ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ຄວາມເຂົ້າໃຈກ່ຽວກັບມາດຕະການປ້ອງກັນ ແລະ ແກ້ໄຂການລະບາດ ຂອງເຊື້ອຈຸລະໂລກສາຍພັນໃໝ່ (Covid-19) ຢູ່ ສປ ຈີນ

ຄວາມເຂົ້າໃຈກ່ຽວກັບມາດຕະການປ້ອງກັນ ແລະ ແກ້ໄຂການລະບາດ

ຂອງເຊື້ອຈຸລະໂລກສາຍພັນໃໝ່ (Covid-19) ຢູ່ ສປ ຈີນ

ໂຄງການຄົ້ນຄວ້າຮ່ວມ ລາວ-ຈີນ: ສະຖາບັນການຕ່າງປະເທດ, ກະຊວງການຕ່າງປະເທດ

 

ນັບແຕ່ເຊື້ອພະຍາດ Covid-19 ໄດ້ເກີດລະບາດຄັ້ງທໍາອິດຢູ່ເມືອງອູຫັ້ນ ແຂວງຫູເປີຍ, ສປ ຈີນ ແຕ່ທ້າຍເດືອນທັນວາ 2019 ຈົນເຖິງປະຈຸບັນ ແລະ ໄດ້ແຜ່ລະບາດໄປຍັງບາງປະເທດໃນໂລກ. ເພື່ອຍັບຍັ້ງການແຜ່ລະບາດຂອງເຊື້ອໄວຣັດອັນຕະລາຍດັ່ງກ່າວ ລັດຖະບານ ສປ ຈີນ ໄດ້ໃຊ້ມາດຕະການຢ່າງເຄັ່ງຄັດ ໂດຍໄດ້ປິດເມືອງອູຫັ້ນ, ແຂວງຫູເປີຍ ທີ່ເປັນສູນກາງການແຜ່ລະບາດຂອງໂລກ ແລະ ໄດ້ມີມາດຕະການປ້ອງກັນ ແລະ ຄວບຄຸມຢ່າງເຂັ້ມງວດ ໃນຂົງ ເຂດເມືອງສໍາຄັນຕ່າງໆຂອງຈີນ ທີ່ມີປະຊາກອນອາໄສຢູ່ໜາແໜ້ນ ເຊັ່ນ: ນະຄອນຫຼວງປັກກິ່ງ, ນະຄອນຊຽງໄຮ້ ແລະ ແຂວງອື່ນໆ. ສະພາບການດັ່ງກາວ ໄດ້ເຮັດໃຫ້ສື່ສັງຄົມທັງພາຍໃນຈີນ ແລະ ຕ່າງປະເທດ ມີຄວາມສົງໄສໃນບາງບັນຫາຄື: ໜຶ່ງ, ລັດຖະບານຈີນເປັນຫຍັງ ຈຶ່ງເລືອກກັກບໍລິເວນເມືອງອູຫັ້ນ?; ສອງ, ສູນກາງ ແລະ ທ້ອງຖິ່ນ ຈະມີຄວາມສາມາດພຽງ ພໍທີ່ຈະຍັບຍັ້ງໄວຣັດນີ້ບໍ?; ສາມ, ການແຜ່ລະບາດດັ່ງກ່າວຈະມີຜົນກະທົບແນວໃດຕໍ່ເສດຖະກິດຈີນ?;  ສີ່, ປະຊາຄົມໂລກຈະຮັບມືກັບໂລກລະບາດແນວໃດ ເພື່ອຄວາມປອດໄພຂອງມວນມະນຸດ?. ຕໍ່ກັບຄໍາຖາມເຫຼົ່ານີ້ ໂຄງ ການຄົ້ນຄວ້າຮ່ວມ ລາວ-ຈີນ ກໍຄື ສະຖາບັນການຕ່າງປະເທດ ໄດ້ຄົ້ນຄວ້າ ແລະ ຕິດຕາມຢ່າງໃກ້ຊິດ, ນໍາເອກະສານຈາກສະຖາບັນຄົ້ນຄວ້າບັນຫາສາກົນຊຽງໄຮ້, ສື່ສິ່ງພິມຕ່າງໆ ມາສັງລວມ ແລະ ສາມາດສະຫຼຸບໄດ້ດັ່ງນີ້:

  1. ເປັນຫຍັງ ຈຶ່ງປິດກັ້ນການເຂົ້າ-ອອກ ຢູ່ເມືອງອູຫັ້ນ ແລະ ເຂດອື່ນໆທີ່ມີການລະບາດ?

