ON AIR

ຟັງວິທະຍຸ FM103.7Mhz ອອນລາຍ
Listen to Radio FM103.7Mhz Online

ຄວາມສຳຄັນ ແລະ ການຂະຫຍາຍຕົວຂອງວຽກງານກົງສຸນໃນໄລຍະໃໝ່

ໃນ​ໄລຍະ​ແຫ່ງ​ການ​ປະຕິບັດ​ສອງ​ໜ້າ​ທີ່​ຍຸດ​ທະ​ສາດ​ ຄື: ປົກ​ປັກຮັກສາ ​ແລະ ພັດທະນາ​ປະ​ເທດ​ຊາດ ຕາມ​ແນວ ທາງ​ຂອງ​ພັກ, ​ໂດຍ​ສະ​ເພ​າະ​ແນວທາງ​ການ​ຕ່າງປະ​ເທ​ດ ໃນການ​ເປີດ​ກວ້າງ​ການ​ພົວພັນ​ຮ່ວມ​ມື​ກັບ​ຕ່າງປະ​ເທດ ພາຍໃຕ້ເງື່ອນໄຂແຫ່ງການເຊື່ອມໂຍງໃນພາກພື້ນ ແລະ ສາກົນ   ທີ່ມີທັງກາລະໂອກາດ ແລະ ສິ່ງທ້າທາຍຢ່າງຫຼວງຫຼາຍນີ້, ວຽກງານກົງສຸນ ເປັນໜຶ່ງໃນວຽກທີ່ມີຄວາມສຳຄັນ ແລະ ພົວພັນ​ຢ່າງ​ສະໜິດ​ແໜ້ນ​ຕໍ່ຜົນຂອງການປະຕິບັດສອງໜ້າທີ່ຍຸດທະສາດ ທີ່​ທົ່ວ​ພັກ, ທົ່ວ​ລັດ ​ແລະ ທົ່ວ​ປວງ​ຊົນລາວສຸມ​ໃສ່​ຈັດ​ຕັ້ງ​ປະຕິບັດ​ໃນ​ປະຈຸ​ບັນ​ນີ້.

ກົມກົງສຸນ, ກະຊວງການຕ່າງປະເທດ ໃນ​ຖານະເປັນສ່ວນ​ໜຶ່ງ​ຂອງໂຄງປະກອບຂອງກົງຈັກກະຊວງການຕ່າງ ປະເທດ, ຊຶ່ງ​ກຳນົດ​ໃນດຳລັດວ່າດ້ວຍການຈັດຕັ້ງ ແລະ ເຄື່ອນໄຫວຂອງກະຊວງການຕ່າງປະເທດ, ສະບັບເລກທີ  199/ນຍ, ລົງວັນທີ 30 ມິຖຸນາ 2017, ມີໜ້າທີ່​ເປັນ​ເສນາ​ທິການ​ດ້ານ​ວຽກ​ງານ​ກົງສຸ​ນໃຫ້​ແກ່​ພັກ ​ແລະ ລັດຖະບານ ຢ່າງຮອບດ້ານ ບົນ​ພື້ນຖານລະບຽບ​ ກົດໝາຍ​ພາຍໃນທີ່​ກ່ຽວຂ້ອງ ​ກໍ​ຄືສັນຍາ ​ແລະ ສົນທິສັນຍາ​ສາກົນ ທີ່ ສປປ ລາວ ​ເປັນ​ພາຄີ, ​ໂດຍ​ສະ​ເພາະ ​ສົນທິສັນຍາແຫ່ງກຸງວຽນ ວ່າດ້ວຍການພົວພັນທາງການກົງສຸນ ປີ 1963.

​ເພື່ອ​ເຮັດ​ສຳ​ເລັດ​ໜ້າ​ທີ່ໆ​ສໍາຄັນ​ດັ່ງກ່າວ, ຕະຫຼອດ​ໄລຍະ​ຜ່ານ​ມາ​ນັ້ນ, ກົນ​ໄກ ​ແລະ ລະບຽບ​ການ​ຕ່າງໆທີ່​ພົວ ພັນ​ກັບວຽກ​ງານ​ກົງສຸນ ​ໄດ້​ຮັບ​ການ​ປັບປຸງ​ຢ່າງຕໍ່ເນື່ອງ ​ເພື່ອ​​ໃຫ້​ສອດຄ່ອງ ​ແລະ ສາມາດ​ຕອບ​ສະໜອງ​ກັບ​ຄວາມ​ຮຽກ ຮ້ອງ​ຕ້ອງ​ໃນ​ການຈັດ​ຕັ້ງ​ຜັນ​ຂະຫຍາຍ​ແນວທາງ​ການ​ຕ່າງປະ​ເທດໃນ​ສະພາບ​ການ​ໃໝ່​, ຊຶ່ງ​ນັບແຕ່ປີ 2016 ເປັນຕົ້ນມາ, ວຽກງານກົງສຸນໄດ້ມີ​ຜົນສຳ​ເລັດ​ອັນ​ໃໝ່​ທີ່​ສຳຄັນ​ຫຼາຍ​ດ້ານ, ຊຶ່ງສາມາດສັງລວມໂດຍຫຍໍ້​ແຕ່​ລະ​ດ້ານດັ່ງນີ້:

