ວັນທີ 14 ພຶດສະພາ 2024 ນີ້, ຄອບຄົວການນໍາຂັ້ນສູງກາງ, ສະຫະພັນແມ່ຍິງ ກະຊວງປ້ອງກັນປະເທດ ມອບເຄື່ອງຊ່ວຍເຫຼືອໃຫ້ແຂວງໄຊສົມບູນ, ໂດຍມີທ່ານ ນາງ ຄຳສອນ ຈັນຍາລາດ, ພັນລະຍາຂອງສະຫາຍ ພົນເອກ ຈັນສະໜອນ ຈັນຍາລາດ ລັດຖະມົນຕີກະຊວງປ້ອງກັນປະເທດ, ມີບັນດາທ່ານຄອບຄົວການນໍາຂັ້ນສູນກາງ, ຄະນະປະຈຳພັກແຂວງ, ກຳມະການພັກແຂວງ, ຄະນະພັກ-ຄະນະບັນຊາກອງບັນຊາການທະຫານແຂວງ, ປກສ ແຂວງ, ພະແນກການຂອງແຂວງ ຕະຫຼອດຮອດພາກສ່ວນທີ່ກ່ຽວຂ້ອງເຂົ້າຮ່ວມ.
ສະຫາຍ ພົນຕີ ຄຳເພັດ ສີຊານົນ ຄະນະປະຈຳພັກກະຊວງ ຫົວໜ້າກົມໃຫຍ່ພະລາທິການກອງທັບ ໄດ້ຕາງໜ້າໃຫ້ຄອບຄົວການນໍາ, ສະຫະພັນແມ່ຍິງກະຊວງປ້ອງກັນປະເທດ ກ່າວວ່າ: ການມາຢ້ຽມຢາມທ່ຽວຊົມ ແລະ ມອບເຄື່ອງຊ່ວຍເຫຼືອໃຫ້ແຂວງໄຊສົມບູນ ໃນຄັ້ງນີ້ແມ່ນໄດ້ຍາດແຍ່ງເອົາການຊ່ວຍເຫຼືອ, ການອຸປະຖຳ ແລະ ການປະກອບສ່ວນຊ່ວຍເຫຼືອທາງດ້ານວັດຖຸ, ເສື້ອຜ້າ, ເຄື່ອງໃຊ້ຂອງນ້ອງນັກຮຽນຈໍານວນໜຶ່ງມາ ໂດຍໄດ້ຮັບການສະໜັບສະໜູນຈາກບໍລິສັດ ພີເອສແອວ ຈຳກັດ ແລະ ບໍລິສັດ ອີຊູຊູລາວ ວີເອສເອ ຈຳກັດ, ມາມອບໃຫ້ແຂວງ ເພື່ອນໍາໃຊ້ຊຸກຍູ້ຊ່ວຍເຫຼືອບັນດາຄອບຄົວພໍ່ແມ່ປະຊາຊົນ ຂອງແຂວງ ທີ່ຍັງມີຄວາມຫຍຸ້ງຍາກທາງດ້ານເສດຖະກິດ, ຢູ່ເຂດຫ່າງໄກ. ເຄື່ອງທີ່ໄດ້ນຳມາມອບໃຫ້ບໍ່ພຽງພໍກັບຄວາມຕ້ອງການ ແຕ່ກໍ່ຂໍເປັນສ່ວນໜຶ່ງໃນການປະກອບສ່ວນເພື່ອຊຸກຍູ້ ແກ້ໄຂຄວາມຫຍຸ້ງຍາກຊ່ວຍຄະນະນໍາ, ການນໍາແຂວງໄຊສົມບູນ. ຍ້ອນມີເວລາບໍ່ຫຼາຍ ຕາມຈິດໃຈຂອງຄອບຄົວການນໍາ, ສະຫະພັນແມ່ຍິງກະຊວງປ້ອງກັນປະເທດ ແມ່ນຂໍໃຫ້ນຳເອົາເຄື່ອງຊ່ວຍເຫຼືອຈຳນວນດັ່ງກ່າວ ສືບຕໍ່ເບີກຈ່າຍຊ່ວຍໃຫ້ໄປມອບໄປຮອດໄປເຖິງ ຜູ້ທີ່ມີຄວາມຈຳເປັນ, ມີຄວາມຫຍຸ້ງຍາກສັບສົນແທ້ ເພື່ອຊ່ວຍພວກເຂົາໄດ້ມີເພີ່ມ, ມີຕື່ມເຄື່ອງໃຊ້ອັນຈຳເປັນທີ່ຢາກໄດ້.