ການປິດກັ້ນການເຂົ້າອອກ ເປັນມາດຕະການທີ່ມີປະສິດທິຜົນທີ່ສຸດໃນການຄວບຄຸມພະຍາດລະບາດ ເຖິງແມ່ນວ່າມັນອາດຈະມີຄວາມສ່ຽງ ແລະ ຜົນກະທົບອື່ນໆຫຼາຍດ້ານ ແຕ່ເຫັນວ່າຈໍາເປັນທີ່ສຸດ ເພື່ອຍັບຍັ້ງການແຜ່ລາມຂອງເຊື້ອພະຍາດ. ເນື່ອງຈາກປະຈຸບັນ, ຍັງບໍ່ທັນມີວັກຊີນ ແລະ ຢາປິ່ນປົວພະຍາດທີ່ສາມາດປີ່ນປົວໄດ້. ລັດຖະບານ ສປ ຈີນ ເຫັນວ່າ ຜູ້ຕິດເຊື້ອ ແລະ ຜູ້ແຜ່ເຊື້ອສ່ວນຫຼາຍ ແມ່ນເຄີຍອາໄສ ຫຼື ເດີນທາງໄປເມືອງອູຫັ້ນ ຫຼື ເຂດອື່ນໆ ໃນແຂວງຫູເປີຍ. ການຕັດສິນໃຈດັ່ງກ່າວ ສະແດງໃຫ້ເຫັນເຖິງຄວາມພະຍາຍາມຂອງລັດຖະບານຈີນ ໃນການຍັບຍັ້ງການລະບາດບໍ່ໃຫ້ແຜ່ລາມໄປເຂດອື່ນ ຫຼື ຕ່າງປະເທດ, ເຮັດໃຫ້ຈໍານວນຜູ້ຕິດເຊື້ອໃນເຂດອື່ນແມ່ນຖືວ່າຢູ່ໃນລະດັບຕໍ່າ ຖ້າທຽບໃສ່ສູນກາງການແຜ່ລະບາດ ກໍຄື ແຂວງຫູເປີຍ ແລະ ການປິດກັ້ນການເຂົ້າ-ອອກດັ່ງກ່າວ ຍັງຈະເຮັດໃຫ້ສາມາດກວດພົບຜູ້ຕິດເຊື້ອໄດ້ງ່າຍຂຶ້ນ ເຊິ່ງອົງການອະນາໄມໂລກ (WHO) ກໍໄດ້ຍ້ອງຍໍສັນລະເສີນລັດຖະບານຈີນ ທີ່ນຳໃຊ້ມາດຕະການດັ່ງກ່າວ. ເພາະຖ້າບໍ່ດັ່ງນັ້ນ,  ຈະເຮັດໃຫ້ເຊື້ອໄວຣັດແຜ່ລະບາດໄປທົ່ວໂລກໄດ້ຢ່າງໄວວາ ເຊິ່ງຈະສົ່ງຜົນກະ ທົບຕໍ່ລະບົບສາທາລະນະສຸກ ແລະ ເສດຖະກິດ. ເຖິງວ່າຈະມີການປິດກັ້ນເຂດດັ່ງກ່າວ, ແຕ່ລັດຖະບານ ສປ ຈີນ ກໍໄດ້ເຮັດທຸກວິທີທາງ ເພື່ອຮັບປະກັນການສະໜອງເຄື່ອງໃຊ້ທີ່ຈໍາເປັນ, ສະບຽງອາຫານ ແລະ ອຸປະກອນການແພດໃຫ້ພຽງ ພໍແກ່ປະຊາຊົນທີ່ຢູ່ເຂດຖືກກັກບໍລິເວນ. ພ້ອມດຽວກັນນັ້ນ, ກໍໄດ້ສົ່ງບັນດາແພດໝໍ,  ພະຍາບານ ແລະ ນັກຊ່ຽວຊານວັນນະໂລກ ຂອງສະຖາບັນການແພດຕ່າງໆໃນທົ່ວປະເທດຈີນ ໄປຊ່ວຍເຫຼືອຜູ້ທີ່ຕິດເຊື້ອຢູ່ເຂດດັ່ງກ່າວ.  ປະຈຸບັນ, ແຂວງຫູເປີຍມີໂຮງໝໍ ເພື່ອຮອງຮັບຄົນເຈັບ 72 ແຫ່ງ ແລະ ສະຖານທີ່ບໍລິການທາງການແພດ ຈໍານວນ 942 ແຫ່ງ. ນອກນັ້ນ, ແຂວງຫູເປີຍຍັງມີໂຮງໝໍອີກ 3 ແຫ່ງເພື່ອປິ່ນປົວພະຍາດອັກເສບປອດໂດຍສະເພາະ ແລະ ລັດຖະບານ ສປ ຈີນ ກໍໄດ້ກໍ່ສ້າງ 2 ໂຮງໝໍ ຄື: ໂຫເຊີນສ່ານ ແລະ ໂຮງໝໍ ເລີຍເຊີນຊ່ານ ຢ່າງຮີບດ່ວນເພື່ອຮັບຮອງຜູ້ຕິດເຊື້ອ ໂຄວິດ-19.

  1. ລັດຖະບານ ສປ ຈີນ ຈະສາມາດຄວບຄຸມ ແລະ ແກ້ໄຂການລະບາດຂອງພະຍາດ ໄດ້ຫຼືບໍ່ໍ?

ລັດຖະບານ ສປ ຈີນ ໄດ້ສຸມກໍາລັງໃສ່ການຄວບຄຸມສະຖານະການຢ່າງສຸດຄວາມສາມາດ ໂດຍການວາງທິດທາງໃຫ້ທຸກຂະແໜງການຂອງລັດ ຮີບຮ້ອນດໍາເນີນການຊ່ວຍເຫຼືອ ໄປຄຽງຄູ່ກັບການສ້າງຄວາມຮັບຮູ້ ແລະ ຄວາມເຂົ້າ ໃຈໃນສັງຄົມ ເພື່ອຕ້ານກັບພະຍາດລະບາດ Covid-19. ພ້ອມດຽວກັນນັ້ນ, ກໍໄດ້ລະດົມທາງພາກທຸລະກິດເພື່ອເຂົ້າມາຊ່ວຍເຫຼືອໃນການແກ້ໄຂວິກິດການດັ່ງກ່າວ, ເຊິ່ງລັດຖະບານ ສປ ຈີນ ໄດ້ດຳເນີນການດັ່ງນີ້:

  1. ຄຽງຄູ່ກັບການປ້ອງກັນ ແລະ ຄວບຄຸມພະຍາດດັ່ງກ່າວຢ່າງຮອບດ້ານ ມີຄວາມຈຳເປັນທີ່ຈະຕ້ອງຄວບຄຸມໄປຄຽງຄູ່ກັບການນຳໃຊ້ກົດໝາຍ. ໃນນີ້, ໄດ້ມີການສັບຊ້ອນເຈົ້າໜ້າທີ່ການນໍາຂອງແຂວງຫູເປີຍ ແລະ ເມືອງອູຫັ້ນ ຄົນໃໝ່ ເພື່ອສອດຄ່ອງກັບຄວາມຮຽກຮ້ອງຕ້ອງການຂອງປະຊາຊົນ.
  2. ການນຳຂັ້ນສູງ ໄດ້ລົງພື້ນທີ່ເພື່ອກວດກາເບິ່ງຄວາມຮຽບຮ້ອຍ ແລະ ສ້າງຂວັນກໍາລັງໃຈໃຫ້ແກ່ປະຊາຊົນ.
  3. ຄະນະກໍາມະການສາທາລະນະສຸກແຫ່ງຊາດ ແລະ ອົງການປົກຄອງທ້ອງຖິ່ນ ມີໜ້າທີ່ນໍາໃຊ້ກົນໄກການຮັບມືເຫດການສຸກເສີນຢ່າງຮອບດ້ານ; ກະຊວງອຸດສາຫະກໍາ ແລະ ເຕັກໂນໂລຊີ ແລະ ຂໍ້ມູນຂ່າວສານ ໄດ້ເລັ່ງໃຫ້ຜູ້ປະກອບການທາງດ້ານອຸປະກອນການແພດ ເລັ່ງການຜະລິດເພື່ອໃຫ້ພຽງພໍຕໍ່ຄວາມຈໍາເປັນໃນການໃຊ້ງານ.
  4. ທະນາຄານພັດທະນາຈີນ ໄດ້ອະນຸມັດເງິນກູ້ສິນເຊື່ອສຸກເສີນ 35 ຕື້ຢວນ. ໃນນີ້, ຈຳນວນ 20,4 ຕື້ຢວນແມ່ນສິນເຊື່ອ ເພື່ອປ້ອງກັນ ແລະ ຄວບຄຸມພະຍາດດັ່ງກ່າວ.
  5. ນຳໃຊ້ມາດຕະການກັກບໍລິເວນຄົນ 4 ປະເພດ ຄື: ກຸ່ມເອ ປະເພດຜູ້ຕິດເຊື້ອ, ກຸ່ມບີ ປະເພດທີ່ໄດ້ສໍາພັດກັບຜູ້ຕິດເຊື້ອ, ກຸ່ມຊີ ປະເພດຄອບຄົວຂອງຜູ້ຕິດເຊື້ອ, ກຸ່ມດີ ປະເພດບຸກຄົນສ່ຽງອາດໄດ້ສໍາພັດກັບກຸ່ມ ບີ.
  6. ທາງພາກເອກະຊົນ ກໍໄດ້ຍື່ນມືເຂົ້າມາຊ່ວຍ ໂດຍສະເພາະແມ່ນການສັ່ງຊື້ອຸປະກອນການແພດທີ່ຈຳເປັນຕ່າງໆຈາກທົ່ວໂລກ ແລະ ສ້າງຊ່ອງທາງສະໜອງຂໍ້ມູນທາງອອນລາຍ ແລະ ໃຫ້ຄຳປຶກສາໃນເບື້ອງຕົ້ນ ເພື່ອຫຼຸດຜ່ອນຈຳນວນຜູ້ທີ່ຈະເຂົ້າໄປໃຊ້ບໍລິການໃນໂຮງໝໍ.
  7. ທາງສື່ສັງຄົມອອນລາຍ ແມ່ນໄດ້ສະໜອງຂໍ້ມູນທີ່ດີໃຫ້ແກ່ປະຊາຊົນ ເຮັດໃຫ້ປະຊາຊົນບໍ່ແຕກຕື່ນ ພ້ອມທັງສົ່ງກໍາລັງໃຈໃຫ້ຜູ້ທີ່ກໍາລັງປະເຊີນໜ້າກັບພະຍາດໃນຄັ້ງນີ້.

