ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ຄວາມຮູ້ສຶກຂອງຊັ້ນຄົນຕ່າງໆຕໍ່ ພັກປະຊາຊົນປະຕິວັດລາວ ບໍ່ມີຍຸກໃດ ສະໄໝໃດ ທີປະເທດຊາດເຮົາຈະມີຄວາມສະຫງົບ ແລະ ມີການພັດທະນາເໝືອນໃນຍຸກທີ່ມີ ພັກຂອງປະຊາຊົນນຳພາ ຄືທຸກມື້ນີ້

ສະຫາຍ ພົນຈັດຕະວາ ຈວງຈັນ ລາດຊະວົງ, ກຳມະການຄະນະປະຈໍາອົງຄະນະພັກແຂວງ, ເລຂາ ອົງຄະນະພັກ ແລະ ຫົວໜ້າການເມືອງກອງບັນຊາການທະຫານ ແຂວງບໍລິຄໍາໄຊ ໄດ້ສະແດງຄວາມຮູ້ສຶກຂອງຕົນຕໍ່ພັກວ່າ: ເນື່ອງໃນໂອກາດວັນສ້າງຕັ້ງພັກປະຊາຊົນປະຕິວັດລາວ ຄົບຮອບ 65 ປີ ທີ່ຈະມາເຖິງໃນມໍ່ໆນີ້, ຂ້າພະເຈົ້າຮູ້ສຶກປິຕິຊົມຊື່ນທີ່ເຫັນວ່າ: ພາຍໃຕ້ການນໍາພາທີ່ສະຫຼາດສ່ອງໃສຂອງພັກປະຊາຊົນປະຕິວັດລາວ, ປະເທດຊາດຂອງພວກເຮົາໄດ້ມີຄວາມສະຫງົບສຸກ, ເສດຖະກິດມີການຂະຫຍາຍຕົວ ແລະ ໝັ້ນທ່ຽງ, ຊີວິດການເປັນຢູ່ຂອງປະຊາຊົນໄດ້ຮັບການປັບປຸງດີຂຶ້ນ, ບ້ານ-ເມືອງໄດ້ຮັບການພັດທະນາ ແລະ ມີຄວາມສີວິໄລຂຶ້ນເລື້ອຍໆ. ດັ່ງທີ່ພວກເຮົາຮັບຮູ້ ແລະ ເຂົ້າໃຈແລ້ວວ່າ: ການກໍາເນີດຂຶ້ນ ຂອງພັກປະຊາຊົນປະຕິວັດລາວ ໃນວັນທີ 22 ມີນາ 1955 ແມ່ນບາດລ້ຽວປະຫວັດສາດທີ່ສໍາຄັນຂອງການປະຕິວັດລາວ ເພາະວ່າ ພັກໄດ້ນໍາພາປວງຊົນລາວທັງຊາດຕໍ່ສູ້ກູ້ຊາດຕ້ານການຮຸກຮານຂອງຕ່າງຊາດຈົນຍາດໄດ້ຜົນສໍາເລັດ ແລະ ສະຖາປະນາສາທາລະນະລັດປະຊາທິປະໄຕປະຊາຊົນລາວ ຂຶ້ນໃນວັນທີ 2 ທັນວາ 1975 ຢ່າງສະ ຫງ່າຜ່າເຜີຍ.