–  ດ້ານການສ້າງຕັ້ງສະຖານກົງສຸນໃຫຍ່ ແລະ ກົງສຸນກິດຕິມະສັກ ແຫ່ງ ສປປ ລາວ ທີ່ຕ່າງປະເທດ, ເພື່ອສົ່ງເສີມການພົວພັນຮ່ວມມືສອງຝ່າຍເວົ້າລວມ ເວົ້າສະເພາະແມ່ນວຽກງານກົງສຸນ ກັບບັນດາປະເທດເພື່ອນມິດ ບົນພື້ນຖານນະໂຍ ບາຍການຕ່າງປະເທດ ສັນຕິພາບ, ເອກະລາດ, ມິດຕະພາບ ແລະ ການຮ່ວມມື ຕ່າງຝ່າຍຕ່າງໄດ້ຮັບຜົນປະໂຫຍດ ໃນເງື່ອນໄຂອັນໃໝ່. ວຽກງານກົງສຸນ ໄດ້ຮັບການຂະຫຍາຍຕົວຢ່າງຕັ້ງໜ້າ, ໃນໄລຍະ 3 ປີຜ່ານມາ ສາມາດສ້າງຕັ້ງ ​ແລະ ​ເປີດສະຖານກົງສຸນໃຫຍ່ ແຫ່ງ ສປປ ລາວ ຕື່ມອີກ ຈຳນວນ 2 ແຫ່ງ ຄື: ສະຖານກົງສຸນໃຫຍ່ແຫ່ງ ສປປ ລາວ ທີ່ແຂວງຊຽງແຕງ, ຣາຊະອານາຈັກກຳປູເຈຍ ແລະ ສະຖານກົງສຸນໃຫຍ່ແຫ່ງ ສປປ ລາວ ທີ່ນະຄອນຊາງຊາ, ແຂວງຫູໜານ, ສປ ຈີນ. ນອກນີ້, ຍັງໄດ້ເຮັດໜ້າທີ່ຄົ້ນຄວ້າການແຕ່ງຕັ້ງ ແລະ ແຕ່ງຕັ້ງປ່ຽນແທນ ບັນດາກົງສຸນກິດຕິມະສັກແຫ່ງ ສປປ ລາວ ປະຈຳຕ່າງປະເທດ ແລະ ຂອງຕ່າງປະເທດປະຈຳ ສປປ ລາວ, ຊຶ່ງໃນໄລຍະສາມປີມານີ້ ສາມາດແຕ່ງຕັ້ງກົງສຸນກິດຕິມະສັກຂອງ ສປປ ລາວ ປະຈຳຢູ່ຕ່າງປະເທດເພີ່ມອີກຈຳນວນ 3 ແຫ່ງ ຄື: ທີ່ຮອກໄກໂດ (Hokkaido) ປະເທດ ຍີ່ປຸ່ນ, ທີ່ບຼາຕິສລາວາ (Bratislava) ປະເທດ ສະໂລວັກ ແລະ ທີ່ແອນຕານານາຣີໂວ (Antananarivo) ປະເທດມາດາກາສກາ ແລະ ອະນຸຍາດໃຫ້ປະເທດເພື່ອນມິດສ້າງຕັ້ງກົງສຸນກິດຕິມະສັກຂອງຕົນປະຈຳ ສປປ ລາວ ຈຳນວນ  6 ກົງສຸນກິດຕິມະສັກຄື: ກົງສຸນກິດມະສັກຂອງ ມາຣົກ, ຊູແອັດ, ສີລັງກາ, ສະໂລວັກ, ປອກຕຸຍການ ແລະ ເນປານ ທີ່ມີສຳນັກງານຕັ້ງຢູ່ນະຄອນຫຼວງວຽງຈັນ, ຊຶ່ງ​​ປະຈຸ​ບັນນີ້ ສປປ ລາວ ມີ​ສະຖານ​ກົງສຸນ​ໃຫຍ່ ປະຈຳ​ຢູ່​ຕ່າງປະ​ເທດ 10 ​ແຫ່ງ, ຫ້ອງການ​ກົງສຸນ 1 ​ແຫ່ງ ​ແລະ ກົງສຸນ​ກິດ​ຕິ​ມະ​ສັກ 12 ແຫ່ງ.