 

ຍ້ອນເຊື້ອພະຍາດ Covid-19 ມີຄວາມແຕກຕ່າງຈາກເຊື້ອພະຍາດໂລກຊາ (SARS) ໃນປີ 2003, ມີຄວາມຍາກໃນການປິ່ນປົວ, ມີວິວັດທະນາການແຜ່ລະບາດທີ່ວ່ອງໄວ, ເຮັດໃຫ້ຕົວເລກຜູ້ຕິດເຊື້ອທົ່ວປະເທດຫຼາຍກວ່າ 70 ພັນກໍລະນີ. ເຖິງວັນທີ 19 ກຸມພາ 2020, ມີຜູ້ເສຍຊີວິດ 2000 ກວ່າຄົນ ແລະ ມີຜູ້ປິ່ນປົວດີເກືອບ 13,850 ຄົນ ໂດຍອີງໃສ່ການນັບຜູ້ຕິດເຊື້ອໃນຮູບແບບໃໝ່. ແຕ່ເຖິງແນວໃດກໍຕາມ ເຫັນວ່າ 80% ແມ່ນຢູ່ໃນຂັ້ນເລີ່ມຕົ້ນ (ຈະງ່າຍໃນການປິ່ນປົວໃຫ້ຫາຍດີ), 15% ຜູ້ຕິດເຊື້ອມີອາການໜັກ ແລະ  3%-5% ຜູ້ຕິດເຊື້ອມີອາການຮຸນແຮງ. ສໍາລັບ ຜູ້ຕິດເຊື້ອທີ່ຢູ່ແຂວງອື່ນແມ່ນມີຕົວເລກຫຼຸດລົງຕໍ່ເນື່ອງ ເປັນຜົນມາຈາກມີການຄວບຄຸມ ແລະ ຄຸ້ມຄອງທີ່ດີຂອງມາດຕະ ການການປ້ອງກັນຂອງຈີນ.

ນອກຈາກຄວາມສາມັກຄີປຸ້ມລຸມຊ່ວຍເຫຼືອກັນຢູ່ພາຍໃນປະເທດແລ້ວ, ສປ ຈີນ ກໍຍັງໄດ້ຮັບການຊ່ວຍເຫຼືອຈາກພາຍນອກ ເຊັ່ນ: ບັນດາອະດີດນັກສຶກສາທີ່ຢູ່ຕ່າງປະເທດກໍ່ຮວມໂຕກັນສົ່ງຜ້າອັດປາກ, ສະບຽງອາຫານ ແລະ ອຸ ປະກອນຕ່າງໆທີ່ຈໍາເປັນ, ປະຊາຊົນໃນທຸກຂົງເຂດຂອງ ສປ ຈີນ ກໍ່ຮ່ວມແຮງຮ່ວມໃຈຊ່ວຍເຫຼືອຢ່າງບໍ່ຂາດສາຍ ເຮັດໃຫ້ຍອດບໍລິຈາກເງິນຊ່ວຍເຫຼືອ ເພື່ອຕ້ານກັບພະຍາດລະບາດດັ່ງກ່າວສູງເຖິງ 4,26 ຕື້ຢວນ ແລະ ຍອດເຄື່ອງອຸປະ ກອນຊ່ວຍເຫຼືອຕ່າງໆ 5,29 ລ້ານຢວນ (ທ້າຍເດືອນມັງກອນ) ແລະ ຫຼາຍກວ່າ 10 ປະເທດໃຫ້ການຊ່ວຍເຫຼືອ ແລະ 160 ປະເທດ ສົ່ງສານສະແດງຄວາມເຫັນໃຈ. ທຸກພາກສ່ວນສຸມທຸກກໍາລັງປຽບເໝືອນ ຢູ່ໃນສະໜາມຮົບ ໂດຍຍຶດເອົາຄໍາຂວັນທີ່ວ່າ: “ອູຫັ້ນມີໄຊ ປຽບເໝືອນຫູເປີຍຮັບໄຊ, ຫູເປີຍຮັບໄຊ ປຽບເໝືອນ ສປ ຈີນ ຮັບໄຊຊະນະ ຍຶດໝັ້ນການ ນໍາໃຊ້ມາດຕະການຮັກສາ ແລະ ຄຸ້ມກັນການແຜ່ລະບາດຂອງເຊື້ອໂລກຮ້າຍ”. ເຊິ່ງຄາດວ່າ ສປ ຈີນ ຈະສາມາດຮັບໄຊ ຊະນະ ໃນການຄົ້ນຄວ້າຢາປົວພະຍາດ, ວັກຊີນປ້ອງກັນ ອັນແນ່ນອນໃນເວລາອັນໃກ້ນີ້.

  1. ການແຜ່ລະບາດຂອງເຊື້ອຈຸລະໂລກສາຍພັນໃໝ່ (Covid-19) ສົ່ງຜົນກະທົບແນວໃດຕໍ່ເສດຖະກິດຂອງ ສປຈີນ?

ບັນດານັກວິເຄາະໄດ້ຄາດການຢ່າງກວ້າງຂວາງວ່າ ການຂະຫຍາຍຕົວຂອງເສດຖະກິດຈີນ ຈະຫຼຸດລົງ 1 ຫາ 1,5% (ເຊິ່ງຈະຢູ່ໃນລະດັບ 5%, ຈາກເມື່ອກ່ອນໃນລະດັບ 6%-6,5%). ໃນນັ້ນ, ຂະແໜງການທີ່ຈະໄດ້ຮັບຜົນກະທົບໂດຍກົງມີ 3 ຂະແໜງການຄື: (1) ການບໍລິການ ເຊັ່ນ: ການທ່ອງທ່ຽວ, ຮ້ານອາຫານ, ສະຖານບັນເທິງ ແລະ ການຂົນສົ່ງ (ໂດຍສະເພາະວິສາຫະກິດຂະໜາດນ້ອຍ-ກາງ). (2) ຂະແໜງການຜະລິດ ເຊັ່ນ: ໂທລະສັບມືຖື, ອຸດສາຫະກໍາລົດ ແລະ ເຄື່ອງໄຟຟ້າ, ເນື່ອງຈາກ ໂຮງຈັກໂຮງງານສ່ວນໃຫຍ່ໄດ້ຢຸດເຊົາເຮັດວຽກຢ່າງບໍ່ມີກໍານົດ, ເຊິ່ງອາດຈະສົ່ງຜົນກະທົບໃນລະດັບໜຶ່ງຕໍ່ຕ່ອງໂສ້ການຜະລິດຂອງໂລກ. (3) ດ້ານການຄ້າ, ເນື່ອງຈາກການຫຼຸດ ຫຼື ຍົກເລີກຖ້ຽວບິນ, ເສັ້ນທາງທະເລ ແລະ ບາງປະເທດກໍໄດ້ປິດກັ້ນຊາຍແດນກັບຈີນ ເພາະມີຄວາມກັງວົນຕໍ່ກັບການແຜ່ລະບາດຂອງພະຍາດດັ່ງ ກ່າວ. ຈາກການວິເຄາະ ເຫັນວ່າ: ໃນໄລຍະສັ້ນ, ພະຍາດລະບາດອາດສົ່ງຜົນກະທົບທາງລົບຕໍ່ເສດຖະກິດ ດັ່ງທີ່ກ່າວມານັ້ນ, ແຕ່ກໍຍັງມີບາງຂະແໜງທີ່ໄດ້ຮັບຜົນປະໂຫຍດ ເຊັ່ນ: ການຄ້າຂາຍອອນລາຍ, ເກມອອນລາຍ ແລະ ຂະແໜງການບັນເທິງອອນລາຍ. ໃນຂະນະດຽວກັນ, ລັດຖະບານ ສປ ຈີນ ໄດ້ສະແດງໃຫ້ເຫັນເຖິງຄວາມເຂັ້ມແຂງທາງດ້ານການເງິນເພື່ອການຮັບມືກັບວິກິດການຂອງຈີນອີກດ້ວຍ. ໃນໄລຍະຍາວ, ສປ ຈີນ ເຊິ່ງເປັນປະເທດທີ່ມີລະດັບການຂະຫຍາຍ ຕົວທາງດ້ານເສດຖະກິດເປັນອັນດັບ 2 ຂອງໂລກ, ການລະບາດຂອງພະຍາດ ແມ່ນບໍ່ສາມາດທໍາລາຍທ່າແຮງການຊົມ ໃຊ້, ການຫັນເປັນຕົວເມືອງ ແລະ ຂົງເຂດເສດຖະກິດໃໝ່ ເຊັ່ນ: 5G ແລະ ປັນຍາປະດິດ (AI).

ວິສາຫະກິດຂອງຈີນ ເປັນໂຄງປະກອບສໍາຄັນຂອງເສດຖະກິດ, ລັດຖະບານ ສປ ຈີນ ກໍາລັງນໍາໃຊ້ນະໂຍບາຍປັບປຸງມະຫາພາກຢ່າງເຕັມທີ່, ສຸມກໍາລັງຢ່າງສຸດຂີດເພື່ອສະໜັບສະໜູນວິສາຫະກິດຕ່າງໆ ໃນການຟື້ນຟູການຜະລິດ ເລີ່ມຈາກຕະຫຼາດໃຫຍ່ກວມປະຊາກອນ 1,4 ຕື້ຄົນ, ມີຕ່ອງໂສ້ອຸດສາຫະກໍາອັນຄົບຖ້ວນທີ່ສຸດໃນໂລກ, ພື້ນຖານໂຄງລ່າງທີ່ດີ, ຜູ້ມີຄວາມຮູ້ຄວາມສາມາດ ແລະ ເຕັກນິກວິຊາການຢ່າງຫຼວງຫຼາຍ ແລະ ອື່ນໆ, ເຊິ່ງທັງໝົດເຫຼົ່ານີ້ ຈະເປັນສິ່ງ ຄໍ້າປະກັນໃຫ້ເສດຖະກິດ ແລະ ເປັນຄວາມໝັ້ນໃຈຕໍ່ກັບການພັດທະນາຂອງວິສາຫະກິດຂອງ ສປ ຈີນ.

  1. ປະຊາ​ຄົມ​ໂລກ​ຈະ​ຮັບ​ມື​ກັບ​ໂລກລະບາດ​ແນວ​ໃດ ເພື່ອ​ຄວາມປອດໄພ​ຂອງມວນ​ມະນຸດ?