ນັບແຕ່ມື້ກໍາເນີດເປັນຕົ້ນມາ, ພັກປະຊາຊົນປະຕິວັດລາວ ຍາມໃດກໍ່ຕັ້ງໜ້າປັບປຸງກໍ່ສ້າງຕົນເອງໃຫ້ມີຄວາມປອດໃສ, ໜັກແໜ້ນ ແລະ ເຂັ້ມແຂງ ບົນພື້ນຖານການຍຶດໝັ້ນຢູ່ໃນຫຼັກການ, ຈຸດໝາຍຍຸດທະສາດ ແລະ ອຸດົມການຂອງພັກ. ພຶດຕິກໍາຂອງການປະຕິວັດຢູ່ປະເທດເຮົາໄດ້ພິສູດໃຫ້ເຫັນວ່າ: ການນໍາພາຂອງພັກ ແມ່ນມີລັກສະນະກົດເກນ, ແມ່ນປັດໄຈຕັດສິນທຸກໄຊຊະນະຂອງການປະຕິວັດລາວ. ພັກເຮົາເວລາໃດກໍ່ຍຶດໝັ້ນແນວທາງປ່ຽນແປງໃໝ່ຮອບດ້ານ ແລະ ມີຫຼັກການ, ປົກປັກຮັກສາ ແລະ ສ້າງສາພັດທະນາປະເທດຊາດຕາມທິດຍືນຍົງສູ່ຈຸດໝາຍສັງຄົມນິຍົມຢ່າງໜັກແໜ້ນ. ຕະຫຼອດໄລຍະເວລາ 65 ປີ ພາຍໃຕ້ການນໍາພາຂອງພັກ ໄດ້ສະແດງໃຫ້ ພວກເຮົາເຫັນວ່າ: ໂສມໜ້າຂອງປະເທດຊາດໄດ້ມີການປ່ຽນແປງ ຢ່າງຈະແຈ້ງ, ບໍ່ວ່າຢູ່ຕົວເມືອງ ກໍ່ຄືຢູ່ຊົນນະບົດລ້ວນແລ້ວແຕ່ມີການ ສ້າງສາພັດທະນາ; ລະບົບການເມືອງມີຄວາມເຂັ້ມແຂງ ແລະ ໜັກ ແໜ້ນ; ສັງຄົມມີຄວາມສາມັກຄີປອງດອງ, ມີຄວາມສະຫງົບສຸກ ແລະ ເປັນລະບຽບຮຽບຮ້ອຍ; ເສດຖະກິດກໍ່ຂະຫຍາຍຕົວຢ່າງຕໍ່ເນື່ອງ; ວັດທະນະທໍາ-ສັງຄົມມີ ການຫັນປ່ຽນຢ່າງຕັ້ງໜ້າ; ຊີວິດການເປັນຢູ່ທາງດ້ານວັດຖຸ ແລະ ຈິດໃຈຂອງປະຊາຊົນລາວບັນດາເຜົ່າໄດ້ຮັບການປົວແປງໃຫ້ດີຂຶ້ນກວ່າເກົ່າ; ບົດບາດອິດທິພົນຂອງປະເທດເຮົາໃນເວທີພາກພື້ນ ແລະ ສາກົນນັບມື້ນັບພົ້ນເດັ່ນຂຶ້ນ. ທັງໝົດນີ້ແມ່ນສາມາດຢັ້ງຢືນໄດ້ດ້ວຍຄວາມ ເອກອ້າງທະນົງໃຈວ່າ: ບໍ່ມີຍຸກໃດ ສະໄໝໃດທີ່ປະເທດຊາດຂອງພວກ ເຮົາຈະມີຄວາມສະຫງົບ ແລະ ໄດ້ຮັບການພັດທະນາຄືໃນຍຸກທີ່ມີພັກປະຊາຊົນປະຕິວັດລາວນໍາພາ.
ສໍາລັບຢູ່ກອງບັນຊາການທະຫານແຂວງບໍລິຄໍາໄຊ, ຄະນະພັກແຕ່ລະຂັ້ນໄດ້ເອົາໃຈໃສ່ຊີ້ນໍາ-ນໍາພາພະນັກງານ-ນັກຮົບຂອງຕົນ ແລະ ສາມາດເຮັດສໍາເລັດໜ້າທີ່ການເມືອງ ທີ່ພັກ-ລັດມອບໝາຍໃຫ້, ໂດຍສະເພາະແມ່ນຮັບປະກັນໃຫ້ທົ່ວແຂວງມີຄວາມສະຫງົບປອດໄພ, ປະຊາ ຊົນຍູ່ທ່າງທໍາມາຫາກິນ ພັດທະນາຊີວິດການເປັນຢູ່ດີຂຶ້ນເລື້ອຍໆ. ເນື່ອງໃນໂອກາດວັນທີ່ມີຄວາມໝາຍສໍາຄັນນີ້, ຕາງໜ້າຄະນະພັກ, ພະນັກງານ, ສະມາຊິກພັກ ແລະ ນັກຮົບໃນທົ່ວກອງບັນຊາການທະ ຫານແຂວງບໍລິຄໍາໄຊ, ຂໍອວຍພອນແດ່ການນໍາພັກ-ລັດ ແລະ ການນໍາກະຊວງປ້ອງກັນປະເທດ ຈົ່ງມີສຸຂະພາບແຂງແຮງ, ມີຜົນສໍາເລັດໃນໜ້າທີ່ວຽກງານ ສືບຕໍ່ຊີ້ນໍາ-ນໍາພາ ການສ້າງສາພັດທະນາປະເທດຊາດ ໃຫ້ຈະເລີນຮຸ່ງເຮືອງສີວິໄລຕາມເປົ້າໝາຍທີ່ພັກໄດ້ວາງໄວ້.