–  ດ້ານວຽກງານການອຳນວຍຄວາມສະດວກໃນການເຂົ້າ-ອອກເມືອງ, ປະຈຸບັນ, ສປປ ລາວ ໄດ້ເຊັນສັນຍາຍົກເວັ້ນວີຊາຝ່າຍດຽວ ແລະ ສອງຝ່າຍສຳລັບຜູ້ທີ່ຖືໜັງສືຜ່ານແດນການທູດ, ລັດຖະການ ແລະ ທຳມະດາ ກັບ 36 ປະເທດ ໃນນີ້ລວມເອົາ 9 ປະເທດສະມາຊິກອາຊຽນ.  ໃນໄລຍະປີ 2016 ເຖິງ 2019, ລັດຖະບານລາວໄດ້ເຊັນສັນຍາຍົກເວັ້ນວີຊາກັບ 6 ປະເທດຄື: ກຽກກິດສະຖານ (Kyrgyztan), ອາແຊກໄບຊານ (Azerbaijan), ລັດເຊຍ (Russia), ປາກິດສະຖານ (Pakistan), ນອກແວ (Norway) ແລະ ຮົງກາລີ (Hungary) ໃຫ້ແກ່ພົນລະເມືອງທີ່ຖືໜັງສືຜ່ານແດນລັດຖະການ, ການທູດ ແລະ ທຳມະດາ; ໄດ້ຄົ້ນຄວ້າ ​ແລະ ກຳນົດປະເພດວີຊາທັງໝົດ 14 ປະເພດ ເພື່ອອອກໃຫ້ແກ່ຄົນຕ່າງປະເທດທີ່ເດີນທາງເຂົ້າອອກ ສປປ ລາວ ຕາມແຕ່ລະຈຸດປະສົງ; ໃນນີ້, ໂດຍປະຕິບັດນະໂຍບາຍສົ່ງເສີມການທ່ອງທ່ຽວທີ່ເປັນທ່າແຮງຂອງ ສປປ ລາວ ເພື່ອຊຸກຍູ້ສົ່ງເສີມການ​ຂະຫຍາຍຕົວທາງດ້ານເສດຖະກິດ, ໃນປີທ່ອງທ່ຽວລາວ 2018 ລັດຖະບານໄດ້ຕົກລົງເຫັນດີໃຫ້ຍົກເວັ້ນວີຊາແກ່ພົນລະເມືອງຂອງ 4 ປະເທດ ເຂດເໜືອ ຄື: ສະວິດ, ນອກແວ, ແຟງລັງ ແລະ ດານມາກ ຕະຫຼອດປີ 2018. ວຽກງານພົ້ນເດັ່ນແມ່ນເປີດການບໍລິການລະບົບວີຊາອອນລາຍ ຫຼື eVisa ເພື່ອເພີ່ມຄວາມສະດວກສະບາຍ ແລະ ເປັນທາງເລືອກສຳລັບນັກທ່ອງທ່ຽວໃນການຂໍວີຊາເຂົ້າມາ ສປປ ລາວ, ຊຶ່ງປະຈຸບັນ ສາມາດຈັດຕັ້ງປະຕິບັດຢູ່ດ່ານສະໜາມບິນ ສາກົນວັດໄຕ, ສະໜາມບິນຫຼວງພະບາງ, ສະໜາມບິນປາກເຊ, ຂົວມິດຕະພາບລາວ-ໄທ ແຫ່ງທີ 1, ຂົວມິດຕະພາບລາວ-ໄທ ແຫ່ງທີ 2 ແລະ ຈະສືບຕໍ່ຂະຫຍາຍ​​ໄປດ່ານຂົວມິດຕະພາບລາວ-ໄທ ແຫ່ງທີ 4 ແລະ ດ່ານສາກົນບໍ່ເຕນ ​ໃຫ້​ສໍາ​ເລັດໃນ​​ເດືອນ​ ທັນວາ 2019 ​ນີ້.

