງ​ໃນ​ການ​​ນໍາພາ​, ​ສະ​​ແດງ​ໃຫ້​ມວນ​ຊົນ​ເຫັນ​ໄດ້​ເຖິງ ພຶດຕິ​ກໍາ​ຂອງ​ພັກທີ່​ເຕັມ​ໄປ​ດ້ວຍ​ຄວາມ​ໂປ່​ງ​ໃສ​ຂາວສະອາດ, ມີ​ລະບຽບວິ​ໄນ, ມີ​ປະຊາທິປະ​ໄຕ, ​ຮັບປະກັນ​ເຖິງ​ແກ່ນ​​ແທ້​ໃນ​ການ​ພັດທະນາ​ຕົນ​ເອງ, ສືບຕໍ່ລົງ​ເລິກ​ການ​ປະຕິ​ຮູບ ​ແລະ ​ເປີດ​ປະຕູ​ສູ່​ໂລກ​ພາຍ​ນອກ ​ຕາມ​ແນວທາງ​ຂອງ​ພັກ ​ເພື່ອ​ບັນລຸ​ເປົ້າຫມາຍ ​ຫັນເປັນທັນ​ສະໄໝເທື່ອ​ລະ​ກ້າວ.

ຍ້ອນການນຳພາທີ່ດີ ບວກກັບການທີ່ມີແບບແຜນການປະຕິບັດຢ່າງເປັນຮູບປະທຳ ເຮັດໃຫ້ການພັດທະນາເສດຖະກິດຂອງຈີນໄດ້ຮັບການພັດທະນາຢ່າງບໍ່ຢຸດຢັ້ງ, ພື້ນຖານໂຄງລ່າງທາງເສດຖະກິດໄດ້ຮັບການປັບປຸງໃຫ້ສູງຂຶ້ນ, ຊີວິດ ແລະ ການເປັນຢູ່ຂອງປະຊາຊົນດີຂຶ້ນ, ປະຊາຊົນທີ່ມີລາຍຮັບປານກາງແມ່ນເພີ່ມຂຶ້ນ, ເຫັນໄດ້ວ່າໃນໄລຍະ 5 ປີຜ່ານມາ ໂຄງການຊ່ວຍເຫຼືອຄົນທຸກຍາກໃນຈີນແມ່ນໄດ້ຮັບຜົນສຳເລັດ ສາມາດຫຼຸດຜ່ອນລະດັບຄວາມທຸກຍາກຈາກ 12% ມາເປັນ 4%, ເຊິ່ງ​ເປັນ​ຕ່ອງ​ໂສ້​ເຮັດ​ໃຫ້ອັດຕາການ​ບໍລິ​ໂພ​ກພາຍ​ໃນ​ປະ​ເທດເພີ່ມຂຶ້ນ ສືບຕໍ່​ເປັນ​ແຮງ​ຊຸກຍູ້​ເສດຖະກິດ​ຂະຫຍາຍຕົວ​ຢ່າງ​ແຂງ​ແຮງ, ​ເປັນ​ພື້ນຖານ​ອັນ​ໜັກແໜ້ນໃຫ້​ແກ່ຈັງຫວະການ​ຂະຫຍາຍ​ໂຕ​ທາງ​ດ້ານ​ເສດຖະ ກິດ ​ຂອງ​ ສປ ຈີນ ຢືນ​ຢູ່​ໃນ​ແຖວ​ໜ້າ​ຂອງ​ໂລກ ທາງ​ດ້ານ​ປະລິມານ ​ແລະ ຄຸນ​ນະພາ​ບ, ​ເປັນ​ແຮງ​ກະຕຸກ​ຊຸກຍູ້​ຍົກ​ສູງ​ຜະລິດຕະພັນ​ລວມຍອດ (GDP) ເພີ່ມຂຶ້ນເປັນ 80 ລ້ານລ້ານຢວນ ກ້າວ​ຂຶ້ນ​ເປັນອັນ​ດັບ​ສອງ​ຂອງ​ໂລກ ກາຍ​ເປັນບາດກ້າວໜັກແໜ້ນ ປະກອບສ່ວນ​ຕໍ່ການຂະຫຍາຍ​ໂຕ​ຂອງ​ເສດຖະກິດ​ໂລກ​ເຖິງ 30% ຕັ້ງແຕ່ປີ 2013-2016 ໂດຍໂຄງສ້າງເສດຖະກິດຈີນໄດ້ປ່ຽນຜ່ານເຂົ້າສູ່ຍຸກທີ່ເດີນໜ້າດ້ວຍນະວັດຕະກຳທີ່ທັນສະໄໝ ມີອຸດສາຫະກຳເກີດໃໝ່ທີ່ສຳຄັນຄື