ລັດຖະບານຈີນ ​ ໄດ້ເຮັດວຽກຢ່າງໃກ້ຊິດກັບອົງການອະນາໄມໂລກ (WHO) ເພື່ອປຶກສາຫາລື ແລະ ຊອກຫາວິທີແກ້ໄຂຮ່ວມກັນ, ເຊິ່ງສະແດງໃຫ້ເຫັນວ່າລັດຖະບານ ສປ ຈີນ ມີຄວາມຈິງໃຈ ແລະ ບໍ່ມີຫຍັງທີ່ຈະປົກ​ປິດ​ກ່ຽວກັບພະຍາດລະບາດທີ່ເກີດຂຶ້ນຢູ່ປະເທດຂອງຕົນເອງ. ຂະນະດຽວກັນ, ​ປະຊາຊົນຈີນ ກໍມີຄວາມໝັ້ນໃຈວ່າ ລັດຖະບານ ຈະສາມາດຮັບມືກັບການລະບາດຂອງພະຍາດໃນຄັ້ງນີ້. ຄຽງຄູ່ກັນນັ້ນ, ສປ ຈີນ ໄດ້ໃຫ້ການຮ່ວມມື-ປະສານສົມທົບຢ່າງເຕັມທີ່ຕໍ່ກັບຄວາມຮຽກຮ້ອງຂອງລັດຖະບານປະເທດອື່ນໆ, ເພື່ອປ້ອງກັນການລະບາດຂອງພະຍາດ ເຊັ່ນ: ການອົບພະຍົບຄົນ​ຈາກເມືອງອູຫັ້ນ, ການຍົກເລີກຖ້ຽວບິນໄປ ສປ ຈີນ ແລະ ການໄປຮັບຄົນຈີນກັບຄືນສູ່ປະເທດ. ນອກ​ນີ້, ຈີນຍັງຄົງເປີດກວ້າງ ແລະ ຮູ້ບຸນຄຸນຕໍ່ການຊ່ວຍເຫຼືອທຸກປະເພດຈາກປະເທດອື່ນໆ ໃນການຕ້ານການແຜ່ລະບາດຂອງພະຍາດ. ເຖິງຢ່າງໃດກໍຕາມ, ລັດຖະບານ ແລະ ປະຊາຊົນຈີນ ກໍມີຄວາມເປັນຫ່ວງຫຼາຍຕໍ່ກັບຄວາມກັງວົນທົ່ວໂລກກ່ຽວກັບການລະບາດຂອງເຊື້ອພະຍາດ Covid-19, ເຊິ່ງ ສປ ຈີນ ໄດ້ແນະນໍາໃຫ້ປະຊາຄົມໂລກ ມີການຮ່ວມມືກັນຢ່າງໃກ້ຊິດ ເພື່ອຄວາມປອດໄພຂອງມວນມະນຸດເຮົາດັ່ງຕໍ່ໄປ​ນີ້:

  • ເພີ່ມປະສິດທິພາບກົນໄກການເປີດເຜີຍຂໍ້ມູນການລະບາດທີ່ມີຢູ່​ໃຫ້​ເໝາະ​ສົມ, ໂດຍສະເພາະການ​​ແປພາສາ​​​​ໃຫ້​ ​ຖືກຕ້ອງ ແລະ ໃຊ້ພາສາໃຫ້ແທດເໝາະ ເພື່ອ​ທີ່​ຈະ​ນໍາ​ເອົາຂ່າວສານ ​ໄປ​ເຜີຍ​ແຜ່ໃຫ້ສາທາລະນະຊົນສາມາດເຂົ້າເຖິງ ກ່ອນຂ່າວທີ່​ບໍ່​ມີ​ມູນ​ຄວາມ​ຈິງ ຈະແຜ່ຂະຫຍາຍອອກ​ໄປ.
  • ເພີ່ມທະວີການແລກປ່ຽນປະສົບການ ລະຫວ່າງ ປະເທດໃນການຄວບຄຸມການລະບາດ. ສປ ຈີນ ຖືສຳຄັນໃນການແປຄຳແນະນຳຫຼ້າສຸດ ສຳລັບການປ້ອງກັນ ໂຄວິດ-19 ເປັນພາສາທ້ອງຖິ່ນ ແລະ ສົ່ງຕໍ່ໄປຍັງປະເທດເພື່ອນບ້ານໃຫ້ທ່ວງທັນ ແລະ ດ້ວຍຫຼາຍຮູບແບບ (ເຊັ່ນ: ສື່ສັງຄົມອອນ​ລາຍ).
  • ຕໍ່ຕ້ານການຈຳແນກຕໍ່ເຂດທີ່ມີການລະບາດ ແລະ ປະຊາຊົນ​ໃນ​ເຂດ​ນັ້ນ. ການລະບາດຂອງພະຍາດ ບໍ່ຄວນກາຍເປັນຮົ້ວກັ້ນລະຫວ່າງປະເທດ, ແຕ່ມັນຄວນຈະກາຍເປັນຂົວຕໍ່ຮັດແໜ້ນສາ​ຍພົວພັນລະຫວ່າງປະເທດ.

 