–  ດ້ານວຽກງານໜັງສືຜ່ານແດນ, ເພື່ອປະກອບສ່ວນເຂົ້າໃນວຽກງານປ້ອງກັນຊາດ, ປ້ອງກັນຄວາມສະຫງົບ ແລະ ເພື່ອໃຫ້ຫັນໄປຕາມທ່າອ່ຽງລວມຂອງພາກພື້ນ ແລະ ສາກົນ, ກົມກົງສຸນ ກະຊວງການຕ່າງປະເທດໄດ້ອອກໜັງສືຜ່ານແດນເອເລັກໂທຼນິກ ຫຼື ePassport ທີ່ໄດ້ມາດຕະຖານຂອງອົງການການບິນພົນລະເຮືອນສາກົນ ຫຼື ICAO ໃຫ້ແກ່ພົນລະເມືອງລາວ. ​ໃນ​ຂະນະ​ດຽວ​ກັນ, ເພື່ອສ້າງເງື່ອນໄຂອັນ​ສະດວກໃຫ້ແກ່ພົນລະເມືອງລາວໃນຂອບເຂດທົ່ວປະເທດ ທີ່ຕ້ອງການ​ເຮັດ​ໜັງສືຜ່ານ​ແດນ, ກົມກົງສຸນ ກະຊວງການຕ່າງປະເທດໄດ້ຂະຫຍາຍສູນຮັບຄໍາຮ້ອງຂໍເຮັດໜັງສືຜ່ານແດນ​ໄປຢູ່ແຂວງ ອຸດົມໄຊ, ຊຽງຂວາງ, ໄຊຍະບູລີ, ຄຳມ່ວນ, ສະຫວັນນະເຂດ ແລະ ຈຳປາສັກ. ນອກຈາກນີ້, ລະບຽບ ​ແລະ ຂັ້ນ​ຕອນການປະກອບເອກະສານສະເໜີເຮັດໜັງສືຜ່ານແດນໄດ້ຮັບການປັບປຸງໃຫ້ມີລັກສະນະກະທັດຮັດ ແລະ ງ່າຍດາຍ ​ເພື່ອປະຢັດເວລາ ແລະ ການໃຊ້ຈ່າຍຂອງ​ປະຊາຊົນ. ພ້ອມ​ດຽວ​ກັນ​ນີ້, ແບບຟອມຄຳຮ້ອງຂໍເຮັດໜັງສືຜ່ານແດນກໍສາມາດເອົາຈາກ ເວັບໄຊຂອງກະຊວງການຕ່າງປະເທດ ຕາມທີ່ຢູ່: www.mofa.gov.la ໂດຍບໍ່ຕ້ອງເສຍຄ່າໃຊ້ຈ່າຍ.

–  ດ້ານວຽກງານນິຕິບັນຍັດ ແລະ ສັນຊາດ,  ໜຶ່ງໃນວຽກງານກົງສຸນທີ່ສຳຄັນຕາມທີ່ໄດ້ກຳນົດໄວ້ໃນສົນທິສັນຍາແຫ່ງກຸງວຽນ ວ່າດ້ວຍການພົວພັນທາງການກົງສູນ ປີ 1963 ແມ່ນການປົກປ້ອງສິດຜົນປະໂຫຍດພົນລະເມືອງຂອງຕົນຢູ່ຕ່າງປະເທດ, ປະສານສົມທົບ ແລະ ອຳນວຍຄວາມສະດວກໃນການແກ້ໄຂຄະດີ, ຂໍ້ຂັດແຍ່ງ, ແຈ້ງເຫດຕ່າງໆທີ່ເກີດຂຶ້ນກັບຄົນຕ່າງປະເທດຢູ່ໃນດິນແດນຂອງ ສປປ ລາວ ລວມເຖິງວຽກງານສັນຊາດທີ່ກະຊວງການຕ່າງປະເທດມີບົດບາດໃນການປະສານສົມທົບ ແລະ  ພິຈາລະນາຮ່ວມກັບພາກສ່ວນກ່ຽວຂ້ອງອື່ນໆ, ຊຶ່ງໃນໄລຍະຜ່ານມາການເຄື່ອນ ໄຫວວຽກງານໃນຂົງເຂດດັ່ງກ່າວນີ້ໄດ້ມີຜົນສໍາເລັດຫຼາຍສົມຄວນ.

ທັງໝົດນີ້ໄດ້ຢັ້ງຢືນຢ່າງຈະແຈ້ງເຖິງບົດບາດຄວາມສຳຄັນ ແລະ ການຂະຫຍາຍຕົວຂອງວຽກງານກົງສຸນຕາມແນວທາງການທູດປ້ອງກັນເຫດ ແລະ ບຸກທະລຸ ເພື່ອພາລະກິດປົກປັກຮັກສາ ແລະ ພັດທະນາປະເທດຊາດ ຕາມໜ້າທີ່ການເມືອງທີ່ໄດ້ຮັບມອບໝາຍຢ່າງມີປະສິດຕິພາບ.