ເສດຖະກິດດິຈີຕອນ ແລະ ຜົນງານທາງດ້ານເຕັກໂນໂລຍີທີ່ທັນສະໄໝເຊັ່ນ: ລົດໄຟຄວາມໄວສູງ, ໂດຣນ (Drone) ສົ່ງສິນຄ້າ, ລົດຍົນໃຊ້ພະລັງງານໄຟຟ້າເປັນຕົ້ນ. ​ແນວ​ໃດ​ກໍ​ດີ, ສປ ຈີນ  ​ແມ່ນ​ຍັງ​ຢູ່​ໃນ​ຂັ້ນຕອນ​ຂອງ​ການ​ສ້າງສາ​ລະບອບສັງຄົມ​ນິຍົມ ​ແລະ ​ເປັນ​ປະ​ເທດ​ທີ່​ກໍາລັງ​ພັດທະນາ​ທີ່​ໃຫຍ່ທີ່​ສຸດ​ຂອງ​ໂລກ, ຖື​ເອົາ​ການ​ພັດທະນາ ​ແລະ ການປະຕິ​ຮູບ​ເສດຖະກິດເປັນ​ແກ່ນສານ, ຮັບປະກັນ​ຫົວຄິດ​ປະດິດ​ສ້າງ​ໃຫມ່ ​ເພື່ອ​ເປັນກຳລັງແຮງອັນສຳຄັນໃນ​ການ​ສ້າງສາ​ພັດທະ​ນາ​ປະ​ເທດ​ຊາດ​ໃຫ້​ມີຄວາມ​ປອງ​ດອງ, ຄວາມ​ຈະ​ເລີ​ນຮຸ່ງ​ເຮືອງ ​ແລະ ​ເຂັ້ມ​ແຂງ​ຮອບດ້ານ.

ດ້ານວຽກງານການຕ່າງປະເທດໃນຊ່ວງໄລຍະ 5 ປີ ຜ່ານມາ ສປ ຈີນ ສາມາດປະສົບຜົນສຳເລັດໄດ້ໃນຫຼາຍດ້ານ, ເຊິ່ງເຮັດໃຫ້ ສປ ຈີນ ມີຄວາມໂດດເດັ່ນໃນເວທີພາກພື້ນ ແລະ ສາກົນ ໂດຍ​ນັບ​ແຕ່​ຂໍ້​ລິ​ເລິ່ມ “ໜຶ່ງ​ແລວໜຶ່ງ​ເສັ້ນທາງ”, ການ​ສ້າງຕັ້ງທະນາຄານ​ລົງທຶນ​ພື້ນຖານ​ໂຄງ​ລ່າງ​ອາຊີ, ກອງ​ທຶນ​ເສັ້ນທາງ​ສາຍ​ໄໝ, ​ເປັນ​ເຈົ້າພາບ​ຈັດ​ກອງ​ປະຊຸມ​ສົນທະນາ​ລະດັບ​ສູງ ໜຶ່ງ​ແລວ​ໜຶ່ງເສັ້ນທາງ ຄັ້ງປະຖົມມະ​ເລິກ, ​ເປັ​ນ​ເຈົ້າພາບ​ຈັດ​ກອງ​ປະຊຸມ​ສຸດ​ຍອດການຮ່ວມມືທາງເສດຖະກິດໃນເອເຊຍ-ປາຊີຟິກ (APEC), ກອງ​ປະຊຸມສຸດ​ຍອດ BRICS, ກອງ​ປະຊຸມ CICA (Conference on Interaction and Confidence-Building Measures in Asia), ກອງ​ປະຊຸມຈີ 20 (G-20) ​ແລະ ອື່ນໆ. ໝາກຜົນ​ຂອງການ​ເຄື່ອນ​ໄຫວ​ດັ່ງກ່າວ ລ້ວນ​ແລ້ວ​ແຕ່​​ສະ​ແດງ​ໃຫ້​ເຫັນ​ເຖິງຄວາມ​ສະຫຼາດ​ສ່ອງ​ໃສ​ດ້ານ​ການ​ທູດ​ຂອງ​ຈີນທີ່​​ໄດ້​ອອກ​ເຫື່ອ​​ເທແຮງ​ປະກອບສ່ວນ​ຕໍ່ການ​ພັດທະນາ, ຕໍ່ສັນຕິພາບ ​ແລະ ສະຖຽນລະ​ພາບ​ໃນ​ໂລກ.