  1. ສໍາລັບຕໍ່ ສປປ ລາວ

ພາຍຫຼັງທີ່ມີການແຜ່ລະບາດຂອງເຊື້ອພະຍາດ, ລັດຖະບານ ສປປ ລາວ ໄດ້ມີຄວາມເປັນຫ່ວງ ແລະ ໄດ້ແຕ່ງ ຕັ້ງຄະນະກຳມະການສະເພາະກິດ ເພື່ອຕິດຕາມສະພາບຢ່າງໃກ້ຊິດ ແລະ ວາງມາດຕະການໃນການປ້ອງກັນ ເພື່ອບໍ່ໃຫ້ພະຍາດແຜ່ລາມ ລວມທັງຕິດຕາມສະພາບນັກສຶກສາລາວ ທີ່ກຳລັງສຶກສາຢູ່ ສປ ຈີນ ຢ່າງເປັນປົກກະຕິ. ມາເຖິງປະຈຸບັນ, ເຖິງວ່າ ຢູ່ ສປປ ລາວ ຍັງບໍ່ທັນກວດພົບກໍລະນີຜູ້ຕິດເຊື້ອພະຍາດ ໂຄວິດ-19, ແຕ່ເຈົ້າໜ້າທີ່ໆກ່ຽວຂ້ອງກໍໄດ້ປະ ສານສົມທົບກັນຢ່າງໃກ້ຊິດ ແລະ ເປັນປົກກະຕິ. ປະຊາຊົນ, ເຖິງວ່າຈະມີຄວາມແຕກຕື່ນໃນໄລຍະເບື້ອງຕົ້ນ ຍ້ອນໄດ້ຮັບຂໍ້ມູນຂ່າວສານທີ່ເກີນຄວາມເປັນຈິງ, ແຕ່ປະຈຸບັນ ປະຊາຊົນແມ່ນໄດ້ຮັບຮູ້ຂໍ້ມູນທີ່ຖືກຕ້ອງຫຼາຍຂຶ້ນ ຈາກພາກສ່ວນທີ່ກ່ຽວຂອງພາກລັດ ແລະ ອົງການຈັດຕັ້ງສາກົນ ອັນໄດ້ເຮັດໃຫ້ປະຊາຊົນມີຄວາມຮັບຮູ້ ແລະ ເຂົ້າໃຈຫຼາຍຂຶ້ນ.

ຄຽງຄູ່ກັນນັ້ນ, ຢູ່ ສປປ ລາວ ກໍໄດ້ຈັດກິດຈະກໍາລະດົມທຶນ ເພື່ອນຳໄປຊ່ວຍເຫຼືອ ແລະ ໃຫ້ກໍາລັງໃຈແກ່ປະ ຊາຊົນຈີນ ຜ່ານສະມາຄົມມິດຕະພາບ ລາວ-ຈີນ, ສະມາຄົມນັກສຶກສາລາວທີ່ເຄີຍໄປຮຽນ ຢູ່ ສປ ຈີນ ແລະ ໜ່ວຍງານ ອື່ນໆ. ສໍາລັບບຸກຄົນໃດຕ້ອງການຢາກມີສ່ວນຮ່ວມໃນການບໍລິຈາກ ກໍສາມາດໄປບໍລິຈາກໄດ້ທີ່ກະຊວງພະລັງງານ ແລະ ບໍ່ແຮ່ ແລະ ຫ້ອງວ່າການນະຄອນຫຼວງ, ສໍາລັບຕ່າງແຂວງ ກໍສາມາດໄປບໍລິຈາກໄດ້ທີ່ ພະແນກພົວພັນຕ່າງປະເທດ ແລະ ພະແນກພະລັງງງານ ແລະ ບໍ່ແຮ່ ໃນຂອບເຂດທົ່ວປະເທດ.

ສປປ ລາວ ໄດ້ຕິດຕາມສະພາບການ ແລະ ການແກ້ໄຂຂອງລັດຖະບານ ສປ ຈີນ ຢ່າງໃກ້ຊິດ, ພ້ອມດຽວກັນນັ້ນ ກໍຕີລາຄາສູງຕໍ່ການຊີ້ນໍາ-ນໍາພາລະດັບສູງ ແລະ ທັນການຂອງ ພັກ ແລະ ລັດຖະບານ ສປ ຈີນ ເພື່ອສຸມທຸກກໍາລັງແຮງເຂົ້າໃນການຄວບຄຸມການລະບາດຂອງເຊື້ອໄວຣັດດັ່ງກ່າວ ຈົນສາມາດເຮັດໃຫ້ການລະບາດຖືກຈໍາກັດລົງ. ພ້ອມດຽວກັນ, ຍັງເຊື່ອໝັ້ນຢ່າງໜັກແໜ້ນວ່າ ພາຍໃຕ້ການຊີ້ນໍາ-ນໍາພາ ແລະ ການເອົາໃຈໃສ່ ຂອງການນຳຂັ້ນສູນກາງ ກໍຄືທ້ອງຖິ່ນ, ສປ ຈີນ ຈະສາມາດຜ່ານຜ່າຄວາມຫຍຸ້ງຍາກໃນຄັ້ງນີ້ ແລະ ຟື້ນຟູສະພາບດັ່ງກ່າວ ໃຫ້ກັບຄືນເປັນປົກກະຕິໂດຍໄວ.