ໃນໂອກາດນີ້, ທ່ານ ສຸກສະຫວາດ ວົງພູມເຫຼັກ ຮອງເຈົ້າແຂວງໄຊສົມບູນ ໄດ້ຕາງໜ້າໃຫ້ຄະນະນໍາຂອງແຂວງ ມີຄວາມຮູ້ສຶກພາກພູມໃຈເປັນຢ່າງຍິ່ງທີ່ໄດ້ເປັນກຽດຢ່າງສູງ ຕ້ອນຮັບຄອບຄົວການນໍາຂັ້ນສູນກາງ ພ້ອມດ້ວຍຄະນະ ທີ່ໄດ້ເດີນທາງມາເຄື່ອນໄຫວຢ້ຽມຢາມ ແລະ ມອບເຄື່ອງຊ່ວຍເຫຼືອ ໃຫ້ຄອບຄົວປະຊາຊົນຜູ້ທີ່ມີຄວາມຫຍຸ້ງຍາກ ດ້ານເສດຖະກິດ, ເຄື່ອງໃຊ້ຂອງນ້ອງນັກຮຽນ ຢູ່ແຂວງໄຊສົມບູນ, ເຊິ່ງສະແດງໃຫ້ເຫັນເຖິງຄວາມເປັນຫ່ວງເປັນໄຍຕໍ່ອົງຄະນະພັກ, ອົງການປົກຄອງແຂວງ ແລະ ປະຊາຊົນບັນດາເຜົ່າ ແຂວງໄຊສົມບູນ.
ສະນັ້ນ, ໃນນາມຕາງໜ້າຄະນະນໍາແຂວງໄຊສົມບູນ ແລະ ຕາງໜ້າປະຊາຊົນບັນດາເຜົ່າ ຂໍສະແດງຄວາມຂອບໃຈ ແລະ ຮູ້ບຸນຄຸນເປັນຢ່າງຍິ່ງຕໍ່ຄອບຄົວການນໍາ, ສະຫະພັນແມ່ຍິງກະຊວງປ້ອງກັນປະເທດ ແລະ ຜູ້ທີ່ມີສ່ວນຮ່ວມການຊ່ວຍເຫຼືອ, ສະໜັບສະໜູນ ໃນຄັ້ງນີ້, ພ້ອມທັງໃຫ້ຄຳໝັ້ນສັນຍາວ່າຈະສົມທົບຂະແໜງການກ່ຽວຂ້ອງຂອງແຂວງ, ບັນດາເມືອງ ຄົ້ນຄວ້າຄັດເລືອກຄອບຄົວປະຊາຊົນ, ໂຮງຮຽນເປົ້າໝາຍ ເພື່ອສືບຕໍ່ນໍາເອົາດຄື່ອງດັ່ງກ່າວ ໄປແຈກຢາຍໃຫ້ທົ່ວເຖິງຜູ້ມີຄວາມຈຳເປັນ, ມີຄວາມຫຍຸ້ງຍາກແທ້, ພ້ອມທັງແນະນໍາການຊົມໃຊ້ປົກປັກຮັກສາໃຫ້ເກີດປະໂຫຍດສູງສຸດ ແລະ ນໍາໃຊ້ໃຫ້ຍາວນານທີ່ສຸດ.
ຈາກນັ້ນ ຄອບຄົວການນໍາຂັ້ນສູງກາງ, ສະຫະພັນແມ່ຍິງກະຊວງປ້ອງກັນປະເທດ ພ້ອມຄະນະ ຍັງໄດ້ນຳເອົາເຄື່ອງໄປມອບໃຫ້ ພໍ່ແມ່ປະຊາຊົນບ້ານທົ່ງຮັກ, ບ້ານນໍ້າຍອນ ເມືອງອະນຸວົງ ແຂວງໄຊສົມບູນ ແລະ ມອບເຄື່ອງໃຫ້ໂຮງຮຽນເຫຼົ່າຮົບພະລາທິການກອງທັບຕື່ມອີກ.
ໂດຍ: ບິກໄຊ ສົມພູ