​ເພື່ອ​ບັນລຸ​ເປົ້າໝາຍ ​ສ້າງ​ລະບອບ​ສັງຄົມ​ນິຍົມອີ່ມ​ໜໍາ​ສໍາລານ​ຢ່າງຮອບດ້ານ, ສະຫາຍ​ເລຂາທິການ​ໃຫຍ່ ສີ ຈິ້ນ ຜິ​ງ ​ໄດ້​ສະ​ເໜີ​ແຜນ​ວາດ​ໃນ​ການ​ພັດທະນາ​ປະ​ເທດ​ຊາດ ​ໃຫ້​ໄດ້​ຕາມ​ເປົ້າໝາຍ 100 ປີ ​ສອງ​ເຫດການ​ດັ່ງນີ້: ​ໄລຍະ​ທີ​ 1 ​ແຕ່​ປີ 2020 ​ເຖິງ 2035 ​ເປັນ​ໄລຍະ​ການ​ສ້າງ​ພື້ນຖານ​ຂອງ​ລະບອບ​ສັງຄົມ​ນິຍົມ​ອີ່ມ​ໜໍາ​ສໍາລານ​ຢ່າງຮອບດ້ານ,​ ຖື​ເປັນ​ປີ​ແຫ່ງ​ການ​ສ້າງ​ພື້ນຖານ​ຂອງ​ລະບອບ​ສັງຄົມ​ນິຍົມ​ ໂດຍ​ຍຶດໝັ້ນມະຕິ​ຄໍາ​ສັ່ງ​ຂອງ​ກອງ​ປະຊຸມ​ໃຫຍ່​ຄັ້ງທີ 16, 17 ​ແລະ 18 ​ເປັນ​ເຂັມທິດ​ຊີ້​ນໍາ​ຕໍ່ກັບ​ວຽກ​ງານ​ກໍ່ສ້າງ​ການ​ເມືອງ, ​ເສດຖະກິດ, ວັດທະນະ​ທໍາ, ສັງຄົມ. ​ໄລຍະ​ທີ 2 ​ແມ່ນ​ແຕ່​ປີ 2035 ​ເຖິງ 2050 ​ເປັນ​ໄລຍະ​ສ້າງ​ພື້ນຖານ​ການ​ຫັນ​ເປັນຄວາມ​ທັນ​ສະ​ໄໝ ​ທາງ​ດ້ານ​ວຽກ​ງານ​ການ​ເມືອງ, ເສດຖະ ກິດ, ວັດຖຸ-ຈິດໃຈ, ວັດທະນະ​ທໍາ-ສັງຄົມ ​ແລະ ອື່ນໆ. ລັດຖະບານຂອງ ສປ ຈີນ ມີອຸດົມການຢ່າງຈະແຈ້ງເພື່ອຈະນຳພາປະເທດຈີນໄປສູ່ປະເທດສັງຄົມນິຍົມສະໄໝໃໝ່ທີ່ຈະເລີນຮຸ່ງເຮືອງ ເຂັ້ມແຂງ ແລະ ມີການພັດທະນາຢ່າງຕໍ່ເນື່ອງ ໂດຍການປະຕິຮູບເສດຖະກິດໃຫ້ມີຄວາມເລິກເຊິ່ງ ແລະ ສົມບູນ ພ້ອມປັບໃຊ້ແນວຄິດໃໝ່ໆ ເພື່ອການພັດທະນາ, ການກຳນົດນະໂຍບາຍທີ່ໃຫ້ຄວາມສຳຄັນໃນການຍົກລະດັບຄຸນນະພາບຊີວິດ ຂອງປະຊາຊົນຊາວຈີນ ແລະ ການອານຸລັກສິ່ງແວດລ້ອມ ເພື່ອໃຫ້ທຳມະຊາດກັບມະນຸດຢູ່ຮ່ວມກັນໄດ້ໂດຍສັນຕິ ແລະ ການຂະຫຍາຍບົດບາດຂອງຈີນໃນເວທີໂລກພາຍໃຕ້ວິໄສທັດສະໜັບສະໜູນການສ້າງອານະຄົດຮ່ວມກັນຂອງມະນຸດຊາດ ຖືເອົາການບໍລິຫານລວມເຂົ້າສູ່ສູນກາງ ໂດຍໃຫ້ອຳນາດການຕັດສິນບັນຫາຂຶ້ນກັບພັກກອມມູນິດ ທີ່ສາມາດນຳໃຊ້ຂໍ້ກົດໝາຍ ແລະ ການຄຸ້ມຄອງໜ່ວຍງານຕ່າງໆ ເພື່ອເປັນການສະແດງຈຸດຢືນຂອງນະໂຍບາຍ “ໜຶ່ງປະເທດສອງລະບົບ” ເຊິ່ງໝາຍເຖິງຈີນແຜ່ນດິນໃຫຍ່ ແລະ ເຂດປົກຄອງພິເສດຮ່ອງກົງ ແລະ ມາເກົາ ແລະ “ຫຼັກການຈີນດຽວ” ລະຫວ່າງ ຈີນ ກັບ ໄຕ້ຫວັນ.

ໃນຕໍ່ໜ້າທ່ານ ສີ ຈີ້ນຜິງ ຍັງ​ໄດ້​ເນັ້ນ​ເຖິງ​ການ​ຍຶດໝັ້ນຮັບປະກັນ​ການ​ນໍາພາ​ຂອງ​ພັກ  ກອມ​ມູນິດ​ຈີນ​ໃນ​ທຸກ​ວຽກງານ, ສ້າງ​ຄວາມ​ເຂັ້ມ​ແຂງ​ທາງ​ດ້ານ​ແນ​ວຄິດ​ການ​ເມືອງ, ຍຶດໝັ້ນການ​ນໍາພາ​ຂອງ​ພັກ, ຕິດ​ແທດ​ກັບ​ມະຫາຊົນ, ຍົກ​ສູງ​ທິດ​ສະ​ດີ​ມາກ ​ເປັນ​ເຂັມທິດ​ຊີ້ນໍາ​ວຽກ​ງານ​ແນວ​ຄິດ​ການ​ເມືອງ, ຖື​ເອົາ​ແນວ​ຄິດ​ສ້າງສາ​ລະບອບ​ສັງຄົມ​ນິຍົມ ຕາມ​ສີສັນ​ຂອງ​ຈີນ​ໃນ​ຍຸກ​ສະ​ໄໝໃໝ່ ​ເປັນ​ກໍາລັງປະກອບ​ອາວຸດ​ໃຫ້​ສະມາຊິກ​ພັກ ​ເຂົ້າ​ໃຈ​ເຖິງ​ພາລະກິດ​ໃນ​ການ​ສ້າງສາ​ພັດທະນາ​ປະ​ເທດ​ຊາດ ຕາມ​ລະບອບ​ສັງຄົມ​ນິຍົມ​ທີ່​ມີ​ສີສັນ​ແບບ​ຈີນ, ເອົາ​ໃຈ​ໃສ່​ຍົກ​ສູງ​ຊີວິດ​ການ​ເປັນ​ຢູ່​ຂອງ​ປະຊາຊົນ, ຮັບປະກັນ​ວຽກງານ​ຄວາມ​ໝັ້ນຄົງ​ແຫ່ງ​ຊາດ ຕິດ​ພັນ​ກັບ​ການ​ຮັກສາ​ຜົນ​ປະ​ໂຫຍ​ດຂອງ​ຊາດ ໂດຍທ່ານຍັງຄົງສືບຕໍ່ປາບປາມການສໍ້ລາດບັງຫຼວງທີ່ທ່ານໄດ້ປະຕິບັດມາຕະຫຼອດຊ່ວງໄລຍະກວ່າ 5 ປີຜ່ານມາ ເຊິ່ງມີການລົົງໂທດມາແລ້ວຫຼາຍກວ່າ 1.3 ລ້ານຄົນ. ທາງດ້ານນະໂຍບາຍການຕ່າງປະເທດ ທ່ານ ສີ ຈີ້ນຜິງ ໄດ້ຍ້ຳວ່າ “ຈີນຈະບໍ່ຍອມຖືກເອົາປຽບ ແລະ ຈະຕໍ່ຕ້ານການແຊກແຊງການເມືອງພາຍໃນຂອງຈີນຈາກຕ່າງປະເທດ ລວມເຖິງຕໍ່ຕ້ານປະເທດທີ່ຫວັງທຳລາຍສັງຄົມນິຍົມໃຫ້ອ່ອນແອລົງ”. ປະຈຸບັນ ສປ ຈີນ ພ້ອມທີ່ຈະຮ່ວມມືກັບປະເທດຕ່າງໆໃນໂລກ ໂດຍສືບຕໍ່ຊຸກຍູ້ໂຄງການ “ໜຶ່ງແລວໜຶ່ງເສັ້ນທາງ” ເຊິ່ງເປັນໂຄງການທີ່ສົ່ງເສີມການເປີດປະເທດ ເພື່ອຮ່ວມມືທາງດ້ານການຄ້າ ແລະ ການລົງທຶນກັບຕ່າງປະເທດ. ສປ ຈີນ ຍັງຈະເດີນໜ້າສືບຕໍ່ພາລະກິດດັ່ງກ່າວ ແລະ ກຽມດັດແກ້ກົດໝາຍກີດກັ້ນທາງດ້ານການຄ້າ, ສະໜັບສະໜູນການພັດທະນາຂອງບໍລິສັດເອກະຊົນ  ພ້ອມຫຼຸດຜ່ອນບາງມາດຕະການການນຳເຂົ້າ ແລະ ບໍລິການ. ນອກນັ້ນ, ສປ ຈີນ ຍັງໄດ້ຊຸກຍູ້ນະວັດຕະກຳທີ່ທັນສະໄໝພາຍໃຕ້ແຜນ “Made in China 2025” ໂດຍຕັ້ງແຕ່ປີ 2025 ຈີນມີແຜນການທີ່ຈະຍົກລະດັບຂະແໜງການອຸດສາຫະກໍາຂອງປະເທດທັງໝົດໃຫ້ເປັນອຸດສາຫະກຳທັນສະໄໝ ໂດຍການສະໜັບສະໜູນນະໂຍບາຍ ແລະ ການເງິນ, ການອອກກົດໝາຍຄຸ້ມຄອງ ການຈັດຕັ້ງສະຖາບັນວິທະຍາສາດ ແລະ ເຕັກໂນໂລຍີ, ພ້ອມການສະໜັບສະໜູນເງິນທຶນເພື່ອການວິໄຈ ແລະ ພັດທະນາເຕັກໂນໂລຢີຢ່າງຕໍ່ເນື່ອງ. ທາງດ້ານເສດຖະກິດ ທ່ານ ສີ ຈີ້ນຜິງ ໄດ້ເນັ້ນເຖິງການຂະຫຍາຍຕົວຢ່າງມີຄຸນນະພາບ ໃຫ້ມີຄວາມທົ່ວເຖິງ ແລະ ເທົ່າທຽມ ທັງພາຍໃນຕົວເມືອງກັບຊົນນະບົດ, ເລັ່ງການປະຕິຮູບການບໍລິຫານເຂດຕົວເມືອງ ແລະ ຊົນນະບົດໃຫ້ມີຄວາມສົມບູນຍິ່ງຂຶ້ນ, ສະໜັບສະໜູນ ແລະ ສົ່ງເສີມກະສິກຳທັນສະໄໝ ພ້ອມຊຸກຍູ້ການສ້າງທຸລະກິດສ່ວນຕົວທີ່ສາມາດເພີ່ງພາຕົນເອງໄດ້ໃນເຂດຊົນນະບົດ ເພື່ອເປັນການແກ້ໄຂບັນຫາຄວາມທຸກຍາກຢ່າງແທ້ຈິງ. ນອກຈາກນີ້, ຈີນຍັງຍົກໃຫ້ເຫັນເຖິງລະດັບຄວາມສຳຄັນຂອງການສຶກສາເປັນອັນດັບໜຶ່ງ ພ້ອມປັບປຸງລະບົບການສຶກສາໃຫ້ມີແບບແຜນດຽວກັນທົ່ວປະ ເທດ ແລະ ສ້າງແຮງງານໃຫ້ມີລະດັບຄວາມຮູ້ໃນລະດັບອຸດົມສຶກສາໃຫ້ຫຼາຍຂຶ້ນ, ພ້ອມກັນນີ້ຍັງຮີບຮ້ອນໃນການປັບປຸງລະບົບສາທາລະນະສຸກ ແລະ ການຮັກສາພະຍາບານຂັ້ນພື້ນຖານໃຫ້ມີຄຸນນະພາບທີ່ສູງຂຶ້ນ ເພື່ອກຽມພ້ອມຮັບມືກັບສັງຄົມຜູ້ສູງອາຍຸ, ໂດຍທ່ານ ສີ ຈີ້ນຜິງ ໄດ້ກ່າວວ່າ ຈີນຈະຕ້ອງໄດ້ບັນລຸການເປັນປະເທດສັງຄົມນິຍົມທີ່ພໍກິນພໍໃຊ້ໃນປີ 2020 ເປັນສັງຄົມນິຍົມທີ່ທັນສະໄໝໃນປີ 2035 ແລະ ເປັນປະເທດທີ່ມີອິດທິພົນພາຍໃນປີ 2050.

ເນື່ອງໃນໂອກາດທີ່ ທ່ານ ສີ ຈີ້ນຜິງ ໄດ້ຮັບການເລືອກຕັ້ງ ຈາກກອງປະຊຸມຄົບຄະນະຄັ້ງທີ່ 1 ຂອງສະພາຜູ້ແທນປະຊາຊົນທົ່ວປະເທດສະໄໝທີ XIII ແຫ່ງສາທາລະນະລັດປະຊາຊົນຈີນ ໃຫ້ດໍາລົງຕໍາແໜ່ງເປັນປະທານປະເທດ ແຫ່ງສາທາລະນະລັດປະຊາຊົນຈີນອີກວາລະໜຶ່ງແບບບໍ່ມີກຳນົດ ນີ້ແມ່ນເປັນການສະແດງເຖິງຄວາມໄວ້ເນື້ອເຊື່ອໃຈ ແລະ ການຕີລາຄາສູງຂອງພັກ-ລັດ ແລະ ປະຊາຊົນຈີນຕໍ່ບົດບາດ ແລະ ຄວາມສາມາດໃນການຊີ້ນຳນຳພາທີ່ເຕັມໄປດ້ວຍປະສົບການອັນສູງສົ່ງ ແລະ ຜົນງານອັນໂດດເດັ່ນຂອງ ທ່ານ ສີ ຈີ້ນຜິງ ໃນພາລະກິດສ້າງສາພັດທະນາປະເທດຈີນ ຕາມທິດທາງ ແລະ ສີສັນພິເສດຂອງພັກກອມມູນິດຈີນໄດ້ວາງອອກ. ສປປ ລາວ ເຊື່ອໝັ້ນວ່າພາຍໃຕ້ການນຳພາອັນສະຫຼາດສ່ອງໃສຂອງພັກກອມມູນິດຈີນ ທີ່ມີ ທ່ານ ສີ ຈີ້ນຜິງ ເປັນແກນນຳນັ້ນ ຈະເຮັດໃຫ້ພາລະກິດສ້າງສາປະເທດຈີນ ດ້ວຍທັດສະນະໃໝ່, ແນວຄິດໃໝ່ ແລະ ຍຸດທະສາດໃໝ່ ເພື່ອປົກຄອງລັດ-ບໍລິຫານປະເທດ ມີຄວາມເຂັ້ມແຂງຮອບດ້ານ, ເຊິ່ງຈະເຮັດໃຫ້ພາລະກິດສ້າງສາສັງຄົມນິຍົມແບບສີສັນພິເສດຂອງຈີນນັ້ນປະສົບຜົນສຳເລັດຢ່າງໃຫຍ່ຫຼວງ, ຮອບດ້ານ, ມີລັກສະນະປະຫວັດສາດ ແລະ ກາຍເປັນພື້ນຖານອັນໜັກແໜ້ນເພື່ອບັນລຸເປົ້າໝາຍແຜນພັດທະນາ 5 ປະການໃນໜຶ່ງດຽວ, ຍຸດທະສາດ 4 ຮອບດ້ານ ແລະເປົ້າໝາຍສູ້ຊົນ “100 ປີ 2 ເຫດການ” ແລະ ຄວາມຝັນຂອງຈີນໃນການຟື້ນຟູຄວາມຮຸ່ງເຮືອງສີວິໄລຂອງເຊື້ອຊາດຈີນ, ສ້າງສາປະເທດຈີນໃຫ້ເປັນປະເທດສັງຄົມນິຍົມທີ່ທັນສະໄໝ, ປະຊາຊົນຮັ່ງມີຜາສຸກ, ປະເທດຊາດມີຄວາມມັ່ງຄັ່ງເຂັ້ມແຂງ, ສັງຄົມມີຄວາມສາມັກຄີກົມກຽວປອງດອງ, ປະຊາທິປະ ໄຕ, ຍຸຕິທຳ ແລະ ສີວິໄລ ໃຫ້ປະກົດຜົນເປັນຈິງ ແລະ ຍຸດທະສາດ “ໜຶ່ງແລວໜຶ່ງເສັ້ນທາງ”, ທີ່ທ່ານໄດ້ລິເລີ່ມນັ້ນໄດ້ຮັບການສະໜັບສະໜູນຢ່າງກວ້າງຂວາງຈາກປະເທດຕ່າງໆໃນໂລກທີ່ພວມເກີດມີບັນດາກົນໄກການຮ່ວມມືໃນພາກພື້ນຕ່າງໆຢ່າງເປັນຮູບປະທຳ ແລະ ຕັ້ງໜ້າ ເພື່ອເພີ່ມທະວີບົດບາດຂອງ ສປ ຈີນ ໃຫ້ສູງເດັ່ນໃນການປະກອບສ່ວນເຂົ້າໃນການປົກປັັກຮັກສາສັນຕິພາບ ແລະ ການຮ່ວມມືເພື່ອການພັດທະນາຢູ່ໃນພາກພື້ນ ແລະ ສາກົນ.

ຂໍຂອບໃຈ

ພະແນກໂຄສະນາ ແລະ ປະຊາສໍາພັນ,
ກົມການຂ່າວ, ກະຊວງການຕ່າງປະເທດ